Klei Aê Diê Blŭ: II Klei Yăl Dliê 33:14-20
Êlan kliăng: “Đăm jing msĕ si phung ênuk anei ôh, ƀiădah brei Aê Diê bi mlih klei hdĭp diih hŏng klei Ñu lŏ bi mrâo klei mĭn diih…(Rôm 12:2a)
Klei êmuh ksiêm mĭn: Leh kmhal klei soh lŏ wĭt kơ Aê Diê, ya klei Mtao Manasê ngă leh? Ya ngă phung ƀuôn sang ăt myơr mnơ̆ng ngă yang kơ Aê Diê ti dŭm anôk dlông? Si klei drei bi mlih hlăm klei hdĭp mrâo hŏng Krist?
Leh Mtao Manasê kmhal klei soh, kwưh akâo kơ Aê Diê leh anăn Aê Diê pap brei snăn klei hdĭp ñu dưi bi mlih, bi êdah hlăm bruă ngă klă klơ̆ng. Mtao ngă klei jăk leh anăn mdê hŏng klei ƀai ngă leh hlăm thŭn mlan êgao.
Êlâo dih, Mtao Manasê knŏng mđing mđĭ kyar bruă kkuh kơ rup yang amâo mđing ôh kơ klei răng mgang. Ară anei, mtao mdơ̆ng mnư̆ dlông snăk ti êngao ƀuôn Đawit, ñu dưm phung khua kahan hlăm jih ƀuôn mâo kđông kahan hlăm čar Yuđa. Hlăm hdruôm hră Klei Yăl Dliê, phung mtao jăk khăng mâo Aê Diê brei klei hơêč hmưi thâo ngă bruă rŭ mdơ̆ng, ăt msĕ mơh mâo êpul kahan jhŏng ktang. Mdơ̆ng mnư̆ ƀuôn leh anăn ruah mdưm phung khua kahan jing dŭm klei bi knăl brei ƀuh Mtao Manasê mâo Aê Diê hơêč hmưi leh kmhal klei soh lŏ wĭt hŏng Ñu.
Hlăm klei hdĭp klei đăo, Mtao Manasê mâo klei bi mlih klă mngač. Mơ̆ng sa čô mnuih mdơ̆ng knưl kơ rup yang ti êngao, ba rup yang hlăm Sang kkuh mpŭ kơ Aê Diê, ară anei mă hwiê hĕ phung yang tue leh anăn rup yang mơ̆ng sang yang Yêhôwa, leh anăn jih jang knưl ñu ngă leh ti dlông čư̆ sang yang Yêhôwa leh anăn hlăm ƀuôn Yêrusalem, leh anăn ñu hwiê dŏ anăn ti êngao ƀuôn (êlan 15). Ñu lŏ mkra knưl ngă yang kơ Yêhôwa, čuh ti dlông gơ̆ mnơ̆ng ngă yang kơ klei êđăp ênang leh anăn klei bi mni. Êlâo dih mtao mtô Yuđa leh anăn phung ƀuôn sang Yêrusalem kkuh kơ rup yang, ară anei mtao mtô phung ƀuôn sang Yuđa mă bruă kơ Yêhôwa Aê Diê phung Israel (êlan 16). Khădah snăn, kyua phung ƀuôn sang mâo klei mưng sui leh, diñu ăt ngă yang ti anôk dlông, ƀiădah knŏng kơ Yêhôwa Aê Diê diñu (êlan 17). Wăt tơdah snăn, anei ăt jing klei kkuh mpŭ amâo djŏ hdră leh anăn amâo djŏ anôk. Aê Diê mtă kơ phung ƀuôn sang Ñu knŏng myơr mnơ̆ng čuh ti dŭm anôk Ñu ruah leh (Klei Mtô Mñă Klei Bhiăn 12:13-14), klei kñăm čiăng krơ̆ng diñu kơ klei hmăi mơ̆ng klei đăo ti êngao. Klei anăn brei ƀuh klei ƀai Mtao Manasê ngă leh ăt dôk hmăi jhat sui hŏng phung ƀuôn sang, wăt tơdah ară anei mtao lŏ wĭt kkuh mpŭ kơ Aê Diê leh.
Mơ̆ng klei hdĭp Mtao Manasê bi mlih, drei ƀuh sa čô mnuih klă sĭt kmhal klei soh lŏ wĭt kơ Aê Diê, čiăng kơ Aê Diê jing Khua klei hdĭp pô, pô anăn brei mâo klei bi mlih ƀuh klă, bi êdah hlăm bruă ngă klă klơ̆ng. Jing mnuih mă tŭ Khua Yang Yêsu Krist jing Khua klei hdĭp, brei drei mâo klei mlih mrâo klă mngač msĕ si Klei Aê Diê Blŭ mtô: “Đăm jing msĕ si phung ênuk anei ôh, ƀiădah brei Aê Diê bi mlih klei hdĭp diih hŏng klei Ñu lŏ bi mrâo klei mĭn diih…” (Rôm 12:2). Brei drei sĭt suôr hlăm klei kkuh mpŭ kơ Aê Diê, brei kriê dlăng kơ Phung Sang Aê Diê, kơ phung ƀuôn sang Aê Diê hlăm asei mlei ăt msĕ mơh hlăm mngăt. Boh nik, brei jih ai tiê ñĕ kơ klei soh kyua dŭm bruă amâo jăk drei ngă srăng hmăi amâo jăk leh anăn sui truh kơ lu pô mkăn.
Drei ƀuh klei hdĭp pô ăt msĕ si hđăp amâodah dưi bi mlih mrâo leh đăo kơ Aê Diê?
Wah lač: Ơ Khua Yang, akâo kơ Ih đru kâo klă sĭt dưi mlih mrâo hlăm klei hdĭp leh anăn bi êdah hŏng bruă ngă klă klơ̆ng čiăng kơ klei hdĭp kâo mpŭ kơ Anăn Ih. Kâo wah lač hlăm Anăn Khua Yang Yêsu Krist , Amen.
Dlăng Klei Aê Diê Blŭ hlăm tlâo thŭn: Y-Yêrêmi 15
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
