I Pêtrôs 4:1-2
“Yêsu Krist iŏk kơdih tơdrong pơmat-tat yua kơ bơ̆n, na bơ̆n kư̆m chu iŏk tơdrong pơmat thoi Sư mơ̆n…” (I Pêtrôs 4:1a)
Nơ̆r jet tơchĕng pơwao:
– Yua kơ kiơ bơngai lui kơ Kră Yang athei chu iŏk pơmat thoi Kră Yang Yêsu Krist?
– Bơngai mă chu iŏk pơmat yua kơ anăn Kră Yang sư gô đei kiơ?
– Lu bơ̆n đei kiơ dah arih chu iŏk pơmat kiơ̆ thoi kơmĭl ‘Bok Krist?
Minh tơdrong bơngai lui kơ Yêsu Krist đei tơ’bôh jơhngơ̆m sư thoi yơ ‘bơ̆t anăp đe pơm ưh kơ trŏ, tơdrong pơgŏ, pơđep dah mă tơdrong pơlong lăng truh kơ bơ̆n, noh gô tơbăt ăn kơ tơdrong bơ̆n pơgơ̆p tơ’bưh hơdai hăm Yêsu Krist dang yơ. ‘Bok Pêtrôs khan hơđăl, bơngai kiơ̆ Kră Yang kư̆m athei chu iŏk tơdrong pơmat thoi Kră Yang mơ̆n (trong 1). Kră Yang Yêsu chu iŏk tơdrong pơmat tơ kơpal ‘long pơglang yua kơ Sư ‘mêm mơnat, na lu bơ̆n kư̆m yua kơ tơdrong ‘mêm na mơnat ăn kơ bơngai mă pơm pơrăm bơ̆n. Truh tơ jên tơmam, akâu jăn hăm anăn wă kơ bơwei đon lui minh ‘nu bơngai bu ‘noh. Phŏ sư kăl kơ đei jơhngơ̆m chơ̆n, chu lê̆ jei đe yua wă kơ bơhngol đe gơh klaih.
Tơdrong tơchĕng kon bơngai bơ̆n đĭ đăng, mă bu bu kư̆m wă kơ lơ bơngai pơyom păng bơ̆jang kơ bơ̆n ngăl. Mălei bơngai lui kơ Kră Yang athei rok kiơ̆ kơmĭl Kră Yang “Yêsu Krist iŏk kơdih tơdrong pơmat-tat yua kơ bơ̆n, na bơ̆n kư̆m chu iŏk tơdrong pơmat thoi Sư mơ̆n.” wă khan bơngai lui kơ Yêsu athei chu iŏk tơdrong pơmat mă khan tơdrong noh ưh kơ trŏ kơ bơ̆n pŭ iŏk, păng đe pơm pơmat thoi Kră Yang mă Tơ’ngla bơ̆n oei lui. Mălei tơdrong bơ̆n chu pơmat yua kơ Anăn Kră Yang ưh kơ đei hiong tôch đĕch ôh. Yua kơ minh ‘nu bơngai chu iŏk pơmat, chu iŏk đe pơ’brơh mơlâu, chu iŏk jei đe yua kơ Anăn Kră Yang tơbăt sĭt bơngai noh ưh kơ đei hưch ham lăm chăl ‘nâu hăm ưh kơ pơang. Yua kơ “Bơngai bu chu iŏk tơdrong pơmat, bơngai noh ưh pă pơm yoch boih”, păng trong mă sư oei năm tơ anăp ‘noh wă iŏk pŭn hiôk ling lang lăm ‘Bok Krist (trong 1).
‘Bok Krist tơ jur bơih akâu Sư kơdih, tuh pham yua kơ bơngai yoch, lei na bơngai lui mă sơng iŏk bơih Kră Yang, chu pơm ‘Batem wă khan đei pơkă ưh pă pơm kiơ̆ dôm tơdrong kiơ̆ kơ bơ̆n wă lăm teh đak, mălei arih yua kơ Kră Yang, mă lôch kư̆m gô mơ̆ng kơ Kră Yang. Athei lê̆ wă tơ’bơ̆p tơdrong pơmat lăm tơdrong arih, đơ̆ng akâu jăn, tơdrong arih kơdih, tơdrong chơt hiôk, jên tơmam truh tơ gah bơhngol kơplah oei arih lăm sĕch akar ‘nâu (trong 2)
Lăm tơdrong arih bơ̆n kiơ̆ Kră Yang, phŏ mă lu bơ̆n pơm tơdrong ‘lơ̆ng mălei oei đei tơdrong sơ’ngon truh, đe pơ’brơh, chrih pơma, phŏ kư̆m truh tơ hiong jên tơmam, chu iŏk thuơ đe pơrăm yua wă kơ wei đon lui v.v… Mălei lu bơ̆n đei tơdrong pơlung yua kơ dah akâu jăn bơ̆n chu pơmat, chăl arih đei tơdrong truh tih dêh dang pă hơmĕng, na tơdrong gĭt kăl lu bơ̆n tơpă gơh tơ’bôh sĭt, păng “Mă-lei Kră Yang băt trong inh nơnăm; kơplah Kră Yang pơlong lăng inh, inh gô lĕch thoi maih” (Jop 23:10). Apinh Kră Yang tơgŭm bơ̆n kĕ chu pŭ iŏk pơmat thoi kơmĭl Kră Yang, tơnăp kơjăp truh lôch wă kơ iŏk agăl pơkao tơdrong arih ling lang (Tơdrong Tơ’bôh 2:10).
Ơ Kră Yang mă ‘mêm kơeng. Bơnê kơ Kră Yang Yêsu chu iŏk pơmat bơih yua kơ inh, apinh Ih ăn kơ inh jơhngơ̆m pran ‘nao, pơih jơhngơ̆m, đon tơchĕng inh wă kơ inh lăng ‘bôh tơdrong chu pơmat kiơ̆ kơmĭl Ih ‘noh tơdrong gĭt kăl lăm trong năm truh tơ Pơlei ‘Lơ̆ng. Apinh Ih tơgŭm inh iơ̆m dim, iŏk đon ala, ưh chu kiơ̆ kơ sĕch akar wă, mălei arih kiơ̆ thoi Kră Yang lăp đon, ưang Anăn Kră Yang lăm teh đak âu. Yua anăn Kră Yang Yêsu Krist, Amen.
Lu bơ̆n chu iŏk pơmat kiơ̆ kơmĭl Kră Yang hăm jơhngơ̆m bơ̆n thoi yơ?
Đŏk Sơ̆p Hla bơar ‘Bok Kei-Dei lăm pêng sơnăm: I Kôrintô 15
Kênh Youtube BHKTHN:
