2 Xwmtxheej Vajntxwv 33:10-17
Nqe cim:
“Yog lawv thov kuv thiab lawv hloov dua siab, tso lawv tej kev phem kev qias tseg, ces kuv yuav nyob saum ntuj mloog lawv tej lus thov, zam txim rau lawv thiab pub lawv lub tebchaws kom rov vammeej dua.” ( 2 Xwmtxheej Vajntxwv 7:14)
Lus nug rau sawvdaws xav:
– Vim li cas Vajtswv ua rau vajntxwv Manaxes poob rau lub sijhawm txomnyem?
– Vajtswv teb Manaxes tej lus thov thiab kho nws dua tshiab li cas?
– Peb cheemtsum ua dab tsi thaum ua txhaum rau Vajtswv?
Vajntxwv Manaxes yog ib tug hauv cov vajntxwv ua phem heev uas tau tswj kav cov Yudais. Vaj ntxwv tau ua ntau yam kev phem kev qias thiab coj lwm haivneeg tej mlom los rau hauv tus Tswv lub Tuamtsev. Manaxes tseem muab nws tus tub tua hlawv fij rau mlom. (2 Vajntxwv 21:6). Tus Tswv txib Nws cov cev lus los ceebtoom tiamsis vajntxwv tsis mloog thiab rov ua phem ua qias heev dua ntxiv (nqe 10). Vim li ntawd, tus Tswv thiaj txib cov tubrog Axilias tuaj ntes tau Manaxes, muab khawb hlau chaws nws qhov ntswg, thiab muab saw hlau khi nws cab mus rau tim lub tebchaws Npanpiloos zoo li cab ib tus nyuj (nqe 11). Tus Tswv pub cai rau cov Axilias ua li ntawd los ceebtoom vajntxwv Manaxes vim nws tsis mloog cov Cev lus tej lus.
Thaum poob rau kev txomnyem, vajntxwv nco txog Vajtswv, txo hwjchim kawg siab thiab thov Vajtswv (nqe 12). Vajtswv yeej ua li Nws tau coglus yog thaum Nws haivneeg txo hwjchim thov Vajtswv thiab tso kev txhaum tseg ces Vajtswv yuav mloog, zam txim thiab cawm lawv dim (2 Xwmtxheej Vajntxwv 7:14). Vajntxwv Manaxes tau saj Vajtswv kev ncaj ncees, kev ua siab ntev thiab kev hlub thaum uas nws hloov siab tiag tiag tso kev txhaum thiab thov Vajtswv. Vajtswv teb vajntxwv tej lus thov thiab pub rau nws rov tau los rau Yeluxalees kav nws haivneeg (nqe 13). Tom qab txoj kev txomnyem ntawd, vajntxwv tau ceebtoom tsim los thiab hloov siab tso kev txhaum tseg. Vajntxwv zeem paub tus Tswv yog Vajtswv thiab yog tus uas hloov kho nws dua tshiab. Vajntxwv tso nws kev txhaum tseg thiab kho nws lub neej uas ua phem yav dhau los. Nws tshem tej mlom pov tseg huv tibsi, nws rov kho lub thaj ntawm qhov chaw pehawm tus TSWV, tua tsiaj hlawv fij ua kev sib raug zoo thiab ua Vajtswv tsaug rau saum lub thaj ntawd. Thiab txawm yog muaj neeg tseem pheej mus tua tsiaj hlawv fij rau lwm qhov chaw los yeej yog lawv fij rau tus TSWV uas yog lawv tus Vajtswv xwb (nqe 15-17).
Los ntawm koob hmoov thiab kev hlub, Vajtswv zam txim thiab hloov Manaxes dua tshiab thaum uas nws thov Vajtswv kawg siab ntsws. Vajtswv mloog tej lus thov uas hloov siab thiab txoj kev mob ntawm vajntxwv Manaxes, thiab rov kho nws lub meejmom rau nws. Vim lub siab hlub, Vajtswv zam txim rau ib tug vajntxwv uas ua phem ua qias ntau heev thiab pub rau nws rov sib raug zoo nrog Vajtswv tus uas cawm nws. Qhov no qhia pom hais tias yeej tsis muaj ib txoj kev txhaum uas loj txog qib uas Vajtswv yuav zam txim tsis tau li.
Thaum uas paub peb ua txhaum lawm, peb cia li lees qhov kev txhaum ntawd tawm, hais rau Vajtswv hais tias nyuam yaus lees txim tiag tiag thov Vajtswv Koj zam txim. Nyuam yaus cheemtsum Koj kev pab thiab cawm kom nyuam yaus dim. Los ntawm Nws txoj kev hlub uas twb coglus lawm, paub tseeb tseeb Vajtswv yuav zam txim thiab kho peb dua tshiab. Nws yuav rov hlub peb tiv thaiv peb li tus menyuam uas Nws hlub kawg nkaus.
Thov Vajtswv,
Vajtswv, thov pab nyuam yaus zeem paub nyuam yaus txoj kev txhaum kom paub lees txim tso kev txhaum tseg, txo hwjchim thov Vajtswv Koj zam txim, cawm nyuam dim kev txhaum thiab kho nyuam yaus dua tshiab. Nyuam yaus tuav Tswv Yexus Khetos lub npe thov, Amees.
Peb puas txo hwjchim lees txim tso kev txhaum thiab thov Vajtswv zam txim?
Nyeem Vajluskub hauv peb lub xyoos: Phau Ntawv Nkauj 48-49
Kênh Youtube BHKTHN:
