Klei Aê Diê Blŭ: I Kôrantô 15:12-19.
Êlan kliăng: “Tơdah knŏng hlăm klei hdĭp anei drei mâo klei čang hmăng hlăm Krist, drei jing phung knap mñai hĭn kơ jih jang mnuih” (I Kôrantô 15:19).
Klei êmuh ksiêm mĭn: Ya klei Khua ƀĭng kna Y‑Pôl lač kơ klei kbiă lŏ hdĭp mơ̆ng klei djiê leh anăn klei kbiă lŏ hdĭp mơ̆ng Yang Krist? Ñu mblang tơdah Yang Krist amâo lŏ hdĭp ôh snăn ya klei truh jhat srăng mâo? Ya klei brei ngă čiăng bi êdah klei đaŏ knang Yang Krist lŏ hdĭp leh?
Hlăm wang phung đaŏ ti Sang Aê Diê Kôrantô mâo lu mnuih amâo đaŏ ôh kơ asei mlei kbiă lŏ hdĭp, anăn Khua ƀĭng kna Y‑Pôl mâo leh klei mblang čiăng bi mklă klei sĭt nĭk Yang Krist kbiă lŏ hdĭp leh anăn asei mlei lŏ hdĭp hlăm hruê knhal ktuč.
Êlâo hĭn, Khua ƀĭng kna Y‑Pôl mñă klă, “Kyuadah tơdah phung djiê amâo lŏ hdĭp ôh, snăn Krist amâo lŏ hdĭp ôh” (êlan 13,16). Ñu lŏ mñă êlan anei dua blư̆ čiăng bi mklă klei bi mguôp sĭt suôr plah wah klei đaŏ mâo klei kbiă lŏ hdĭp mơ̆ng klei djiê leh anăn klei Yang Krist kbiă lŏ hdĭp. Klei Aê Diê brei Yang Krist kbiă lŏ hdĭp jing sa bruă yuôm bhăn snăk kơ klei đaŏ phung đaŏ kơ Krist. Klei êdei anăn, ñu lŏ mblang mklăk wĭt, tơdah Yang Krist amâo kbiă lŏ hdĭp snăn srăng ba truh lu klei amâo jăk kjham: Tal sa, klei Khua ƀĭng kna Y‑ Pôl mblang leh anăn lu phung mkăn mblang jing hơaĭ mang. Tal dua, klei đaŏ ayŏng adei ăt jing hơaĭ mang mơh. Tal tlâo, hmei jing phung hưn luar kơ Aê Diê. Tal pă, ayŏng adei ăt dôk hdĭp hlăm klei soh pô. Tal êma, phung djiê leh hlăm Krist ăt nao kơ klei rai luč lă lar. Tal năm, ayŏng adei luč klei čang hmăng, jing dleh dlan leh anăn pap mñai hĭn kyua klei hdĭp knŏng mđing kơ klei hdĭp jing jai anei đuč.
Khua ƀĭng kna Y‑Pôl ba mdah leh klei mblang tliêr kjăp čiăng bi mklă hŏng phung đaŏ ti Kôrantô kơ klei đaŏ hlăm Krist mơ̆ng klei djiê kbiă lŏ hdĭp jing klei klă sĭt. Klei đaŏ phung đaŏ kơ Krist kluôm rŏng lăn dưm hlăm tur knơ̆ng klei bi mtlaih hlăm klei djiê leh anăn klei kbiă lŏ hdĭp mơ̆ng Khua Yang Yêsu Krist. Mơ̆ng anăn, phung djiê hlăm Krist ăt srăng dưi lŏ kbiă lŏ hdĭp hŏng Ñu hlăm hruê knhal tuč. Lăn ala knŏng mđing duh kơ klei hdĭp anei, kƀĭn tui duah mnơ̆ng dhơ̆ng ti lăn ala, kyua anăn klei hdĭp amâo mâo ôh klei čang hmăng kơ klei hdĭp lă lar. Phung đaŏ kơ Krist brei duh čiăng mđing kơ mnơ̆ng hlăm adiê (Kôlôs 3:2, Hêbrơ 11:16). Hlăk êjai dôk hdĭp ti lăn ala, brei drei kreh kriăng mă bruă ƀiădah brei hdơr tơdah duh hruê mông, prăk mah, ai tiê kơ mnơ̆ng hlăm lăn ala snăn klei anăn srăng êgao tuč, ƀiădah duh kơ Ƀuôn Ala Mtao Aê Diê srăng dôk lă lar. Ya klei drei ngă kơ Aê Diê amâo srăng luč ôh hlăm hruê drei dưi kbiă lŏ hdĭp hŏng Krist.
Si ngă klei hdĭp drei bi êdah klei đaŏ hlăm Yang Krist kbiă lŏ hdĭp leh anăn mđing kơ mnơ̆ng hlăm adiê?
Wah lač: Ơ Khua Yang Aê Diê, Pô brei Yang Krist kbiă lŏ hdĭp čiăng ba klei kbiă lŏ hdĭp kơ phung đaŏ kơ Ñu hlăm hruê knhal tuč; akâo kơ Ih đru kâo grăp hruê mđing ai tiê kơ mnơ̆ng yuôm bhăn lă lar hlăm Ƀuôn Ala Mtao jăk mơak.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đaŏ Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Dlăng Klei Aê Diê Blŭ hlăm tlâo thŭn: I Y‑Samuel 14:31-52
Kênh Youtube BHKTHN:
