II Thexalaunikes 3:14-18
Nqe cim:
“Tiamsis nej tsis txhob ntxub nws, nej yuav tsum ntuas nws ib yam li nej ntuas nej tej kwvtij.” (II Thexalaunikes 3:15)
Lus nug rau sawvdaws xav:
– Pawg Ntseeg cheemtsum muaj txoj cai tswj zoo li cas rau cov neeg uas tsis ua raws li Vajtswv Txojlus qhia?
– Tus cwjpwm thiab homphiaj tswj yuav tsum ua zoo li cas?
– Timthawj Paulus ua qauv li cas txog kev tswj hauv txojkev hlub?
Thawj qhov thaum muab txoj cai tswj, Timthawj Paulus kuj siv cov lus “ntuas” nruj los ntawm txojkev hlub rau cov neeg “tub nkeeg, nyob dawb xwb, tsis ua ib yam haujlwm dabtsi li” (nqe 11). Tiamsis yog cov neeg ntawd tsis mloog tej lus ntuas hauv tsab ntawv uas yog Vajtswv tej lus, ces Pawg Ntseeg “tsis txhob mus nrog tus ntawd ua ke, kom nws paub txajmuag rau tej uas nws tau ua los lawm” (nqe 14). Vajtswv cov menyuam “tsis txhob mus nrog tus ntawd ua ke”, txhais tau tias yeej koom tsis tau nrog cov neeg ua li. Qhov uas lawv nyob ib leeg yuav pab kom lawv paub txajmuag thiab zeem paub qhov uas lawv ua tsis tau zoo, xav yuam kev, thiab ua tab kaum Vajtswv tes haujlwm, lawv thiaj tig los lees txim kom ua tau ib tug neeg muaj nqis rau tus Tswv.
Txawm li ntawd los, cai tswj tsis yog txiav txim, laij tawm nws tawm hauv Pawg Ntseeg mus, “tsis txhob ntxub nws, nej yuav tsum ntuas nws ib yam li nej ntuas nej tej kwvtij” (nqe 15). Txhua tus ntseeg cheemtsum koom siab rau txojkev dawbhuv, ncaj ncees nrog rau kev hlub, kom txhim tsa tau Pawg Ntseeg yog qhov chaw txuas kho cov neeg puas siab, cov neeg txhaum uas muaj lub siab xav tias raug laij tawm.
Peb cheemtsum zeem paub tias nov yog ib kob tsovrog sab ntsujplig, nyob tom qab yog dab ntxwgnyoog kev tawmtsam, nrog rau yus tus yamntxwv txhaum, nws tsis yog txoj cai tswj neeg thiab neeg xwb. Cheemtsum muaj cwjpwm txiav tu nrho, tsis zam, tsis koom nrog txojkev tub nkeeg, tsis ua haujlwm, faib Pawg Ntseeg. Tiamsis peb ib leeg kuj yuav tau thov Vajtswv tas siab pab rau ib leeg ib yam li Timthawj Paulus, “Thov tus Tswv uas yog lub hauvpaus ntawm txojkev kaj siab, pub txojkev kaj siab rau nej txhua lub sijhawm thiab txhua qhov uas nej mus. Thov tus Tswv nrog nraim nej sawvdaws nyob” (nqe 16). Tsis txhob hnov qab yus cov kwvtij thaum thov Vajtswv, kom Vajtswv tus uas yog kev kaj siab nrog nraim, ntuas qhia, txhawb zog rau lawv los ntawm ntau lub tswvyim. Yog tsis muaj Vajtswv tus uas yog kev kaj siab nyob nrog, ces dab ntxwgnyoog, lub siab dub yuav tawmtsam, txeeb tau peb tawm hauv Vajtswv tsevneeg mus.
Cov lus xaus tsab ntawv, Timthawj Paulus tas siab taij thov “Tswv Yexus Khetos foom koob hmoov rau nej sawvdaws”, tsis xaiv leejtwg ntsejmuag, qhia paub Paulus lub siab, qhia kevcai tswj tiamsis yuav tau tswj los ntawm kev hlub, tsis zoo li tej neeg ntiajteb thaum hais txog cai tswj ces hais txog qhov laij tawm. Cia li ua neej sib hlub kom coj tau yus cov kwvtij los ntseeg Vajtswv, tsis txhob tso yus cov kwvtij tawm npoj mus.
Thov Vajtswv,
Vajtswv tus uas muaj kev hlub, thov qhia nyuam yaus zeem paub tej uas nyuam yaus ua tsis tau thiab lees txim. Thov Koj pab kom nyuam yaus niaj hnub thov Vajtswv pab thiab muaj tus cwjpwm txiav tu nrho kev txhaum, tiamsis muaj kev hlub tus neeg txhaum kom coj tau lawv rov los cuag Koj. Nyuam yaus tuav Tswv Yexus lub npe thov, Amees.
Peb muaj kev xav li cas dhau los ntawm Timthawj Paulus cov lus qhia txog txoj cai tswj kev hlub?
Nyeem Vajluskub hauv peb lub xyoo: Yausuas 1
Kênh Youtube BHKTHN:
