Klei Aê Diê Blŭ: Galati 5:16‑25
Êlan kliăng: “Hlei pô jing dŏ Krist Yêsu pơ̆ng leh kđeh mbĭt hŏng klei ñu tluh leh anăn klei ñu čiăng ti kyâo bi kal. Tơdah drei dôk hdĭp kyua Yang Mngăt Jăk, brei drei dôk dơ̆ng ƀơ̆ng huă tui si Yang Mngăt Jăk mơh.” (Galati 5:24‑25)
Klei êmuh ksiêm mĭn: Ya jing bruă ngă mơ̆ng knhuah hdĭp tui si kđeh leh anăn ya boh ñu srăng tŭ? Si jing klei hdĭp hlăm Khua Yang? Ya klei drei ngă leh čiăng duh kơ knhuah hdĭp jing phung đăo?
Jing phung đăo, brei drei mđing uêñ bi mđĭ hĭn knhuah hdĭp jing phung đăo grăp hruê. Klei Aê Diê Blŭ brei thâo knhuah hdĭp phung đăo bi kdơ̆ng hŏng knhuah hdĭp kđeh. Êbat tui hlue Khua Yang jing klei tŭ ư djiê leh mnuih hđăp soh jhat, mâo klei lŏ kkiêng mrâo hlăm Khua Yang Yêsu, jing mnuih mrâo leh anăn hdĭp knhuah hdĭp mrâo tui si klei Yang Mngăt Jăk atăt gai. Khua ƀĭng kna Y‑Pôl bi êdah klă leh bruă mơ̆ng kđeh: “klei knhông, klei čhŏ mrŏ, klei knhŭk knhŭl, klei kkuh rup yang, klei jing mjâo, klei bi roh, klei bi msao, klei nač, klei čôñ ăl, klei čuôt klih, klei bi tăng, klei mĭn bi kah phung, klei tluh, klei kpiê ruă, klei ră huă mnăm, leh anăn jih jang klei msĕ snăn.” (êlan 19‑21). Boh srăng tŭ kơ phung čiăng dôk hdĭp nanao hlăm bruă ngă soh jhat tui si kđeh, amâo čiăng kmhal kơ klei soh jing klei amâo srăng dưn ƀuôn ala mtao Aê Diê ôh. Khua Yang Yêsu hưn kơ phung ƀĭng kna Ñu, ênoh tla čiăng dưi jing ƀĭng kna Khua Yang jing brei hngah hĕ klei ñu pô čiăng, tŭ ư bi mdjiê hĕ mnuih soh jhat ñu pô (Y‑Mathiơ 16:24‑25).
Duh kơ knhuah hdĭp phung đăo jing dôk hdĭp tui si klei atăt gai mơ̆ng Yang Mngăt Jăk yơh. Msĕ si adhan boh kriăk ƀâo bi đuôm hŏng phŭn ñu snăn mơh brei phung đăo bi mguôp kjăp mră hŏng Yang Mngăt Jăk. Yang Mngăt Jăk amâo knŏng đru drei dưi hĭn hŏng klei kđeh tluh ƀiădah wăt đru drei bi êdah boh Yang Mngăt Jăk hlăm klei hdĭp mơh, anăn jing “klei khăp, klei hơ̆k mơak, klei êđăp ênang, klei thâo gĭr, klei jăk, klei êmhač, klei sĭt suôr, klei êdu êun, klei djŏ hnơ̆ng” (êlan 22). Tơdah drei dôk hdĭp knang leh kơ Yang Mngăt Jăk, snăn brei drei êbat tui hlue Yang Mngăt Jăk yơh.
Mâo Yang Mngăt Jăk atăt gai leh anăn êbat tui hlue Yang Mngăt Jăk jing sa knhuah hdĭp bi kdơ̆ng hŏng klei kđeh tluh. Kyuadah knhuah hdĭp kđeh mâo klei tluh bi mklăk hŏng Yang Mngăt Jăk, snăn phung đăo amâo dưi lač ôh drei đăo leh kơ Aê Diê ƀiădah ăt dôk hdĭp tui si klei tluh čiăng soh jhat nanao. Grăp čô phung đăo brei duh kơ klei bi mđĭ knhuah hdĭp jing phung đăo ñu pô hŏng klei pioh mmông ksiêm hriăm Klei Aê Diê Blŭ čiăng thâo săng klă klei Ñu mtô lač, hŏng klei wah lač čiăng thâo săng klă klei Khua Yang čiăng, hŏng klei đup gưt kơ Yang Mngăt Jăk čiăng Ñu atăt gai grăp hruê hdĭp luă gŭ, kpă ênô leh anăn thâo khăp. Khua ƀĭng kna Y‑Pêtrôs mtô: “Ƀiădah msĕ si Pô iêô diih jing doh jăk, brei diih pô jing doh jăk msĕ mơh hlăm jih klei diih dôk dơ̆ng ƀơ̆ng huă. Kyuadah Klei Aê Diê Blŭ čih leh, brei diih jing doh jăk, kyuadah Kâo pô jing doh jăk.” (I Y‑Pêtrôs 1:15‑16). Brei phung đăo duh kơ knhuah hdĭp jing phung đăo ñu pô čiăng kơ hŏng klei anăn, Anăn Aê Diê dưi mâo klei guh kơang.
Si ngă drei tŭ ư djiê leh klei hdĭp kđeh leh anăn hdĭp knhuah hdĭp jing phung đăo hlăm Yang Mngăt Jăk leh mơ̆?
Wah lač: Ơ Khua Yang, bi mni kơ Khua Yang khăp leh, săn asei mlei čiăng bi tui klei soh kâo. Akâo Khua Yang brei kâo ƀuăn rơ̆ng bi mjuăt klei hdĭp mngăt kâo hlăm bruă duh kơ knhuah hdĭp jing phung đăo tui si klei atăt gai mơ̆ng Yang Mngăt Jăk grăp hruê.
Dlăng Klei Aê Diê Blŭ hlăm tlâo thŭn: Y‑Đaniel 3
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
