Pajlug 15:18; Yakaunpaus 1:19-21
Nqe cim:
“Tej lus phem ua rau muaj kev sib cav sib ceg, tiamsis ua siab ntev muaj kev sib haumxeeb.” (Pajlug 15:18).
Phau txhais tshiab raws lus Nyablaj:
“Tus uas muaj lub siab kub tshum kom muaj lus sib cav sib ceg, tiamsis tus uas tsis chim sai tswj tau kev sib cav sib ceg kom tus”.
Lus nug rau sawvdaws xav:
- Chim sai yuav muaj dab tsi tshwm tuaj?
- Tsis chim sai yuav pab tau dab tsi?
- Peb yuav ua cas thiaj tswj tau kev chim sai?
Ib tsoom mloog txhua tus,
Chim yog ib tug yamntxwv uas tibneeg txhua tus pheej muaj tshwm thaum ntsib tej yam tuaj tawm tsam, zoo li raug luag ua saib tsis tau lossis raug luag dag. Tiamsis yog tsis tswj kev chim ces yuav ua rau tibneeg cheem tsis tau tej kev xav thiab tus kheej. Vajntxwv Xalumoos ua rau peb pom meej txog ob yam sib txawv ntawm chim sai thiab tsis chim sai li no: Tus neeg chim sai ua rau muaj kev sib cav sib ceg, tiamsis tus tsis chim sai ua rau kev sib cav sib ceg tus thiab nyob sib haumxeeb. Tus chim sai ua rau nws lub hlwb feeb tsis meej, ua rau nws xav tej yam tsis yog, tham lus yuam kev thiab ua tej yam tsis yog cai. Lo “sib cav sib ceg” lossis “kub ntxhov” ntawm hauvpaus yog yegareh, txhais hais tias nyob tsis sib haum, lossis sib cam. Tus neeg “tsis chim sai” lossis tswj tau kev chim yog neeg txawj ntse, ntawm hauvpaus yog erek (saib ntxiv Pajlug 14:29) uas txhais hais tias; tswj tau nws kev chim kom rov muaj kev thajyeeb thiab ntsiagto li thaum thawj. Kev chim uas tsis tswj yuav ua rau sib ntxub, kev thajyeeb hloov mus ua kub ntxov. Thaum ib tug neeg chim uas tswj tsis tau, nws yuav mus ua tej yam uas ruam kawg li (saib Pajlug 14:17; 22:24; 25:28).
Yakaunpaus qhia meej hais tias: “kev chim yeej pab tsis tau kom peb ua tau neeg ncaj ncees raws li Vajtswv lub siab nyiam” (Yakaunpaus 1:20). Thaum nyob hauv vaj Khexemanes Timthawj Petus uas yog ib tug maj hais thiab chim sai, nws thiaj muab ntaj los txiav cov Povthawj ib tug tub qhe sab pobntsej tu nrho, nws yuav luag poob rau kev txhaum tua neeg thiab ua muaj kub ntxhov. Cov ntseeg Yexus yuav tsum ua lub neej qhia tshwm tus mojyam uas “siab mos muag” ntawm Vaj Ntsujplig dej txiv. Lub siab mos muag yuav kov yeej tej kev chim npau. Thaum peb yim hlub tus Tswv peb yim muaj lub siab mos muag ntawm tus Tswv xub ntiag thiab ntawm tej neeg sawvdaws, thiab qhov ntawd yuav pab tau peb kev chim yaj xam mus. Timthawj Paulus qhia hais tias: “Nej yuav tsum muab nej lub siab phem, lub siab ua nruj ua tsiv thiab lub siab heev tso povtseg. Tsis txhob sib cav sib ceg, tsis txhob thuam lwm tus thiab tsis txhob xav ib yam phem hlo li. Nej yuav tsum ua siab dawb siab zoo, ib tug hlub ib tug, thiab ib tug zam txim rau ib tug, ib yam li Vajtswv twb zam txim rau nej cov uas ntseeg Yexus Khetos lawm” (Efexus 4:31-32).
Nyob hauv lub neej, tsis hais thaum ua Vajtswv haujlwm ua ke, yeej qaij tsis dhau qhov uas sawvdaws xav tsis sibthooj ua rau muaj kev sib cav, tiamsis tsis yog sib cav ces yuav tsis sib haumxeeb. Peb tsuas ua tau rau lwm tus ib yam li tus Tswv twb ua rau peb lawm xwb, yog li ntawd, thaum peb pom txog tus Tswv kev hlub thiab kev zam txim rau peb loj kawg nkaus ces peb thiaj yuav thov Vajtswv pab kom peb ua lub neej hlub lwm tus thiab zam txim rau peb tej kwvtij sawvdaws. Qhov uas yuav tswj tau kev chim sai kom muaj lub siab mos muag nrog sawvdaws nyob sib haumxeeb yog peb los saib txog tej uas tus Tswv Yexus twb ua rau peb lawm thiaj yuav ua tau qhov ntawd.
Thov Vajtswv,
Tus Tswv, nyuam yaus ua Koj tsaug uas Koj ntuas nyuam yaus txhob chim sai. Thov Vaj Ntsujplig qhia kom nyuam yaus kawm tau Koj txojkev hlub uas tsis chim sai thiab zam txim rau nyuam yaus lawm, txawj muab qhov ntawd los ua neej sib haumxeeb nrog tsev neeg thiab tej neeg sawvdaws. Amees.
Ib tsoom cov mloog uas hmov thiab tshua,
Peb tswj peb tej kev chim zoo li cas lawm?
Nyeem Vajluskub hauv peb lub xyoo: Yauj 13:20-14:22
Phab Xa Suab Lus nrog rau Phab Cob Qhia Tus Ntseeg koom tes txhim muaj.
Txhua yam kev pab tswvyim txhim kho, thov nej sau ntawv xa rau lub chaw: kawmvajluskubtxhuahnub@gmail.com
Tshooj Youtube BHKTHN: https://www.youtube.com/c/bhkthn
