Klei Aê Diê Blŭ: Klei Kbiă 23:14-19.
Êlan kliăng: “Tlâo bliư̆ grăp thŭn brei ih ngă klei knăm mpŭ kơ kâo.” (Klei Kbiă 23:14)
Klei êmuh ksiêm mĭn: Aê Diê bi hriăm phung ƀuôn sang Israel si bĕ ngă čiăng bi êdah ai tiê mpŭ leh anăn hdơr knga kơ Aê Diê? Ya klei yuôm bhăn mơ̆ ng dŭm knăm prŏng anei? Hruê anei ya bruă drei ngă čiăng bi êdah ai tiê mpŭ leh anăn hdơr knga kơ Aê Diê?
Aê Diê bi hriăm phung ƀuôn sang Ñu pioh tlâo mta klei knăm prŏng hlăm thŭn sĭt mŭt hlăm Lăn Aê Diê Ƀuăn. Êlâo hĭn, Knăm Kpŭng Amâo Mâo Kpei (êlan 15); hlăm mlan mdiê ƀlĕ, mơ̆ng tlam hruê 14-21/1 hluê si hruê mlan phung
Yuđa (hlăm brô krah mlan 3 truh krah mlan 5), phung ƀuôn sang Aê Diê ƀơ̆ ng kpŭng amâo mâo kpei hlăm kjuh hruê (Klei Kbiă 12:15-20; 13:3-10).
Hlăm knăm prŏng anei, brei grăp čô mnuih nao kkuh mpŭ kơ Aê Diê hŏng mnơ̆ ng myơr bi êdah ai tiê hdơr knga. Đăm myơr ôh êrah mnơ̆ ng ngă yang mpŭ kơ kâo mbĭt hŏng kpŭng mâo kpei, leh anăn đăm pioh prăi gơ̆ tơl truh kơ aguah ôh (êlan 18). Phung ƀuôn sang Aê Diê amâo dưi tŭk êđai bê hlăm êa ksâo ana gơ̆ ôh msĕ si hdră phung ƀuôn sang Kanaan kkuh kơ rup yang digơ̆ (êlan 19). Anei jing klei găl kơ phung ƀuôn sang Aê Diê ruah lŏ bi hdơr leh anăn lŏ yăl dliê kơ anak čô dŭm klei yăl dliê yuôm bhăn sĭt Aê Diê ba phung ƀuôn sang Israel kbiă mơ̆ ng čar Êjip, mphŭn mơ̆ ng mlam Knăm Klei Găn leh anăn jih kjuh hruê êdei anăn aduôn aê diñu ƀơ̆ng leh kpŭng amâo mâo kpei. Bruă anei lač kơ phung ƀuôn sang Aê Diê ruah leh anăn anak čô diñu thâo Aê Diê jing pô prŏng hĭn, Ñu khăp leh anăn bi mtlaih digơ̆ si bĕ ngă leh anăn mñă kơ diñu hdĭp mpŭ kơ Khua Yang năng hŏng klei pap Aê Diê brei leh kơ hjăn diñu.
Tal dua, Knăm Yan Puôt (êlan 16,19), leh knăm kpŭng amâo mâo kpei kjuh hruê kăm. Hlăm akŏ yan puôt wiă, leh boh mnga hlâo hlang dưi hrui êmiêt, phung ƀuôn sang
Aê Diê ba boh mnga hlâo hlang jăk hĭn myơr kơ Aê Diê bi êdah ai tiê hdơr knga kơ Ñu brei leh yan puôt jăk siam, brei mnơ̆ ng dhơ̆ng rông digơ̆ .
Tal tlâo, Knăm Pioh Êmiêt, lŏ pia jing Knăm Sang Čhiăm (Bruă Lêwi 23:34), mkŏ mjing kjuh hruê hlăm kngal jih yan puôt, mơ̆ ng hruê 15-22/7 hluê si hruê mlan phung Yuđa (hlăm brô krah mlan 9 truh krah mlan 10), čiăng lŏ hdơr dŭm hruê phung ƀuôn sang Israel hdĭp hlăm dŭm sang čhiăm leh Aê Diê ba diñu kbiă mơ̆ ng Êjip (Bruă Lêwi 23:43).
Jih tlâo mta knăm prŏng phung ƀuôn sang Israel kñăm đru kơ diñu leh anăn anak čô diñu hdơr kơ klei kbiă mơ̆ ng klei jing hlŭn čar Êjip čiăng mphŭn sa hdră mrâo, dưi jing phung ƀuôn sang Aê Diê ruah; thâo klei kiă kriê, rông ba leh anăn klei Aê Diê hơêč hmưi čiăng hdĭp hdơr knga kơ Ñu leh anăn myơr klei jăk hĭn kơ Ñu. Grăp čô phung đaŏ ăt mâo sa klei bi knăl wưng Khua Yang Yêsu bi mtlaih mơ̆ng sa klei hdĭp tram hlăm klei soh jing sa klei hdĭp mrâo mâo klei bi mtlaih, dưi hdĭp hlăm klei Aê Diê kiă kriê. Brei drei hdơr čiăng bi êdah ai tiê hdơr knga kơ Aê Diê, mpŭ kơ Ñu leh anăn myơr kơ Ñu ya klei jăk hĭn mơ̆ng klei tŭ drei mă bruă.
Ya klei yăl dliê diih čiăng yăl dliê kơ anak čô čiăng đru kơ digơ̆ thâo kral Aê Diê leh anăn sĭt suôr mă bruă kơ Aê Diê.
Ơ Khua Yang, kâo hdơr nanao Khua Yang Yêsu săn leh asei ti kyâo bi kal čiăng bi mtlaih kâo. Akâo kơ Ih đru kâo sĭt suôr mă bruă kơ Ih hŏng ai tiê hdơr knga čiăng kơ anak čô tui hluê đaŏ knang leh anăn lŏ dơ̆ ng mă bruă Aê Diê, dưi dưn klei jăk mơak hlăm klei hdĭp anei leh anăn wăt anôk lă lar.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đaŏ Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Dlăng Klei Aê Diê Blŭ hlăm tlâo thŭn: Klei Mtô Mñă Klei Bhiăn 9:7-10:11
Kênh Youtube BHKTHN:
