Mathais 10:21-23
Nqe cim:
“Yog neeg ntiajteb ntxub nej, nej yuav tsum nco ntsoov hais tias, lawv twb xub ntxub kuv ua ntej lawm” (Yauhas 15:18).
Lus nug rau sawvdaws xav:
- Tswv Yexus qhia hais tias leejtwg yuav ntxub cov timthawj?
- Vim licas lawv raug ntxub li ntawd?
- Tus tswv qhia cov timthawj ua dabtsi thaum raug luag ntxub?
- Peb tau txhawb zog licas thaum kawm txog ntu Vajluskub no?
Qhov txawv nyob hauv ntu Vajluskub no, yog thaum cov thwjtim tau tus Tswv txib mus qhia zaj uas hais txog “Ntuj Ceebtsheej twb los ze lawm” (nqe 7), xav hais tias lawv yuav tau sawvdaws zoo siab txais tos, thiab zaj uas lawv qhia yuav tau luag ua tib zoo mloog, tiamsis tus Tswv ceebtoom hais tias, lawv yuav raug luag tsimtxom thiab ntxub vim tus Tswv lub npe.
Tim ib, lawv raug lawv tsevneeg ntxub, tej zaum yog tej kwvtij lossis lawv niam lawv txiv, lawv tej menyuam. Qhov kev sib ntxub no tsis yog tsuas ntxub vim txawv txojkev ntseeg xwb, tseem yog ib txojkev sib cais txaus ntshai heev; lawv yuav raug lawv tsevneeg ntes coj mus cob rau luag tua, vim thaum lawv los ua Tswv Yexus thwjtim lawm, ces tsevneeg suav hais tias lawv twb tuag lawm. Tim ob, lawv raug tebchaws ntxub. Tsis yog txhua tus puavleej ntxub lawv, tiamsis Tswv Yexus xav kom lawv paub hais tias, yuav muaj ntau hom neeg ntxub lawv, cov thwjtim yuav khiav tsis dhau tej kev ntxub no, vim yuav tsis muaj chaw zoo rau lawv qab siab ua neej nyob.
Tswv Yexus txhawb cov timthawj lub zog, kom lawv saib tej kev ntxub ntawd zoo li ib feem ntawm lub luag haujlwm tshajtawm Txojmoo Zoo, kom lawv ua taus siab ntev txhua lub tsamthawj, vim “tus uas ua siab ntev mus txog thaum kawg tus ntawd yuav dim”. Tswv Yexus xav kom lawv txhob tawmtsam, tiamsis kuj txhob nyob tos luag tuaj tsimtxom lawv. Lawv yuav tsum tawm hauv qhov chaw uas raug tsimtxom mus rau lwm qhov chaw tshiab, kom tau ua tus Tswv haujlwm thiab qhia Txojmoo Zoo. Thaum lawv khiav mus rau ub rau no tshajtawm Txojmoo Zoo, yog lawv tabtom ua rau hnub tus Tswv rov los, ntxov los txog raws li tus Tswv tej lus hais hauv Mathais 24:14 “Thaum muaj neeg mus qhia Txojmoo Zoo uas hais txog Ntuj Ceebtsheej mus thoob qab ntuj thiab ua timkhawv rau txhua haivneeg paub lawm, ces thaum ntawd twb yuav txog lub sijhawm kawg.”
Niaj hnub nimno, peb muaj coob tug kuj raug lub tsevneeg lossis tebchaws ntxub thaum peb raws tus Tswv qab thiab ua Nws haujlwm. Ntau zaug peb hnov tu siab vim tsevneeg tsuas muaj yus tib leeg los ntseeg, lossis nyob hauv chaw ua haujlwm, chaw kawm ntawv, chaw nyob,… tsuas muaj yus tib leeg thiaj yog tus ntseeg. Tiamsis peb tau tus Tswv txhawb zog, vim paub hais tias Tswv Yexus paub peb tej kev nyuaj siab, rau qhov Nws twb raug luag ntxub thiab tsimtxom ntau dua peb los lawm. Thov tus Tswv txhawb peb lub zog, muab siab rau ntseeg thiab ua siab ntev ua tus Tswv haujlwm mus txog hnub kawg, kom tau nqi zog uas yog txojsia ntev dhawv mus ibtxhis nyob saum Ntuj Ceebtsheej.
Peb puas tau tus Tswv txhawb zog thaum raug luag ntxub vim kev ntseeg lawm tau?
Vajtswv, nyuam yaus ua Koj tsaug, vim Koj paub thiab nkag siab tej kev ntxub uas nyuam yaus tabtom tiv. Thov txhawb nyuam yaus lub zog tuav ruaj kev ntseeg, raws Koj qab mus txog hnub kawg. Amees.
Nyeem Vajluskub hauv peb lub xyoos: Phau Ntawv Nkauj 130:1-134:3
Kênh Youtube BHKTHN:
