Klei Aê Diê Blŭ: Y-Mathiơ 10:21-23.
Êlan kliăng: “Tơdah lăn ala bi êmut kơ diih, brei diih thâo kơ lăn ala bi êmut leh kơ Kâo êlâo” (Y-Yôhan 15:18).
Klei êmuh ksiêm mĭn: Khua Yang Yêsu brei thâo hlei jing phung bi êdah klei bi êmŭt hŏng phung khua ƀĭng kna? Ya ngă arăng bi êmut kơ diñu snăn? Khua Yang mtô phung khua ƀĭng kna si srăng ngă sĭt arăng bi êmut? Ya klei mđĭ ai kơ drei mơ̆ng trăn Klei Aê Diê Blŭ anei?
Klei mklăk hlăm trăn Klei Aê Diê Blŭ anei jing leh phung khua ƀĭng kna Khua Yang dưi tiŏ nao hiu hưn “Ƀuôn ala mtao adiê giăm truh leh” (êlan 7), mĭndah diñu srăng dưi kkuh drông hŏng klei siă suôr leh anăn klei diñu hiu hưn srăng dưi mđing hmư̆ ƀiădah Khua Yang hưn brei diñu răng diñu srăng tlă anăp hŏng klei arăng ngă jhat leh anăn bi êmut kyua Anăn Khua Yang.
Tal sa, diñu srăng tŭ klei gŏ sang diñu pô bi êmut, anăn năng ai jing ayŏng adei amâodah amĭ ama, anak čô diñu. Klei bi êmut anei amâo djŏ knŏng amâo djŏ sa klei đăo ôh ƀiădah lŏ jing kyua klei bi kah mbha êlam, diñu tŭ klei gŏ sang diñu ba jao čiăng arăng mdjiê kyua gŏ sang dlăng diñu msĕ si djiê leh hlăk êjai diñu jing ƀĭng kna Khua Yang Yêsu. Tal dua, ala ƀuôn srăng bi êmut kơ diñu. Amâo djŏ ôh jih jang grăp čô mnuih srăng bi êmut sơaĭ ƀiădah Khua Yang Yêsu čiăng kơ diñu thâo srăng mâo lu klei bi êmut mơ̆ng lu mnuih hlăm ala ƀuôn, phung ƀĭng kna Ñu srăng amâo dưi tlaih ôh mơ̆ng klei arăng bi êmut anei kyua amâo mâo ôh anôk êđăp ênang kơ diñu.
Khua Yang Yêsu mđĭ ai phung ƀĭng kna tŭ klei arăng bi êmut msĕ si sa kdrêč mơ̆ng bruă hiu hưn Klei Mrâo Mrang Jăk čiăng dôk kjăp nanao hlăm djăp boh klei, kyua “hlei pô gĭr tơl knhal tuč srăng tlaih”. Khua Yang Yêsu čiăng kơ diñu đăm ruah klei bi kdơ̆ng hŏng klei amâo săng amâodah gĭr tŭ hŏng klei mluk ôh sĭt arăng ngă jhat, bi kdơ̆ng. Diñu dưi đuê̆ mơ̆ng anôk arăng ngă jhat čiăng nao kơ anôk mrâo, sa anôk mrâo lŏ dơ̆ng mă bruă kơ Khua Yang leh anăn hiu hưn Klei Mrâo Mrang Jăk. Hlăk êjai diñu nao mơ̆ng anôk anei truh kơ anôk mkăn čiăng hiu hưn Klei Mrâo Mrang Jăk, diñu pô dôk đru kơ hruê Khua Yang hnưm lŏ hriê msĕ si Klei Aê Diê Blŭ čih leh hlăm Y-Mathiơ 24:14 “Leh anăn arăng srăng mtô klei mrâo mrang jăk kơ ƀuôn ala mtao anei tar ƀar lăn ala jing klei hưn kơ jih jang găp djuê mnuih. Hlăk anăn hruê knhal tuč srăng truh.”
Hruê anei, lu mnuih hlăm phung drei ăt tlă anăp hŏng lu klei bi êmut mơ̆ng gŏ sang leh anăn ala ƀuôn hlăk drei tui hlue Khua Yang leh anăn mă bruă kơ Ñu. Mâo lu mmông drei ƀuh hjăn păn kyua hlăm gŏ sang knŏng hjăn pô đăo kơ Khua Yang, amâodah knŏng hjăn pô jing mnuih đăo kơ Khua Yang ti anôk mă bruă, sang hră, phung sang riêng gah… Ƀiădah drei dưi mđĭ ai kyua drei thâo sĭt Khua Yang thâo săng kơ drei kyua Ñu ăt tuôm tŭ leh klei arăng bi êmut leh anăn tŭ klei arăng ngă jhat lu hĭn kơ drei. Khua Yang mđĭ ai drei brei sĭt suôr krơ̆ng kjăp klei đăo leh anăn hơĭt ai tiê mă bruă kơ Khua Yang, hiu hưn Klei Mrâo Mrang Jăk hŏng djăp hdră êlan truh knhal tuč dưi mâo klei pah mni jing klei hdĭp lă lar hlăm Ƀuôn Ala Mtao guh kơang.
Drei tuôm thâo mơ̆ klei Khua Yang bi juh sĭt arăng bi êmut kyua klei đăo?
Wah lač: Ơ Khua Yang, kâo bi mni lač jăk kơ Ih kyua Ih thâo jih leh anăn thâo săng kơ ya klei bi êmut kâo dôk gĭr tŭ. Akâo kơ Ih thiăm klei ktang kơ kâo čiăng kâo dưi krơ̆ng kjăp klei đăo tui hlue Khua Yang truh knhal tuč.
Dlăng Klei Aê Diê Blŭ hlăm tlâo thŭn: Klei Mmuñ Hđăp 130:1-8; 131:1-3; 132:1-18; 133:1-3; 134:1-3
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
