Yakaunpaus 4:4-6
Nqe cim:
“Cov neeg siab phem, nej tsis paub hais tias cov uas ua li neeg ntiajteb ua, yog lawv ua yeebncuab rau Vajtswv. Yog li ntawd, tus uas ua li neeg ntiajteb ua, yog nws txhob txwm ua yeebncuab rau Vajtswv.” (Yakaunpaus 4:4)
Lus nug rau sawvdaws xav:
- Ua phoojywg nrog lub ntiajteb txhais li cas?
- Vajtswv muaj kev xav li cas rau cov uas nyiam lub ntiajteb?
- Peb yuav tsum ua li cas thiaj suav tau hais tias tuaj tus Tswv tog?
Lo lus “ntiajteb” hauv Vajtswv Txojlus muaj ntau lub ntsiab sib txawv, tiamsis siv ntau tshajplaws yog siv los hais txog (1) lub ntiajteb, lub qe av, (2) tibneeg, thiab (3) tej kev coj ntawm neeg ntiajteb uas tawm tsam Vajtswv lub siab nyiam. Nyob hauv zaj no, Yakaunpaus siv raws li lub ntsiab tim 3 los cem cov uas lees hais tias yog tus ntseeg tiamsis ho xyaum coj raws ntiajteb txojkev ua tsis coj raws Vajtswv txojkev.
Yakaunpaus hais tias cov uas nyiam lub ntiajteb yog “cov neeg siab phem” lossis “cov neeg favxeeb” (nqe 4). Lo lus hais hnyav no kos rau peb pom ib daim duab tseebmeej txog cov neeg uas “tsis ncaj ncees hauv txojkev ntseeg”, txhais tau tias tsis muab siab npuab tus Tswv. Vajluskub pheej siv daim duab txijnkawm los hais txog kev sib txuas ntawm tus Tswv thiab Nws cov menyuam. Pawg Ntseeg thiab cov ntseeg Tswv Yexus yog “tus nkauj nyab” thiab Tswv Yexus yog “tus nraug vauv”. Kev sib txuas ntawm tus Tswv thiab cov ntseeg yog kev sib txuas ntawm txojkev hlub, kev ncawg thiab kev ncajncees. Vim li ntawd, thaum ib tug neeg lees hais tias nws yog tus ntseeg Yexus tiamsis tseem ua lubneej li neeg ntiajteb, ces tus ntawd tabtom ntxeev siab rau tus Tswv txojkev hlub. Nyob hauv nqe 4, Yakaunpaus hais tias cov uas zoo li ntawd “yog lawv ua yeebncuab rau Vajtswv”, thiab Vaj Ntsujplig tus uas nyob hauv tus ntseeg lub siab yuav tsis txaus siab thaum pom lawv ua phoojywg nrog lub ntiajteb. Tus Tswv kev khib yog khib dawbhuv los ntawm nplooj siab xav kom Nws cov menyuam ua ib siab hlub Nws los ntawm kev ncaj ncees thiab ruaj ntseg.
Cov ntseeg Yexus yog cov uas nyob hauv lub ntiajteb, tiamsis tsis yog ntiajteb tug. Peb tau nqua hu los koom nrog Vajtswv, tuaj Vajtswv tog, ua lub teeb ci thiab ua ntsev las lub ntiajteb. Nyob hauv nqe 6, Yakaunpaus qhia rau peb muaj kev cia siab thiab txhawb peb zog hais tias Vajtswv yuav pub koob hmoov loj thaum peb paub txo hwjchim. Tus uas txo hwjchim yuav mloog Vajtswv lus, tsis khav theeb thiab tsis nrhiav kev ua kom tau raws li tus kheej siab ntshaw. Ua neej txo hwjchim yuav coj tau peb mus txog qhov uas zeem paub tus kheej tej kev txhaum, paub lees txim thiab thov tus Tswv zam txim.
Thov Vajtswv pab kom peb txhua tus paub txo hwjchim los cuag Nws, cia siab rau Nws, nquag kawm Nws Txojlus, nrhiav ua raws Nws siabnyiam, kom peb tau txais Nws tej koob hmoov npluamias thaum ua neej nyob hauv ntiajteb thiab coj tau lwm tus los cuag Vajtswv.
Thov Vajtswv,
Tus Tswv, thov pab kom nyuam yaus xam pom tus kheej lub neej zoo li cas, kom nyuam yaus txo hwjchim los cuag Koj, txais yuav Koj txoj koob hmoov. Thov pab nyuam yaus paub nyob ruaj khov hauv Koj kom nyuam yaus ua tau lubneej ci tshwm Koj lub hwjchim, pab tau coob tug hauv ntiajteb los nrhiav Ntuj Ceeb Tsheej. Nyuam yaus tuav Yexus Khetos lub npe thov, Amees.
Peb lubneej qhia pom peb tabtom ua phoojywg nrog leejtwg? Peb txiav txim siab qhia tshwm kev tuaj tus Tswv tog licas?
Nyeem Vajluskub hauv peb lub xyoos: Yaxayas 25
Kênh Youtube BHKTHN:
