Klei Aê Diê Blŭ: Hêbrơ 5:5-10
Êlan kliăng: “Wăt tơdah Ñu jing Anak Aê Diê, Ñu hriăm klei gưt asăp hŏng klei knap mñai Ñu tŭ leh, leh anăn tơdah leh Ñu jing jăk klă, Ñu jing akŏ kơ klei bi mtlaih hlŏng lar kơ jih jang hlei pô gưt asăp kơ Ñu” (Hêbrơ 5:8-9)
Klei êmuh ksiêm mĭn: Si Khua Yang Yêsu ngă mdjŏ klei čoh čuăn kơ sa čô Khua Ngă Yang Prŏng? Hlăm ya mta klei Ñu hriăm gưt asăp hŏng klei knap mñai Ñu tŭ leh? Ya ngă Ñu jing Khua Ngă Yang Prŏng brei drei bi mâo hĕ?
Khua Ngă Yang Prŏng jing pô ti krah Aê Diê hŏng mnuih, čiăng myơr mnơ̆ng ngă yang kyua klei soh jih jang phung ƀuôn sang. Jing mnuih mă bruă kơ Aê Diê, Khua Ngă Yang Prŏng jing pô Aê Diê ruah. Pô bi ala kơ mnuih ƀuôn sang, jing pô thâo pap kơ jih jang mnuih. Bruă Khua Ngă Yang Prŏng phung Israel dơ̆ng kčưm mơ̆ng Y‑Arôn găn lu wưng ênuk, ƀiădah amâo mâo sa čô Khua Ngă Yang Prŏng jăk klă ôh, knŏng Khua Yang Yêsu. Êlâo hĭn, Ñu “amâo bi mđĭ Ñu pô ôh čiăng jing Khua Ngă Yang Prŏng” ƀiădah Aê Diê pô yơh mdưm brei “jing khua ngă yang prŏng tui si êpul Y‑Mêlkisadek”(êlan 5-6). Čiăng lač bruă Khua Ngă Yang Prŏng Khua Yang Yêsu ăt msĕ si Y‑Mêlkisađek mơh, amâo kbiă hriê mơ̆ng sa êpul tui si bi kčah ôh ƀiădah kbiă hriê mơ̆ng klei Aê Diê čiăng yuôm bhăn. Tal dua, Yang Yêsu jing Aê Diê jing mnuih, Ñu mâo knuih myang leh anăn knuih mnuih. Hlăm asei mlei mnuih, Ñu tuôm găn klei knap mñai, klei ruă, kyuanăn Ñu dưi pap brei klei awăt êdu anak mnuih.
Pô čih hdruôm hră Hêbrơ brei thâo Yang Yêsu “hriăm klei gưt asăp hŏng klei knap mñai Ñu tŭ leh” (êlan 8). Čiăng lač, tơdah tŭ klei knap mñai, Ñu săng kơ klei kđeh bi blah čiăng bi kdơ̆ng hŏng klei Aê Diê čiăng. Klei anei bi êdah klă hĭn hlăm war mnga Gêtsêmanê hlăk Yêsu Krist ur kwưh kơ Aê Diê Ama, “Ơ Ama Kâo, tơdah dưi, mă mđuĕ hĕ atŏ anei mơ̆ng Kâo!” Tơdah kđeh êrah Ñu čiăng ngă tui si klei Ñu pô čiăng snăn Yang Yêsu ăt gưt asăp: “amâo djŏ tui si Kâo čiăng ôh, ƀiădah tui si Ih čiăng” (Y‑Mathiơ 26:39).
Klei gưt asăp kluôm dhuôm jing Khua Yang Yêsu tŭ ư myơr Ñu pô ti kyâo bi kal. “Jih jang bruă ênŭm leh” jing klei Ñu blŭ knhal tuč êlâo tuč ai (Y‑Yôhan 19:30) brei ƀuh klei Ñu gưt asăp tŭ klei knap mñai, hdră Aê Diê bi mtlaih dưi bi leh ênŭm. Kyuanăn, Yang Yêsu jing “akŏ kơ klei bi mtlaih hlŏng lar kơ jih jang hlei pô gưt asăp kơ Ñu” (êlan 9). Ară anei, anak mnuih amâo lŏ guôn Khua Ngă Yang Prŏng grăp thŭn sa bliư̆ myơr mnơ̆ng ngă yang kyua klei soh ôh. Ƀiădah grăp čô dưi mă tŭ klei bi mtlaih tơdah hriê kơ Yang Yêsu Krist hŏng klei đăo. Ñu yơh Khua Ngă Yang Prŏng brei drei bi mâo hĕ.
Si ngă drei gưt asăp kơ Khua Yang kluôm ênŭm mơ̆ tơdah tuôm hŏng klei lông dlăng, klei knap mñai kyua bruă Ñu?
Wal lač: Ơ Yang Yêsu Khua Ngă Yang Prŏng kâo ơi, bi mni kơ Ih kyua gưt asăp Ama, tŭ ư tŭ klei knap mñai, kyuanăn kâo dưi mă tŭ klei bi mtlaih hlŏng lar hŏng klei đăo. Đru kâo dôk sĭt suôr nanao hŏng Ih leh anăn hriăm gưt asăp Ih hlăm djăp mta klei truh.
Dlăng Klei Aê Diê Blŭ hlăm tlâo thŭn: Y‑Êskiêl 4:1–5:7.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
