Kalatias 5:16-25
Nqe cim:
“Cov uas ntseeg Yexus Khetos, lawv twb muab tej kev phem uas lawv lub siab nyiam ua huv tibsi los ntsia rau saum tus ntoo khaublig lawm. Vaj Ntsujplig twb pub txojsia rau peb lawm; peb yuav tsum cia nws kav tagnrho peb lub neej.” (Kalatias 5:24-25).
Lus nug rau sawvdaws xav:
- Tej haujlwm ntawm lub neej ua raws li ntiajteb yog dabtsi thiab nqi zog zoo li cas?
- Ua neej hauv Tswv yog ua neej zoo li cas?
- Peb twb ua dabtsi rau lub neej ntseeg Yexus?
Yog ib tug ntseeg Yexus, peb cheemtsum loj hlob rau kev ua tus ntseeg txhua hnub. Vajtswv Txojlus qhia paub lub neej ntseeg Yexus tawmtsam lub neej uas ua li siab ntshaw. Nrog tus Tswv mus yog txaus siab tuag tus neeg txhaum, yug dua tshiab hauv Tswv Yexus, ua neeg tshiab thiab ua lub neej tshiab raws li Vaj Ntsujplig qhia. Timthawj Paulus qhia rau peb paub tej uas neeg lub siab nyiam ua: “Kev ua nkauj ua nraug, kev phem kev qias thiab ua dog ua dig, pe dab pe mlom, ua neeb ua yaig, ua yeebncuab, sib ceg sib ntaus, sib khib, sib chim, xav ua tus hlob, sib faib ua pab ua pawg, ntshaw luag tug, quav yeeb, quav tshuaj, quav cawv, qw ua nqaj ua nqug thiab ua ntau yam uas zoo li tej no.” (nqe 19-21). Nqi zog rau cov neeg uas niaj hnub ua raws li lub siab nyiam, tsis kam lees txim yuav tsis tau txais koob hmoov ntawm Vajtswv. Tswv Yexus qhia cov thwjtim hais tias yuav ua tau Nws ib tug thwjtim ces yuav tsum tswj nws tus kheej, lees hais tias yus twb tuag hauv txojkev txhaum lawm (Mathais 16:24-25).
Npaj rau lub neej ntseeg Yexus thiaj yog kev ua neej raws li Vaj Ntsujplig qhia. Zoo ib yam li tus ceg txiv hmab yuav tsum txuas rau ntawm lub hauvpaus, ces tus ntseeg Yexus kuj yuav tsum txuas rau ntawm Vaj Ntsujplig zoo li ntawd. Vaj Ntsujplig tsis yog pab kom peb kovyeej lub siab nyiam tiamsis ua rau peb muaj lub neej qhia tawm lub neej muaj Vaj Ntsujplig, “lub siab sib hlub, zoo siab, nyob kaj siab lug, ua siab ntev, muaj lub siab dawb siab zoo, zoo siab hlo pab lwm tus, ua siab ncaj”(nqe 22). Yog peb twb vamkhom Vaj Ntsujplig ua neej, ces cia li ua raws li Vaj Ntsujplig qhia.
Tau Vaj Ntsujplig coj thiab ua li Nws qhia yog lub neej tawmtsam tej uas lub siab nyiam ua. Rau qhov lub neej ua li siab nyiam muaj tej kev ntshaw tsis raws li Vaj Ntsujplig nyiam, yog li tus ntseeg Yexus tsis txhob pheej ua ib tug ntseeg tiamsis tseem nyiam kev txhaum. Txhua tus ntseeg Yexus cheemtsum ua kom yus lub neej ntseeg Yexus loj hlob los ntawm kev kawm Vajtswv Txojlus kom paub tus Tswv tej lus qhia, los ntawm kev thov Vajtswv, thiab mloog Vaj Ntsujplig qhia nws ua txhua hnub, ua neeg txo hwjchim, ncaj ncees thiab sib hlub. Timthawj Petus hais tias:”Vajtswv tus uas tau hu nej los ua nws haivneeg, nws yog tus uas dawbhuv, yog li ntawd nej yuav tsum ua nej lub neej kom dawbhuv thiab, Vajtswv txojlus hais tias, nej yuav tsum ua neeg dawbhuv rau qhov kuv yog tus uas dawbhuv.” (I Petus 1:15-16). Tus ntseeg Yexus yuav tsum npaj rau nws lub neej kom tus Tswv tau ntsejmuag.
Thov Vajtswv,
Vajtswv, nyuam yaus ua Koj tsaug uas Koj hlub, thiab tuag txhiv nyuam yaus. Nyuam yaus yuav tswj lub neej kom ua tau tus ntseeg Yexus zoo raws nraim li Vaj Ntsujplig qhia txhua hnub. Amees.
Peb puas tau txaus siab tuag tus neeg txhaum thiab ua lub neej tshiab raws li Vaj Ntsijplig lawm tau?
Nyeem Vajluskub hauv peb lub xyoo: Daniyees 3
Kênh Youtube BHKTHN:
