Klei Aê Diê Blŭ: Y-Yakơ 4:4-6
Êlan kliăng: “Diih jing phung knhông yơh! Diih amâo thâo hĕ klei ngă mah jiăng hŏng lăn ala jing roh hŏng Aê Diê? Kyua anăn hlei pô čiăng jing mah jiăng hŏng lăn ala mjing ñu pô roh hŏng Aê Diê” (Y-Yakơ 4:4)
Klei êmuh ksiêm mĭn: Si mblang jing ngă mah jiăng hŏng lăn ala? Si knuih Aê Diê hŏng phung ngă mah jiăng hŏng lăn ala? Si drei hdĭp čiăng dưi yap jing dôk tĭng Khua Yang?
Boh blŭ “lăn ala” hlăm Klei Aê Diê Blŭ yua hŏng lu klei mblang mdê mdê, ƀiădah lu hĭn jing lač kơ (1) boh lăn; (2) anak mnuih: (3) êlan hdră, knuih hdĭp lăn ala, mdê hŏng klei Aê Diê čiăng. Hlăm trăn Klei Aê Diê Blŭ anei, Y-Yakơ yua boh blŭ “lăn ala” hlue si klei mblang tal 3 čiăng lač kơ phung lač kơ diñu pô jing Phung đăo kơ Krist ƀiădah lŏ bi mguôp hŏng lăn ala hrô kơ bi mguôp hŏng Khua Yang.
Y-Yakơ iêô phung ngă mah jiăng hŏng lăn ala jing “phung knhông” (êlan 4). Boh blŭ kjham anei lač kơ sa rup klă sĭt kơ phung “amâo sĭt suôr hlăm mngăt”, jing amâo sĭt suôr hŏng Khua Yang. Klei Aê Diê Blŭ khăng yua rup dua ung mô̆ čiăng lač kơ klei bi mguôp Khua Yang hŏng phung ƀuôn sang Ñu. Phung Sang Aê Diê, phung đăo kơ Khua Yang Yêsu, dưi lač jing “mô̆” bi Aê Diê jing “ung”. Klei bi mguôp plah wah Aê Diê hŏng phung đăo kơ Ñu jing klei bi mguôp klei khăp, jĕ giăm, sĭt suôr. Kyua anăn tơdah sa čô mnuih yap ñu pô jing mnuih đăo kơ Krist ƀiădah lŏ hdĭp hlue si knuih hdĭp lăn ala, pô anăn amâo sĭt suôr ôh hlăm klei khăp yuôm bhăn hŏng Aê Diê. Hlăm êlan 5, Y-Yakơ lač kơ phung snăn jing “pô roh hŏng Aê Diê”, leh anăn Yang Mngăt Jăk Aê Diê dôk hlăm ai tiê phung đăo kơ Krist amâo tŭ ư ôh tơdah ƀuh diñu ngă mah jiăng hŏng lăn ala. Klei Aê Diê trih jing klei trih doh jăk hŏng klei čang hmăng phung ƀuôn sang Ñu sa ai tiê sĭt suôr, tliêr kjăp, khăp kơ Ñu.
Phung đăo kơ Krist jing phung hdĭp ti krah lăn ala ƀiădah amâo djŏ jing dŏ lăn ala ôh. Drei mâo klei iêô čiăng bi mguôp hŏng Aê Diê, dôk tĭng Khua Yang, jing hra leh anăn klei mngač kơ lăn ala. Hlăm êlan 6, Y-Yakơ brei drei klei čang hmăng leh anăn klei mđĭ ai snei Khua Yang brei klei pap prŏng prĭn kơ drei tơdah drei thâo luă gŭ. Phung luă gŭ srăng gưt kơ klei Aê Diê čiăng hrô kơ ngă mgao, knŏng duah klei bi mâo klei pô čiăng. Hdĭp luă gŭ srăng atăt drei kơ klei thâo kral klei soh pô, mơ̆ng anăn bi êdah hlăm klei kmhal klei soh leh anăn akâo kơ klei Khua Yang pap brei.
Akâo kơ Khua Yang đru grăp čô drei luă gŭ êran nao kơ Khua Yang, jih ai tiê đăo knang kơ Ñu, kriăng hriăm Klei Aê Diê Blŭ, sĭt suôr wah lač duah klei Ñu čiăng, mơ̆ng anăn drei mâo klei pap êbeh dlai tơdah hdĭp ti krah lăn ala, mâo klei găl ba phung ka đăo hriê kơ Aê Diê.
Knuih hdĭp drei brei ƀuh hŏng hlei pô drei dôk ngă mah jiăng? Si drei bi êdah klei čuăn ai tiê dôk tĭng Khua Yang?
Wah lač: Ơ Khua Yang, akâo kơ Ih đru kâo ƀuh boh klei kâo ară anei leh anăn luă gŭ êran nao kơ Khua Yang, akâo kơ klei pap Ih brei. Akâo kơ Ih đru kâo păn kjăp kơ Ih grăp hruê hlăm klei kpĭ mjuăt hlăm mngăt, čiăng hdĭp ti krah lăn ala anei mtrang mngač klei guh kơang Ih, đru kơ lu mnuih hlăm lăn ala duah Ƀuôn Ala Mtao. Kâo wah lač hlăm anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y-Êsai 25
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
