II Hơ’mon 33:14-20
“Bơ̆n ‘nĕ pă pơm yoch tôm tơdrong kơnê̆ thoi lu bơngai tơ teh âu juăt kơ pơm. Bơ̆n athei pơjao akâu bơ̆n kơ ‘Bok Kei-Dei tơplih jơhngơ̆m đon bơ̆n…” (Rôm 12:2a)
Nơ̆r jet tơchĕng pơwao:
– Đơ̆ng rŏng kơ tơbral wih brŏk tơ Kră Yang, Pơtao Manase pơm kiơ?
– Yua kơ kiơ kon pơlei oei pơyơ̆r tơmam soi kơ Kră Yang tơ anih kơ jung?
– Lu bơ̆n hăm đei tơdrong tơplih ayơ lăm tơdrong arih ‘nao hăm ‘Bok Krist?
Đơ̆ng rŏng Pơtao Manase tơbral, krao chă Kră Yang păng na Kră Yang mơnat tơdrong arih sa kư̆m gơh tơplih, pơm tơ’bôh tơdrong jang. Pơtao pơm tơdrong ‘lơ̆ng păng pơm tơplơ̆ dơ̆ng dôm tơdrong kơnê̆ đêl pơm sơ̆.
Hơdrol sơ̆, Pơtao Manase lăp hiơ̆k tơdrong jang kơkuh kơ rup yang wă kơ rai pran ưh kơ đei hiơ̆k krăng hơmet. Dang ei pơtao man tơiung ming dur ataih kơ pơlei Đawit kơ jung, hơmet lê̆ bơngai pơgơ̆r wă wei lăng char Juđa. Lăm sơ̆p Hla bơar Hơ’mon. Lu pơtao pơm ‘lơ̆ng đei ‘Bok Kei-Dei ăn pŭn hiôk kơ dôm tơdrong man pơjing, kư̆m thoi lu khul linh pran. Man tơiung dur păng atŏk tơdrong jang bơngai pơgơ̆r khul linh noh bơih tơdra tơ’bôh pơtao Manase đei Kră Yang ăn tơdrong pŭn hiôk đơ̆ng rŏng kơ tơbral wih brŏk tơ Sư.
Tơdrong arih lăm tơdrong lui, Pơtao Manase đei tơdrong tơplih rơđah hơđăl dêh. Đơ̆ng minh ‘nu bơngai man rup yang kơ lu bơngai tơmoi, anhăk rup yang mơ̆t tơ lăm hnam akŭm Kră Yang, dang ei Pơtao hŭt đĭ lu rup yang bơngai tơmoi đơ̆ng lăm hnam Kră Yang ‘Bok Kei-Dei, rup yang păng gơ’bang soi mă đêl pơtao đei man, đơ̆ng noh klơ̆m hŭt đĭ tơ’nguaih pơlei (trong 15). Pơtao hơmet ming chơnang soi Kră Yang ‘Bok Kei-Dei. Pơyơ̆r tơmam soi kơ tơdrong rơnŭk rơnua păng tơmam soi ‘blŏk bơnê tơ noh. Adrol sơ̆ pơtao bơtho kơ lu bơngai Juđa păng kon pơlei Jêrusalem mă kơkuh kơ rup yang. Dang ei, pơtao bơtho athei kon pơlei Juđa chu kơ Kră Yang ‘Bok Kei-Dei Isơrael (trong 16). Mă khan lei ră, yua kơ kon pơlei đêl juăt đơ̆ng sơ̆, oei pơgơ̆r tơmam soi tơ kông kơjung mă khan lu sư pơyơ̆r kơ minh ‘Bok Kei-Dei đĕch (trong 17). Mă khan thoi noh, ‘nâu tơdrong kơkuh ưh kơ trŏ păng ưh kơ trŏ anih. ‘Bok Kei-Dei đei bơtho kơ kon pơlei Sư athei pơyơ̆r tơmam soi ‘bơ̆t anih mă đơ̆ng Sư rơih (Bơtho khôi juăt 12:13-14). Tơdrong kơnhăm wă kơ lu sư huay kơ đei ‘bơm đơ̆ng bơngai ưh kơ lui. Tơdrong noh tơ’bôh dôm tơdrong kơnê̆ đơ̆ng pơtao Manase pơm oei ‘bơm truh hơnơ̆ng tơ kon pơlei, mă khan dang ei Pơtao đei wih brŏk kơkuh kơ ‘Bok Kei-Dei bơih.
Đơ̆ng tơdrong arih Manase đei tơplih, bơ̆n ‘bôh minh ‘nu bơngai mă tơbral tơpă wih brŏk tơ Kră Yang, wă Kră Yang pơm Yŏng lăm chăl arih, bơngai noh athei đei tơdrong tơplih mă hơđăl, đei pơm tơ’bôh đơ̆ng tơdrong arih. Jing minh ‘nu bơngai lui sơng iŏk Kra Yang pơm Yŏng tơdrong arih, bơ̆n kư̆m kăl kơ đei tơdrong arih tơplih mă tơpă thoi nơ̆r Kră Yang bơtho: “Ơ lu ‘nhŏng oh, bơ̆n băt boih ‘Bok Kei-Dei ‘mêm kơ bơ̆n tôch bơneh dang noh, na bơ̆n athei pơjao akâu bơ̆n kơ Sư, ‘nĕ pă pơm yoch, pơm kiơ̆ kơ Sư đĕch, noh na Sư lăp đon kơ bơ̆n.” (Rôm 12:1). Bơ̆n athei tơnăp lăm tơdrong akŭm kơkuh kơ Kră Yang, athei hiơ̆k bơwei khul bơngai lui, kơ kon pơlei Kră Yang gah sĕch akar kư̆m thoi gah bơhngol. Gĭt kăl hloh, athei weh wer đơ̆ng tơdrong yoch yua kơ dôm tơdrong jang ưh kơ ‘lơ̆ng đơ̆ng bơ̆n kơdih gô ‘bơm ưh kơ ‘lơ̆ng păng ‘bơm kơ lơ bơngai nai.
Ơ Kră Yang, apinh Ih ăn kơ inh tơplih tơpă lăm tơdrong arih păng pơm tơ’bôh hăm dôm tơdrong arih wă kơ tơdrong arih inh ưang Anăn Ih, krao khan yua anăn Kră Yang Yêsu Krist, Amen.
Bơ̆n ‘bôh tơdrong bơ̆n kơdih oei thoi yo so dah tơplih đơ̆ng rŏng lui kơ Kră Yang?
Đŏk Sơ̆p Hla bơar ‘Bok Kei-Dei lăm pêng sơnăm: Jêrêmi 15
Kênh Youtube BHKTHN:
https://www.youtube.com/c/bhkthn
