Luka 19:1-10
“Na Sachê iung khan kơ Kră Yang Yêsu: Ơ ‘Bok, dôm mŭk tơmam inh âu, inh wă asong kơ lu bơngai dơnuh hin minh puăt. Păng lu bơngai mă inh pơgŏ iŏk jên, tơmam sư, inh gô tơwih ăn kơ sư lơ hloh kơ đêl inh iŏk, puăn hơtăl.” (Luka 19:8)
Nơ̆r jet tơchĕng pơwao:
– ‘Bok Sachê sư bơngai thoi yơ?
– Tơdrong kiơ tơ’bôh sư rơhing ‘maih tơ’bơ̆p Kră Yang păng tơdrong tơbral tơpă?
– Lu bơ̆n pơm tơ’bôh tơdrong kiơ wă tơbăt kơ bơ̆n tơbral tơpă?
‘Bok Sachê ‘nâu bơngai kơđeh, “pơgơ̆r gah tơdrong iŏk jên thuê̆ păng sư mơdrŏng tih tơpă” (trong 2) Anăn sư “Sachê” wă khan “Bơngai ‘lơ̆ng tơpăt mălei sư arih ưh kơ kiơ̆ thoi anăn sư ‘nei. Bơngai jang iŏk jên thuê̆ kơplah noh sơ̆ sư juăt kơ iŏk lơ hloh kơ đe hơgăt wă kơ chă lơi kơdih thoi noh na đe areh păng ưh kơ wă tơbôl hăm sư. Thoi noh, mă khan sư mơdrŏng tih ră mălei sư oei tam mă lăp jơhngơ̆m ‘mơ̆i.
‘Bok Sachê kơtơ̆ng ang đe roi Yêsu wă brih trong anih sư jang ei, ‘bok mă gơh tơplih păng dŏng lơ bơngai, lăm noh đei lu bơngai pơm yoch, na sư wă lăng hơbŏ Yêsu thoi yơ yua kơ ưh tam lah ‘bôh. Mă khan sư chur chă mơ̆t tơ đe tơpôl lơ ră, mălei sư oei ưh kơ gơh ‘bôh Yêsu ‘mơ̆i yua kơ sư kơđeh dêh, mălei sư ưh kơdŭn. Thoi noh na sư “kơdâu ploi adrol kơ đe, hao tơ kơpal ‘long” hue tơ teh wă kơ gơh ‘bôh Yêsu.
Kră Yang Yêsu ‘bôh jơhngơ̆m adrin păng jơhngơ̆m rơhing ‘maih wă ‘bôh Yêsu. Thoi noh, lăp Yêsu truh noh Yêsu ngơk lăng kơpal ‘long na khan ơ Sachê Ih jur tĕnh, inh wă mơ̆t pơdơh tơ hnam ih năr ‘nâu. Ưh kơ đei tơdrong kiơ pơm kơ ‘bok Sachê hiôk lăm jơ noh! Sư hăt hot jur păng sơng iŏk Yêsu mơ̆t tơ hnam sư. Kơplah tơ’bơ̆p ‘bok Dŏng Pơklaih, jơhngơ̆m sư praih rơhau hiôk păng yua kơ đơ̆ng adrol ki jơhngơ̆m ưh kơ hiôk pơm lơ tơdrong yoch. Na lăm jơ ‘nâu, sư băt kơnăl tơdrong gĭt kăl hloh noh ưh kơ trŏ mŭk tơmam, tơdrong jang mă sư oei jang noh ôh, mălei tơdrong gĭt noh sư gơh klaih bơih, chơt hiôk lăm ‘Bok Krist. ‘Bok Sachê đei jơhngơ̆m tơbral tơpă hăm tơdrong sư pơm tơ’bôh hloi. Sư ưh kơ đei pơjăng pơkă wă tơgŭm lu bơngai dơnuh hoh kơ’bah. Păng hloh kơ noh dơ̆ng, sư lăp đon pơdrâu tơwih kơ lu sư lơ hloh kơ đêl inh iŏk puăn hơtăl. ‘Nâu bơih tơdrong tơ’bôh jơhngơ̆m tơbral tơpă ưh kơ trŏ khan tơbral ưh kơ đĭ jơhngơ̆m ôh. Kră Yang Yêsu ‘bôh rơđah jơhngơ̆m, tơbral tơpă, na Sư khan: “Năr âu ‘Bok Kei-Dei pơklaih hnam dơnŏ iĕm bơih.” Kră Yang wă pơma kơ ‘bok Sachê đei tơplih tơpă bơih. Păng ‘nâu kư̆m tơdrong kơnhăm Kră Yang kơplah Sư jur tơ ala teh wă “chă lu bơngai kuơ̆l kơ trong wă pơklaih yoch sư.” Kơplah minh ‘nu bơngai tơbral tơpă, bơngai noh athei tơbral păng achăng tơdrong yoch mă bơ̆n juăt kơ pơm, ưh kơ sĭ pơlăp hăm nơ̆r pơma đĕch ôh mălei athei pơm tơ’bôh hloi. ‘Bai ‘bok Pôl bơtho kơ đĭ đăng “Athei tơbral păng wih brŏk tơ Kră Yang na pơm kiơ̆ tơdrong ‘lơ̆ng wă kơ đe băt lu sư tơbral kơdih tơpă.” (Tơdrong jang 26:20) Tơbral tơpă athei pơm tơ’bôh tơdrong ‘lơ̆ng.
Ơ Kră Yang, inh bơnê kơ Ih yua kơ Ih chă păng pơklaih inh. Apinh Ih mơnat dôm yoch inh oei pơgơ̆r lăm jơhngơ̆m inh. Apinh Ih tơgŭm inh băt kơnăl tơdrong yoch inh oei pơm, wă kơ inh đĭ jơhngơ̆m tơbral hăm tơ’bôh tơpă. Krao khan yua anăn Kră Yang Yêsu Krist, Amen!
Lu bơ̆n hăm pơ̆n nuih hŭt tơdrong bơ̆n kơdih na wă sơng iŏk Kră Yang Yêsu ưh?
Đŏk Sơ̆p Hla bơar ‘Bok Kei-Dei lăm pêng sơnăm: II Lu Pơtao 1
Kênh Youtube BHKTHN:
