Klei Aê Diê Blŭ: I Y-Pêtrôs 4:1-2
Êlan kliăng: “Snăn kyuadah Krist tŭ leh klei knap mñai hlăm kđeh, brei diih mprăp diih pô hŏng klei mĭn msĕ snăn…”(I Y-Pêtrôs 4:1a)
Klei êmuh ksiêm mĭn: Ya ngă phung đăo kơ Khua Yang brei tŭ klei knap mñai hlue si klei Krist bi hmô leh? Ya klei bi êdah kơ mnuih tŭ klei knap mñai kyua Anăn Khua Yang? Ya drei mâo tơdah hdĭp knap mñai hlue si klei Krist bi hmô?
Klei sa čô phung đăo bi êdah si knuih ti anăp klei amâo mtăp mđơr, knap mñai, amâodah klei lông dlăng truh kơ pô, srăng brei thâo hnơ̆ng bi mguôp sĭt suôr pô anăn hŏng Krist. Khua ƀĭng kna Y-Pêtrôs bi mklă, mnuih tui hlue Khua Yang brei tŭ klei knap mñai kyua Anăn Ñu jing klei brei ngă (êlan 1). Khua Yang Yêsu tŭ klei knap mñai ti kyâo bi kal kyua klei khăp, snăn drei ăt kyua klei khăp mơh srăng pap brei kơ pô ngă luč liê kơ drei. Lu blư̆ luč prăk mah, klei hưn kơ pô čiăng djă pioh klei đăo kơ pô mkăn. Mâo mơh tăp năng gĭr, tŭ klei amâo dưi čiăng bi mtlaih mngăt pô mkăn.
Klei mĭn grăp čô anak mnuih, jih jang čiăng sơăi mâo klei arăng mpŭ leh anăn mă bruă kơ pô. Ƀiădah phung đăo kơ Khua Yang brei tui si Khua Yang bi hmô leh “Snăn kyuadah Krist tŭ leh klei knap mñai hlăm kđeh, brei diih mprăp diih pô hŏng klei mĭn msĕ snăn…”, jing phung đăo kơ Krist brei mprăp tŭ klei knap mñai hŏng klei arăng ngă amâo mtăp mđơr, leh anăn tŭ klei arăng ktư̆ juă hlue si Pô drei đăo bi hmô leh. Ƀiădah bruă drei tŭ klei knap mñai kyua Anăn Khua Yang srăng amâo jing hơăi mang ôh. Kyua sa čô mnuih srăng tŭ klei knap mñai, tŭ klei arăng mưč mač, tŭ klei amâo dưi kyua Anăn Khua Yang bi mklă pô anăn amâo hmăi kyua klei tluh čiăng mơ̆ng lăn ala anei hŏng klei mgao ôh. Kyuadah “hlei pô tŭ leh klei knap hlăm kđeh amâo lŏ ngă soh ôh”, leh anăn klei diñu dôk mđing jing klei jăk mơak hlŏng lar hŏng Krist (êlan 1).
Krist bi ti gŭ pô, tuh êrah kyua klei soh anak mnuih, kyua anăn phung đăo kơ Krist tơdah đăo leh kơ Khua Yang, tŭ leh ƀaptem jing ƀuăn amâo hlue si klei lăn ala čiăng ôh, ƀiădah hdĭp kơ Khua Yang, tơdah djiê snăn ăt srăng djiê kyua Khua Yang. Brei mprăp čiăng tuôm hŏng bruă tŭ klei knap mñai hlăm klei hdĭp, wăt asei mlei, knuih, klei mơak, ngăn prăk truh kơ mngăt ai tiê tơdah adôk hdĭp hlăm kđeh anei (êlan 2).
Hlăm klei hdĭp tui hlue Khua Yang, lu blư̆ drei ngă bruă jăk ƀiădah arăng ăt ngă jhat, mčeh luar, ƀuah ăl, tăp năng tŭ klei luč kơ ngăn prăk, amâodah tŭ klei amâo dưi čiăng djă pioh klei đăo…Ƀiădah drei mâo klei mđĭ ai kyua tơdah asei mlei drei tŭ klei ruă êka, klei hdĭp knap mñai truh jih hnơ̆ng kơ klei luč čang hmăng, snăn ênoh yuôm sĭt drei dưi bi mklă leh, leh anăn “Tơdah leh Ñu lông dlăng kâo, kâo srăng jing doh msĕ si mah” (Y-Yôp 23:10). Akâo kơ Khua Yang đru drei srăng tŭ klei knap mñai hlue si Khua Yang bi hmô, sĭt suôr tơl truh kơ djiê čiăng mâo mă đuôn mtao klei hdĭp hlŏng lar (Klei Bi Êdah 2:10).
Si knuih leh anăn ai tiê drei mprăp tŭ klei knap mñai tui klei Khua Yang bi hmô ?
Wah lač: Ơ Khua Yang khăp hơiêng. Bi mni kơ Khua Yang Yêsu tŭ klei knap mñai kyua kâo, akâo kơ Ih thiăm ai ktang mrâo, pŏk ai tiê, pŏk klei thâo čiăng kơ kâo dlăng klei tŭ knap mñai hlue si klei Ih bi hmô jing klei čiăng êdi hlăm klei wĭt kơ Ƀuôn Ala Mtao. Akâo kơ Ih đru kâo luă gŭ, bi ti gŭ pô, amâo hlue si klei kđeh čiăng ôh, ƀiădah hdĭp hlue si klei Khua Yang čiăng, bi guh kơang Anăn Ih ti krah lăn ala.. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: I Kôrantô 15
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
