Klei Aê Diê Blŭ: Y‑Đaniel 8:1-12
Êlan kliăng: “Hlei pô mâo knga, brei ñu hmư̆ klei Mngăt Myang lač kơ Phung Sang Aê Diê. …” (Klei Bi Êdah 2:17a).
Klei êmuh ksiêm mĭn: Ya kdrêč msĕ mâo hlăm klei bi ƀuh čih hlăm kdrêč 8 hŏng klei bi ƀuh čih hlăm kdrêč 2 leh anăn 7? Ya ngă Khua Yang yua lu klei bi ƀuh mdê mdê čiăng hưn klei mrâo mrang giăm msĕ snăn mơh? Si hdră Khua Yang yua čiăng mñă kơ drei sa mta klei?
Hlăm kdrêč 2, mtao Nebukatnesar mâo klei bi ƀuh leh kơ sa rup tuh mdê snăk. Êgao 50 thŭn êdei, khua pô hưn êlâo Y‑Đaniel pô yơh mâo klei bi ƀuh hŏng klei hưn mdah čiăng msĕ kơ pă drei hlô dliê prŏng, bi ala kơ pă ƀuôn ala mtao kiă kriê jih lăn ala (kdrêč 7). Leh anăn dua thŭn êdei kơnăn, “thŭn tal tlâo ênuk mtao Belsasar”, khua pô hưn êlâo Y‑Đaniel čih wĭt klei bi ƀuh “leh klei bi ƀuh kâo mâo tal êlâo” (êlan 1) kơ biăp knô leh anăn bê knô. Si ngă sa klei bi ƀuh giăm msĕ kơ klei hưn mdah lŏ mñă wĭt tơl truh tlâo blư̆ hlăm wưng êbeh kơ 50 thŭn msĕ snăn?
Jing klei hlap ai tiê êdi kyua pô mă tŭ klei bi ƀuh hlăm kdrêč 2 jing mtao Nebukatnetsar. Leh anăn hlap ai msĕ mơh, mtao anei amâo dưi hdơr wăt kăn dưi thâo săng kơ klei bi ƀuh anăn. Klei anăn brei klei myun kơ khua pô hưn êlâo Y‑Đaniel tui duah klei thâo săng leh anăn dưi mblang klei êpei anăn. Kyua kdrêč 2 leh anăn kdrêč 7 čih hŏng klei Aram, klei blŭ lar yua tar lăn ala ênuk anăn, snăn kluôm jih ala čar Ƀaƀilôn mă tŭ sơăi klei Khua Yang čiăng hưn mdah.
Êma pluh thŭn dua čô pô mă tŭ klei bi ƀuh mdê mdê ƀiădah sa klei hưn mdah giăm msĕ. 50 thŭn êlâo, tơdah phung ƀuôn sang Yuđa hlăk mrâo kčưm arăng mă jing hlŭn mnă, Aê Diê čiăng kơ khua mtao leh anăn kluôm jih ala čar ñu brei thâo kơ Aê Diê phung Israel yơh sĭt jing Mtao kơ jih jang mtao, jing Pô mdơ̆ng leh anăn bi dlưh mtrŭn phung mtao. Êngao kơnăn, kdrêč 2 bi ruê̆ hŏng klei mtao bi mđĭ khua pô hưn êlâo Y‑Đaniel jing khua prŏng hlăm sang mtao ñu, klei anăn amâo djŏ hĕ jing klei bi mđĭ ai kơ phung ƀuôn sang Israel dôk êdu ai kyua mĭndah Khua Yang lui leh diñu, thâo kơ Aê Diê ăt dôk đru dŏng leh anăn amâo tuôm đuê̆ kbưi mơ̆ng diñu ôh?
Êbeh kơ 50 thŭn êdei, tơdah hruê mmông bi sĭt klei ƀuăn hưn leh mơ̆ng êlâo (Y‑Yêrêmi 29:10-14) giăm truh leh, klei bi ƀuh anăn lŏ mñă dua blư̆ hlăm wưng knŏng dua thŭn (7:1 leh anăn 8:1). Hlăk anăn, phung ƀuôn sang Yuđa hơĭt kjăp leh ti Ƀaƀilôn, ênưih snăk diñu wơr bĭt hĕ klei bi sĭt klei Khua Yang ƀuăn, ênưih snăk kơ diñu knang kơ lăn čar mtao anăn. Klei bi ƀuh lŏ mñă wĭt kñăm čiăng kơ phung ƀuôn sang Aê Diê thâo ƀuh, diñu amâo dưi knang kơ čar Ƀaƀilôn ôh, kyuadah ñu leh anăn phung čar êdei kơnăn jing jhat ƀai leh anăn srăng dlưh rai sơăi.
Khua Yang ăt yua hdră êlan lŏ mñă wĭt ya mta klei čiăng bi hdơr, ƀuah mkra, bi mđĭ ai, thiăm klei čang hmăng kơ drei. Anăn jing sa êlan Klei Aê Diê Blŭ lŏ mñă lu blư̆, klei mñă hlăm ai tiê klei mĭn tơdah drei wah lač, amâodah klei blŭ mơ̆ng sa čô mnuih huĭ mpŭ kơ Aê Diê. Brei drei djăl thâo kral čiăng gưt ngă klei Khua Yang čiăng.
Si ngă Khua Yang tuôm yua lu hdră êlan čiăng mñă kơ drei leh mơ̆?
Wah lač: Ơ Khua Yang, bi mni lač jăk kơ Ih kyua asăp blŭ djơ djĕ êdu êun, ƀiădah kơ phung mâo knga čiăng hmư̆ anăn jing klei blŭ bŏ hŏng klei myang. Akâo kơ Khua Yang đru kâo djăl thâo kral asăp Ih mtô lač kơ kâo.
Dlăng Klei Aê Diê Blŭ hlăm tlâo thŭn: Klei Mmuñ Hđăp 69:1-36
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
