Henplais 5:5-10
Nqe cim.
“Txawm yog Yexus yog Vajtswv tus Tub los Nws tseem kawm mloog lus los ntawm txojkev uas tiv kev txomnyem. Thaum Vajtswv ua rau Nws zoo kawg nkaus lawm, Nws thiaj yog Tus uas pub txojsia ntev dhawv mus ibtxhis rau txhua tus uas mloog Nws lus” (Henplais 5:8-9).
Lus nug rau sawvdaws xav:
- Tswv Yexus muaj txaus tej yam uas Tus Povthawj Hlob cheemtsum muaj
licas?
- Tswv Yexus kawm mloog lus thaum twg?
- Vim licas Tswv Yexus yog Tus Povthawj Hlob Uas Peb Cheemtsum?
Tus Povthawj Hlob yog tus nyob nruab nrab ntawm Vajtswv thiab tibneeg, nws tes haujlwm yog fij tsiaj theej txhoj rau tagnrho cov pejxeem. Yog ib tug ua tus Tswv haujlwm, Tus Povthawj Hlob yuav tsum tau Vajtswv xaiv. Yog ib tug sawv cev ntawm cov pejxeem, nws yuav tsum nkag siab txhua tus kev qaug zog. Keebkwm tes haujlwm Povthawj Hlob ntawm haivneeg Yixalayees pib ntawm Aloos los, dhau ntau tiam, los yeej tsis muaj ib tug Povthawj Hlob uas zoo txaus, tsuas muaj Tswv Yexus tibleeg xwb thiaj zoo txaus xwb. Qhov xubthawj, Tswv Yexus “tsis tau khav hais tias Nws yog ib tug Povthawj Hlob” tiamsis Nws tau Vajtswv tsa ua “Povthawj Hlob mus ibtxhis ib yam li Mekhixedes” (nqe 5-6). Txhais tau hais tias Tswv Yexus tes haujlwm Povthawj Hlob zoo ib yam li Mekhixedes, tsis yog tsa raws txojcai, tiamsis tsa raws li Vajtswv lub siab nyiam. Tim ob, Tswv Yexus yog Vajtswv los yug ua neeg, Nws muaj yam ntxwv Vajtswv thiab muaj yamntxwv tibneeg. Nyob hauv tibneeg lubcev, Nws kuj ntsib kev txomnyem, kev mob, nws thiaj paub txog tibneeg tej kev qaug zog.
Tus sau Tsab ntawv Henplais sau hais tias Tswv Yexus “kawm mloog lus los ntawm txojkev uas tiv kev txomnyem” (nqe 8). Txhais tau hais tias thaum Tswv Yexus tiv kev txomnyem, Nws totaub txog lub siab nqaij tawv xav tawmtsam Vajtswv lub siab nyiam. Qhov no pom meej nyob hauv lub vaj Khexemanes thaum Tswv Yexus tsa suab thov Leej Txiv hais tias, “Kuv Txiv, yog Koj pom zoo, thov koj tshem lub khob no ntawm Kuv mus!” Thaum nqaij tawv xav ua raws tus kheej lub siab nyiam ces Tswv Yexus txiav txim siab mloog lus, Nws hais ntxiv hais tias: “Txawm yog licas los thov Koj tsis txhob ua raws li Kuv lub siab nyiam, tiamsis cia ua raws li Koj lub siab nyiam xwb!” (Mathais 26:39).
Qhov siab tshajplaws ntawm kev mloog lus yog qhov uas tus Tswv txaus siab tuag saum tus ntoo khaublig. “Tiav lawm lauj!” yog lo lus kawg uas Tswv Yexus hais ua ntej tu siav (Yauhas 19:30) qhia pom hais tias los ntawm Tswv Yexus kev mloog lus tiv txomnyem, thiaj ua tiav Vajtswv txojkev cawmdim raws li tau npaj tseg. Vim li ntawd, Tswv Yexus “thiaj yog tus uas pub txojsia ntev dhawv mus ibtxhis rau txhua tus uas mloog Nws lus” (nqe 9). Niaj hnub nimno, tibneeg tsis cheemtsum txog Tus Povthawj Hlob ib xyoos fij ib zaug tsiaj theej txhoj lawm. Tiamsis, txhua tus puavleej tau txais txojkev cawmdim thaum los cuag Cawmseej Yexus los ntawm txojkev ntseeg. Tswv Yexus xwb thiaj yog Tus Povthawj Hlob uas peb cheemtsum.
Thov Vajtswv
Tswv Yexus tus uas yog nyuam yaus Tus Povthawj Hlob. Thov ua Koj tsaug vim Koj mloog Leej Txiv lus, txaus siab tiv kev txomnyem, nyuam yaus thiaj tau cawmdim los ntawm kev ntseeg. Thov pab nyuam yaus ncaj ncees raws Koj qab thiab kawm mloog Koj lus txhua lub sijhawm. Amees.
Peb puas mloog Vajtswv lus tuag nthi thaum ntsib kev txomnyem, kev sim siab vim Vajtswv tes haujlwm lawm tau?
Nyeem Vajluskub hauv peb lub xyoos: Exekees 4:1-5:7
Kênh Youtube BHKTHN:
