Klei Aê Diê Blŭ: II Têsalônik 3:14-18
Êlan kliăng: “Đăm yap diñu msĕ si roh ôh, ƀiădah brei mtô kơ diñu msĕ si kơ phung ayŏng adei.” (II Têsalônik 3:15)
Klei êmuh ksiêm mĭn: Si klei mjuăt brei Phung Sang Aê Diê mâo hŏng phung amâo gưt klei mtô hlăm Klei Aê Diê Blŭ? Si knuih leh anăn klei kñăm čiăng hriăm mjuăt brei mâo? Si Khua ƀĭng kna Y‑Pôl bi hmô kơ ai tiê kpĭ mjuăt hlăm klei khăp?
Êlâo kơ ba mdah klei kpĭ mjuăt, Khua ƀĭng kna Y‑Pôl ăt yua leh klei blŭ “mtô leh anăn mtă” kjăp êjai leh anăn khăp êjai hŏng phung “amâo mă bruă ôh, ƀiădah hiu yăl dliê hơăi mang kơ bruă arăng” (êlan 11). Ƀiădah tơdah pô anăn ăt kăn gưt hlue si klei mtă hlăm hră anei, anei jing Klei Aê Diê Blŭ, snăn Phung Sang Aê Diê “đăm bi mguôp hŏng diñu ôh, čiăng kơ diñu hêñ” (êlan 14). Phung anak Aê Diê brei mkhư̆ đăm jĕ giăm, “đăm bi mguôp ôh” jing đăm ngă bruă mbĭt hŏng diñu ôh. Năng ai klei dôk hjăn păn srăng đru diñu thâo hêñ leh anăn ƀuh klei kƀah, klei mĭn soh čhuai hŏng bruă diñu pô ngă bi kgăn bruă Aê Diê, leh anăn kmhal hĕ čiăng jing mnuih tŭ dưn kơ Sang Aê Diê.
Khădah snăn, klei kpĭ mjuăt amâo kñăm bi kmhal, lăm lui ayŏng adei pô mơ̆ng Phung Sang Aê Diê ôh “Đăm yap diñu msĕ si roh ôh, ƀiădah brei mtô kơ diñu msĕ si kơ phung ayŏng adei” (êlan 15). Grăp čô đăo brei sa ai tiê hlăm klei doh jăk, kpă ênô mbĭt hŏng klei khăp, čiăng mkŏ mjing Phung Sang Aê Diê jing anôk bi hlao mnuih mâo ai tiê mčah, mâo klei hdĭp soh čhuai hrô kơ klei mĭn bi lăm lui hdơ̆ng pô.
Brei drei thâo anei jing sa klei bi blah hlăm mngăt, ti tluôn jing klei Satan mplư hŏng klei kđeh čiăng amâo djŏ knŏng jing hdră kpĭ mjuăt plah wah mnuih hŏng mnuih ôh. Brei drei mâo knuih kjăp, amâo phưi tha, amâo bi mguôp ôh hŏng klei alah, klei čang guôn arăng đru, klei bi kah êpul hlăm Phung Sang Aê Diê. Ƀiădah drei ăt jih ai tiê wah lač kơ hdơ̆ng pô hlue si klei Khua ƀĭng kna Y‑Pôl bi hmô, “Akâo kơ Khua Yang klei êđăp ênang brei kơ diih klei êđăp ênang nanao hlăm jih jang klei. Brei Khua Yang dôk mbĭt hŏng jih jang diih” (êlan 16).
Đăm wơr ôh ayŏng adei pô hlăk êjai wah lač čiăng kơ Khua Yang êđăp ênang dôk mbĭt, mñă, mtô bi hriăm, mđĭ ai diñu hŏng lu hdră mdê mdê. Tơdah amâo mâo Khua Yang êđăp ênang dôk mbĭt, snăn Satan yơh, hŏng knuih mgao hŏng klei amâo êđăp ênang srăng mplư, mă jih phung drei mơ̆ng Sang Aê Diê.
Hlăm klei blŭ knhal jih hră, Khua ƀĭng kna Y‑Pôl akâo “Brei klei pap mơ̆ng Khua Yang drei Yêsu Krist dôk mbĭt hŏng jih jang diih”, amâo kah mbha hlei pô ôh, lač kơ ai tiê khua ƀĭng kna năng mpŭ, ñu mtô kpĭ mjuăt ƀiădah brei kpĭ mjuăt hlăm klei khăp, đăm ôh msĕ si phung hlăm lăn ala anei tơdah lač kơ klei kpĭ mjuăt jing lač kơ klei lăm lui. Brei hdĭp bi khăp čiăng iêô jak ayŏng amai adei pô lŏ wĭt hŏng Khua Yang amâo djŏ ôh klư̆ ayŏng adei pô mơ̆ng êpul êya.
Ya drei bi mĭn mơ̆ng klei Khua ƀĭng kna Y‑Pôl mtô kơ ai tiê kpĭ mjuăt hlăm klei khăp?
Wah lač: Ơ Khua Yang klei khăp, akâo kơ Ih mtô kâo thâo kơ klei soh kâo pô čiăng kmhal. Akâo kơ Ih đru kâo thiăm klei wah lač leh anăn mâo knuih khuăt hŏng klei soh, ƀiădah khăp kơ phung ngă soh čiăng đru diñu thâo kmhal lŏ wĭt kơ Khua Yang. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y‑Yôsuê 1
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
