Klei Aê Diê Blŭ: II Klei Yăl Dliê 33:10-17
Êlan kliăng: “Tơdah phung ƀuôn sang Kâo arăng pia hŏng anăn Kâo bi luă gŭ diñu pô, wah lač leh anăn duah ƀô̆ mta Kâo, leh anăn lui êlan soh diñu, hlăk anăn Kâo srăng hmư̆ mơ̆ng adiê, pap brei klei soh diñu, leh anăn bi hlao čar diñu.” (II Klei Yăl Dliê 7:14)
Klei êmuh ksiêm mĭn: Ya ngă Aê Diê brei klei knap mñai truh kơ mtao Y-Manasê? Si Khua Yang hmư̆ klei ñu wah lač leh anăn lŏ bi mrâo ñu? Ya klei brei drei ngă tơdah ngă soh hŏng Khua Yang?
Mtao Y-Manasê jing sa čô hlăm phung mtao jhat ƀai hĭn tuôm kiă kriê phung ƀuôn sang Yuđa. Mtao ngă leh lu mta klei jhat ƀai snăk sơưn, ba rup yang tue mŭt hlăm Sang Yang Yêhôwa. Wăt myơr anak êkei ñu pô kơ rup yang (II Bruă Mtao 21:6). Khua Yang tiŏ nao leh phung khua pô hưn êlâo nao hưn brei ñu thâo ƀiădah mtao amâo uêñ ôh, leh anăn lŏ ngă klei jhat ƀai kjham hĭn êjai (êlan 10). Kyuanăn yơh, Khua Yang brei phung Asiri nao mă mtao Y-Manasê jing mnă, diñu bi knap mtao kjham snăk, yua knuăk msei tuăk ti adŭng mtao leh anăn đoh ba ñu kơ čar Ƀaƀilôn msĕ si arăng đoh êmô (êlan 11). Khua Yang brei klei dưi kơ phung Asiri ngă klei anei čiăng bi mdih mtao Y-Manasê kyuadah mtao amâo uêñ ôh kơ klei phung khua pô hưn êlâo nao hưn kơ ñu.
Êjai dôk hlăm klei knap mñai, mtao hdơr kơ Khua Yang, bi luă gŭ ñu pô êdimima leh anăn ñu kwưh kơ Yêhôwa Aê Diê pap brei kơ ñu (êlan 12). Aê Diê djă pioh leh klei Ñu ƀuăn, anăn jing tơdah phung ƀuôn sang Ñu bi luă gŭ diñu pô kwưh akâo leh anăn kmhal kơ klei soh, snăn Ñu srăng hmư̆, pap brei leh anăn bi mtlaih diñu (II Klei Yăl Dliê 7:14). Mtao Y-Manasê bi knal leh klei sĭt suôr, klei jăk Khua Yang brei kơ ñu, tơdah ñu kmhal sĭt hŏng jih ai tiê leh anăn kwưh akâo kơ Khua Yang. Aê Diê hmư̆ klei mtao kwưh akâo, brei ñu dưi lŏ wĭt kơ Yêrusalem jing mtao kiă kriê phung ƀuôn sang (êlan 13). Leh găn klei knap mñai anăn, mtao Y-Manasê mâo klei dôk răng leh anăn kmhal sĭt. Mtao thâo kral Yêhôwa jing Aê Diê leh anăn jing Pô lŏ bi mrâo ñu. Mtao kmhal kơ klei soh ñu leh anăn hŏng jih ai tiê bi mlih, mkra msir jih klei jhat ƀai ñu ngă hlăk êlâo. Mtao hwiê jih rup yang, lŏ mkra knưl kơ Yêhôwa, myơr mnơ̆ng ngă yang kơ klei êđăp ênang leh anăn klei bi mni kơ Aê Diê. Phung ƀuôn sang Yuđa ăt ngă yang ti anôk dlông ƀiădah knŏng myơr mnơ̆ng ngă yang hjăn kơ Yêhôwa Aê Diê (êlan 15-17).
Kyua klei pap leh anăn klei khăp, Khua Yang pap brei leh anăn lŏ bi mrâo leh mtao Y-Manasê, tơdah mtao kwưh akâo hŏng jih ai tiê. Aê Diê mđing hmư̆ klei ñu wah lač kmhal sĭt leh anăn klei ênguôt hnĭng ñu, lŏ bi mrâo anôk bruă ñu. Kyua klei jăk, Khua Yang pap brei leh kơ sa čô mtao jhat ƀai snăk sơưn leh anăn brei ñu lŏ mâo klei êđăp ênang hŏng Pô bi mtlaih leh ñu. Klei anei brei drei ƀuh amâo mâo ôh klei soh prŏng đei tơl Khua Yang amâo dưi pap brei.
Tơdah thâo drei ngă soh leh, brei drei hưn klei soh hŏng Khua Yang snei, kâo kmhal sĭt hŏng jih ai tiê leh anăn akâo kơ Khua Yang pap brei. Kâo akâo klei Khua Yang đru leh anăn kwưh akâo kơ Khua Yang bi mtlaih. Kyua klei khăp bi mguôp Ñu ƀuăn leh, sĭt nik Khua Yang srăng pap brei leh anăn lŏ bi mrâo drei. Ñu ăt srăng khăp leh anăn răng kriê drei nanao msĕ si anak Ñu khăp hơiêng.
Si ngă drei bi luă gŭ drei pô kmhal kơ klei soh leh anăn kwưh akâo kơ Khua Yang pap brei tơdah drei ngă soh mơ̆?
Wah lač: Ơ Khua Yang, akâo Ih đru kâo thâo kral nanao klei soh kâo, čiăng kăp kmhal kơ klei soh, leh anăn bi luă gŭ kâo pô kwưh akâo Khua Yang pap brei, bi mtlaih leh anăn lŏ bi mrâo. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Klei Mmuñ Hđăp 48-49
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
