Klei Aê Diê Blŭ: Klei Bi Hriêng 30:3-4
Êlan kliăng: “Kâo amâo tuôm hriăm klei thâo mĭn ôh, kăn kâo mâo rei klei thâo săng kơ Pô Doh Jăk.” (Klei Bi Hriêng 30:3)
Klei êmuh ksiêm mĭn: Ya klei êmuh Y-Agur êmuh, brei ƀuh klei kƀah anak mnuih? Si klei wĭt lač? Ya mta klei yuôm diih ƀuh čiăng wah lač brei kơ phung khua kiă kriê?
Y-Agur amâo mjưh ruê̆ hŏng klei thâo kral klei mluk pô hlăm klei thâo kral Aê Diê ôh, ƀiădah ñu mdưm êma klei êmuh čiăng lač kơ klei kƀah, klei kdriêl knhal anak mnuih hlăm klei thâo kral Khua Yang. Leh anăn Klei Aê Diê Blŭ brei leh klei wĭt lač kơ jih klei êmuh anei.
“Hlei pô đĭ leh kơ adiê, leh anăn lŏ trŭn leh?” knŏng hjăn Aê Diê (Klei Mphŭn Dơ̆ng 11:7; 28:12; Klei Mmuñ Hđăp 68:18). “Hlei pô bi kƀĭn leh angĭn hlăm kngan Ñu?” Knŏng hjăn Aê Diê (Klei Kbiă 15:10; Klei Mmuñ Hđăp 104:3; 135:7; Y-Êsai 40:12; Y-Amôs 4:13). “Hlei pô đŭng êa hlăm ao Ñu?” Knŏng hjăn Aê Diê (Y-Yôp 26:8; 38:8-9). “Hlei pô bi kjăp leh knhal lăn ala?” Knŏng hjăn Aê Diê (Y-Yôp 38:4; Klei Mmuñ Hđăp 24:1-2; Klei Bi Hriêng 8:27-30). Klei wĭt lač kơ pă klei êmuh ti dlông anei klă mngač, jing Aê Diê yơh, leh anăn ară anei Y-Agur čiăng thâo Anăn Ñu leh anăn Anak Êkei Ñu. Hlăm klei mĭn phung Israel, klei thâo anăn sa čô mnuih, jing thâo kơ klei jing leh anăn knuih pô anăn. Y-Agur mdưm leh pă klei êmuh tal êlâo čiăng hưn mdah ai tiê ñu hmăng hmưi čiăng thâo kral bruă kngan Aê Diê, leh anăn klei êmuh tal êma anei brei ƀuh klei ñu lŏ čiăng thâo kral Aê Diê Pô.
“Hlei Anăn Ñu?” jing Pô Doh Jăk (êlan 3), Aê Diê (êlan 5, 9), Yêhôwa (êlan 9). “Hlei Anăn Anak Êkei Ñu?” Phung mblang Klei Aê Diê Blŭ phung Israel mblang snei, “Anak Êkei” Aê Diê jing Y-Yakôp (Klei Kbiă 4:22; Y-Yêrêmi 31:9; Y-Ôsê 11:1); đa đa pô mblang jing Y-Ađam (Y-Luk 3:38). Ƀiădah lĕ, hlăm Klei Bi Mguôp Mrâo wĭt lač “Anak Êkei” Aê Diê, jing Pô hrih mjing mbĭt, Pô Tal êlâo hĭn (Klei Bi Hriêng 8:22-31), Pô “đĭ kơ adiê leh anăn lŏ trŭn” jing Khua Yang Yêsu yơh (Y-Yôhan 3:13; Êphêsô 4:8-10).
Y-Agur bi ruê̆ klei ñu êmuh hŏng klei blŭ lông dlăng: “Tơdah ih thâo, lač yơh!”. Klei blŭ lông dlăng anei brei ƀuh klei ñu êpa mhao čiăng thâo kral Aê Diê. Ƀiădah hlei pô dưi thâo kral Aê Diê amâo mâo knhal, tơdah Ñu amâo bi êdah Ñu Pô kơ anak mnuih ôh. Lŏ sa blư̆ dơ̆ng, êlan 4 brei ƀuh klei wĭt lač kơ jih klei êmuh djŏ kơ Pô Doh Jăk, amâo djŏ tui si hlăm klei mĭn anak mnuih ôh ƀiădah hlăm klei bi êdah myang. Knŏng hjăn Khua Yang pô yơh dưi lač kơ jih jang akŏ klei êmuh anei.
Drei hmăng hmưi kơ lăn čar, Phung Sang Aê Diê, gŏ sang mâo phung khua kiă kriê, phung khua pô mtô, phung amĭ ama mâo klei thâo săng thâo mĭn, ƀiădah klei thâo săng thâo mĭn knŏng brei kơ hlei pô luă gŭ, thâo kral klei kƀah kdriêl knhal pô, thâo kral Khua Yang leh anăn kkuh mpŭ kơ Ñu, “Klei huĭ mpŭ kơ Yêhôwa jing klei kčưm kơ klei thâo mĭn, leh anăn klei thâo kral Pô Doh Jăk jing klei thâo săng.” (Klei Bi Hriêng 9:10). Anei yơh jing mta klei yuôm brei drei hŏng jih ai tiê wah lač brei kơ phung khua kiă kriê lăn čar, kơ Phung Sang Aê Diê, leh anăn kơ gŏ sang drei.
Si ngă drei mĭn dưi wĭt lač kơ jih klei êmuh djŏ kơ Pô Doh Jăk mơ̆?
Wah lač: Ơ Khua Yang, akâo Khua Yang khăp pap, brei kơ kâo mâo phung khua kiă kriê hlăm knŭk kna, hlăm Phung Sang Aê Diê, hlăm gŏ sang thâo kral klei kƀah, kdriêl knhal pô, čiăng kơ hŏng klei luă gŭ tui duah Khua Yang hŏng jih ai tiê. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Kôlôs 3
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
