Mathais 9:23-26
Nqe cim:
“Yexus hais rau Mathas hais tias, “Kuv yog txojkev sawv hauv qhov tuag rov qab los thiab yog txojsia. Tus uas ntseeg kuv, txawm yog nws tuag lawm los nws yeej yuav muaj txojsia” (Yauhas 11:25).
Lus nug rau sawvdaws xav:
- Tswv Yexus pom dab tsi thaum Nws mus txog hauv tus nom lub tsev?
- Tswv Yexus hais li cas rau cov neeg ntawd?
- Lawv ua li cas rau Tswv Yexus?
- Tswv Yexus ua li cas rau tus nom ntawd lub tsev neeg?
- Tsimnyog ua li cas thaum peb ntsib kev tws?
Tom qab kho tus pojniam coj khaubncaws tas, muaj neeg tuaj tso xov rau Yailus hais tias nws tus ntxhais twb tuag lawm. Thaum Tswv Yexus mus txog hauv Yailus tsev, muaj neeg tuaj quaj nyiav ntsoog qees rau tus ntxhais uas tuag lawm raws li cov Yudais pheej ua. Thaum muaj kev quaj ntsuag li no yoojyim ua rau Yailus tas kev cia siab thiab poob kev ntseeg, Tswv Yexus pom li ntawd Nws thiaj ntiab cov neeg ntawd khiav tawm mus thiab hais tias: koj tus ntxhais tsis tuag, nws tsaug zog xwb. Cov neeg coob coob ntawd xav tsis thoob thiab txob thuam Yexus, vim lawv tab tom ua raws li lawv tej kevcai rau tus tuag. Tiamsis los ntawm Tswv Yexus cov lus, txhawb tau Yailus lub zog ntau kawg.
Tom qab uas cov neeg txob thuam Yexus tawm hauv tsev mus lawm, Tswv Yexus mus rau hauv tsev, coj lub tsev neeg ntawd mus rau qhov chaw uas tso tus me ntxhai lub cev (Malakaus 5:40). Ib leej niam uas muaj lub siab puas tsus, ib leej txiv uas muaj chaw vam siab ruaj khov rau tus Tswv thiab tus Tswv nplooj siab hlub txog tus me ntxhais ntawd, Tswv Yexus tuav nkaus tus me ntxhais ntawd tes, tsa nws sawv ces zaj txujci tseemceeb tau tshwm los thiab tus me ntxhais sawv rov muaj sia. Tswv Yexus muaj fwjchim hu neeg tuag sawv rov qab los, tiamsis Nws ho mus tuav tus me ntxhais txhais tes, qhov ntawd yog tes haujlwm qhia tshwm txog Tswv Yexus kev hlub tshua tus me ntxhais ntawd. Zaj txujci no tsuas yog tus me ntxhais ntawd niam thiab txiv nrog rau Tswv Yexus peb tus thwjtim uas ncawg Nws tshaj thiaj pom xwb.
Peb pheej kheev xav hais tias: “Lig dhau lawm…” txog tej yam uas yuav pauv hloov, tiamsis ntawm Tswv Yexus tsis muaj ib yam yuav lig dhau txog qhov uas tibneeg txav los cuag Nws, lees kev txhaum rau Nws kom tau pib dua tshiab. Muaj ntau tus tibneeg, raws li neeg ntiajteb ntsia pom ces lawv twb tuag rau kev quav yeeb quav tshuaj lawm, tiamsis thaum los cuag tus Tswv, lawv tau txais kev pauv hloov muaj lub neej tshiab xav tsis thoob. Yog peb leejtwg nyob rau lub tsamthawj uas ntsib kev tws, cia li nco ntsoov hais tias Tswv Yexus yeej ua tau tej uas tibneeg ua tsis tau thiab tsis muaj ib zaug twg uas tus Tswv suav hais tias lig dhau lawm. Tswv Yexus tej lus hais rau tus nom hnub thaud tseem muaj nqis rau peb txhua tus niaj hnub nimno, “…koj tsis txhob ntshai, cia li ntseeg” (Malakaus 5:36).
Peb puas muaj lub siab ntseeg txaus thiab txav los cuag tus Tswv kom tau pom tej txujci tseemceeb uas tus Tswv ua rau yus lub neej?
Thov Vajtswv,
Tus Tswv, nyuam yaus ua Koj tsuag vim Koj hlub thiab paub zoo nyuam yaus lub neej. Thov pab kom nyuam yaus nco ntsoov tso siab plhuav rau koj ntawm txhua yam hauv lub neej, txawm tej neeg ib ncig tsis ntseeg thiab txob thuam nyuam yaus los xij. Amees.
T Nyeem Vajluskub hauv peb lub xyoo: II.Xwmtxheej Vajntxwv 24:23-25:16
Phab Xa Suab Lus nrog rau Phab Cob Qhia Tus Ntseeg koom tes txhim muaj.
Txhua yam kev pab tswvyim txhim kho, thov nej sau ntawv xa rau lub chaw: kawmvajluskubtxhuahnub@gmail.com
Tshooj Youtube BHKTHN: https://www.youtube.com/c/bhkthn
