Klei Aê Diê Blŭ: Y‑Mathiơ 9:23-26
Êlan kliăng: “Yêsu lač kơ gơ̆, “Kâo jing klei kbiă lŏ hdĭp leh anăn klei hdĭp. Hlei pô đăo kơ kâo, srăng hdĭp wăt tơdah ñu djiê dưn;” (Y‑Yôhan 11:25).
Klei êmuh ksiêm mĭn: Ya klei Khua Yang Yêsu ƀuh tơdah Ñu truh ti sang khua kiă kriê sang kƀĭn? Ya klei Khua Yang Yêsu lač kơ phung anăn?Si knhuah diñu wĭt lač hŏng Khua Yang? Ya klei Khua Yang ngă leh kơ gŏ sang anei? Ya klei brei drei ngă êjai dôk hlăm klei truh luč klei čang hmăng?
Tui tluôn klei yăl dliê kơ Y‑Jairus, pô kiă sang bi kƀĭn hriê duah Khua Yang leh anăn akâo kơ Ñu bi hdĭp anak ñu. Tơdah Khua Yang Yêsu truh tinăn, Ñu ƀuh sa klei ênguôt hnĭng kluôm jih sang anăn, phung lu dôk mprăp mkra klei čang djiê kơ mniê hđeh, đa ayŭ đĭng buôt, đa dôk kơŭ kyăm čŏk hia hao hao tui si klei bhiăn Mishna phung Israel. Klei ênguôt hnĭng anăn dưi ngă kơ khua kiă sang kƀĭn luč klei čang hmăng leh anăn kdŭn đuĕ hlăm klei đăo, Khua Yang Yêsu thâo săng klei anăn snăn Ñu brei jih jang phung lu kbiă ti tač, Ñu lač hđeh điêt “dôk pĭt” gơ̆ amâo “djiê” ôh. Phung dôk tinăn hmư̆ snăn bi kngăr snăk leh anăn amâo jăk ai tiê ôh, kyuadah diñu dôk mkra hdră čang djiê tui si klei bhiăn mơ̆ng đưm, snăn diñu tlao mưč kơ Khua Yang. Wăt tơdah snăn dưn, klei Khua Yang Yêsu lač bi mđĭ ai klei đăo kơ ama hđeh điêt lu snăk.
Tơdah leh phung lu tlao mưč kơ Khua Yang kbiă ti tač, Khua Yang Yêsu mŭt leh anăn knŏng amĭ ama hđeh anăn mŭt mbĭt (Y‑Markôs 5:40). Ai tiê mčah ruă ênguôt sa čô amĭ, ai tiê bŏ dlai klei čang hmăng sa čô ama leh anăn ai tiê bŏ hŏng klei khăp leh anăn klei pap Khua Yang Yêsu mđrăm mbĭt hriê kơ hđeh điêt, Ñu djă kngan mniê điêt rŭ gơ̆ kgŭ, sa klei yuôm bhăn prŏng prĭn bi êdah, hđeh điêt lŏ hdĭp. Khua Yang Yêsu dưi mtă brei mnuih djiê lŏ hdĭp ƀiădah Ñu djă kngan hđeh điêt, klei ngă djă kngan bi êdah klei Khua Yang Yêsu khăp leh anăn uêñ mĭn kơ hđeh điêt anei. Knŏng amĭ ama mniê điêt leh anăn phung ƀĭng kna sĭt suôr Khua Yang ƀuh bruă yuôm bhăn, brei ƀuh knŏng hlei pô sĭt êmĭt dưm klei đăo kluôm dhuôm kơ Khua Yang kơh dưi ƀuh bruă yuôm bhăn Khua Yang ngă hlăm klei hdĭp ñu pô.
Drei khăng mâo klei mĭn “êla đei leh čiăng …” ƀiădah hŏng Khua Yang Yêsu amâo tuôm êla đei ôh čiăng êran hriê kơ Ñu, čiăng kmhal kơ klei soh, čiăng Khua Yang lŏ bi mrâo… Lu klei hdĭp hlăm ală mnuih mkăn jing djiê leh hlăm drao “ma tuĭ”, ră mưng… ƀiădah Khua Yang dưi lŏ bi mrâo hŏng klei yuôm bhăn. Tơdah drei hlăk dôk hlăm ya mta klei truh kjham kjhuê̆, luč klei čang hmăng, brei hdơr bĕ Khua Yang Yêsu dưi ngă jih jang klei mnuih amâo dưi ngă ôh, leh anăn amâo tuôm jing êla đei ôh čiăng hriê kơ Khua Yang. Klei Khua Yang Yêsu lač kơ khua kiă sang kƀĭn hlăk đưm adôk yuôm kơ drei ară anei msĕ mơh, “… đăm huĭ ôh, knŏng đăo bĕ” (Y‑Markôs 5:36).
Si ngă drei hmăr đăo leh anăn êran mtam kơ Khua Yang mơ̆ čiăng ƀuh klei yuôm bhăn Ñu ngă kơ klei hdĭp drei?
Wah lač: Ơ Khua Yang, bi mni kơ Ih kyua klei Ih khăp leh anăn thâo săng kơ kâo, akâo Ih brei kâo dưm nanao klei đăo kâo kluôm dhuôm kơ Khua Yang hlăm ya mta klei truh hlăm klei hdĭp, wăt tơdah jŭm dar kâo lu lĭn phung amâo đăo dôk tlao mưč kơ hlei pô đăo knang kơ Khua Yang.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Dlăng Klei Aê Diê Blŭ hlăm tlâo thŭn: II Klei Yăl Dliê 24:23 – 25:16
Kênh Youtube BHKTHN:
