Klei Aê Diê Blŭ: Klei Bi Hriêng 15:18; Gia-cơ 1:19-21
Êlan kliăng: “Sa čô mnuih djăl ăl bi mčhur klei bi mneh msao, ƀiădah hlei pô gĭr bi hlai klei anăn.” (Klei Bi Hriêng 15:18).
Klei êmuh ksiêm mĭn: Ya klei jhat truh mơ̆ng klei djăl ăl? Ya klei tŭ dưn mơ̆ng klei amâo djăl ăl? Si drei ngă čiăng dưi krơ̆ng klei ăl?
Klei ăl jing klei lŏ wĭt ngă tui si bhiăn jing anak mnuih, bi êdah klei bluh ai hlăk mâo klei arăng ngă jhat, bi hêñ, mplư luar amâodah dluh lĕ. Ƀiădah, tơdah amâo dưi krơ̆ng ôh klei ăl, anak mnuih srăng luč klei dưi ksiêm klei bluh ai ñu pô amâodah luč klei êđăp ênang. Mtao Salômôn brei ƀuh klă klei mdê ti krah mnuih djăl ăl hŏng amâo djăl ăl. Mnuih djăl ăl, knuih hlơr, khăng bi mneh msao, bi tăng mgăl, ƀiădah pô gĭr bi êđăp klei bi mneh msao, bi hlai klei bi tăng mgăl. Mnuih djăl ăl bi mmăt hĕ klei thâo săng atăt truh kơ klei bi mĭn amâo ksă mă, klei blŭ, bruă ngă amâo djŏ hnơ̆ng. Boh blŭ “bi čik” amâodah “bi mneh msao” hlăm boh blŭ phŭn yegareh, ăt čiăng kơ klei keh koh, amâodah bi tăng mgăl. Mnuih “amâo djăl ăl” amâodah gĭr tŭ jing mnuih thâo mĭn, boh blŭ phŭn jing erek (dlăng Klei Bi Hriêng 14:29) čiăng lač kơ mnuih dưi jing khua kơ klei ăl ñu pô čiăng lŏ wĭt kơ klei hnŭk ênang leh anăn êđăp ênang. Klei ăl bi luč klei dưi ksiêm krơ̆ng ai tiê srăng mjing klei bi khăp jing klei bi roh, klei hnŭk ênang jing klei rŭng răng. Sa čô ăl ngêñ amâo dưi krơ̆ng ksiêm klei krêñ dôk bluh trơ̆ng hlăm ñu kyuanăn êlưih lĕ hlăm klei ngă klei mluk mgu (dlăng Klei Bi Hriêng 14:17; 22:24; 25:28).
Y-Yakơ lač klă: “klei mnuih ăl amâo dưi bi truh ôh klei kpă ênô Aê Diê” (Y-Yakơ 1:20). Êjai hlăm war mnga Gêtsêmanê, khua ƀĭng kna Y-Pêtrôs bi êdah klei êmưt hmư̆ ƀiădah ruăt blŭ leh anăn djăl ăl kyuanăn yua leh đao gưm koh tloh knga dĭng buăl khua ngă yang prŏng, ƀiă rit truh kơ klei soh bi mdjiê mnuih leh anăn ngă klei bi rŭng. Phung đăo brei bi êdah knuih “êdu êun” mơ̆ng Yang Mngăt Jăk. Ai tiê êdu êun srăng bi kdơ̆ng hŏng klei ăl krêñ. Tơdah ktang khăp kơ Khua Yang, ai tiê drei ktang hĭn jing êdu êun ti anăp Khua Yang leh anăn ti anăp jih jang mnuih, mbĭt anăn ăt đru bi hlai ƀrư̆ ƀrư̆ klei ăl. Khua ƀĭng kna Y-Pôl mtô: “Bi luč hĕ mơ̆ng diih jih klei phĭ, klei ăl, klei ngêñ, klei ngă rŭng răng, klei mčeh luar, mbĭt hŏng jih klei ƀai. Brei diih ngă jăk hdơ̆ng diih pô, bŏ hŏng klei thâo pap, bi pap brei hdơ̆ng diih, msĕ si Aê Diê pap brei leh kơ diih hlăm Krist” (Êphêsô 4:31-32).
Hlăm klei hdĭp, wăt hlăm klei mă bruă kơ Khua Yang mbĭt hdơ̆ng drei, amâo tlaih ôh klei mâo klei mĭn mdê mdê, đa tơl truh klei bi keh koh. Drei knŏng dưi dôk dơ̆ng ƀơ̆ng huă hŏng dŭm klei drei mă tŭ leh mơ̆ng Khua Yang, kyuanăn knŏng tơdah drei thâo kral klei khăp leh anăn klei pap brei klei soh Khua Yang pioh brei kơ drei jing prŏng êdimi, snăn kơh drei dưi akâo kơ Khua Yang đru drei dôk hdĭp thâo khăp, thâo pap kơ phung ayŏng amai adei drei. Anei jing atur čiăng kơ drei thâo krơ̆ng klei ăl ngêñ, dôk hdĭp êdu êun leh anăn amâo djăl ăl ôh hlăm klei bi mguôp hnơ̆ng drei.
Si ngă drei khăng mâo klei dưi amâodah dluh lĕ hlăm klei thâo krơ̆ng klei ăl?
Wah lač: Ơ Khua Yang, bi mni lač jăk kơ Khua Yang kyuadah Ih mñă kơ kâo amâo djăl ăl ôh. Akâo kơ Yang Mngăt Jăk brei kâo hriăm mơ̆ng klei khăp Khua Yang pioh brei kơ kâo, Khua Yang amâo djăl ăl ôh kơ klei soh kâo ngă, čiăng kơ klei blŭ, bruă ngă kâo dưi ba klei êđăp ênang, klei khăp kơ gŏ sang kâo leh anăn kơ jih jang mnuih. .
Dlăng Klei Aê Diê Blŭ hlăm tlâo thŭn: Y-Yôp 13:20-28; 14:1-22
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
