Klei Aê Diê Blŭ: Y‑Mathiơ 12:41‑42
Êlan kliăng: “Ƀiădah hŏng klei blŭ anăn mơh phung adiê leh anăn lăn ala ară anei Aê Diê pioh kơ pui bi rai ti hruê phat kđi leh anăn klei bi rai phung amâo mpŭ kơ Aê Diê ôh.” (II Y‑Pêtrôs 3:7)
Klei êmuh ksiêm mĭn: Khua Yang Yêsu lač ti hruê phat kđi srăng mâo hlei pô kgŭ mbĭt čiăng phat kđi phung khua čih hră leh anăn phung Pharisi? Ya ngă Khua Yang lač msĕ snăn? Ya klei hriăm drei mâo mơ̆ng trăn Klei Aê Diê Blŭ anei?
Hlăm êlan 41, Yang Yêsu lŏ dơ̆ng yăl dliê kơ Y‑Yôna čiăng phat kđi phung khua čih hră leh anăn phung Pharisi. Ñu lač: “Ti hruê phat kđi phung mnuih ƀuôn sang Niniwơ srăng kgŭ mbĭt hŏng phung găp djuê anei leh anăn phat kđi diih…” (êlan 41a). Tơdah hmư̆ Y‑Yôna hưn klei bi kmhal srăng truh snăn mă mơ̆ng mtao hlŏng kơ phung ƀuôn sang kmhal sơăi kơ klei soh diñu (Y‑Yôna 3:5‑6). Phung mnuih ƀuôn sang ƀuôn Niniwơ amâo mâo kkuh mpŭ kơ Aê Diê ôh, kăn thâo kral Khua pô hưn êlâo Y‑Yôna rei, ƀiădah tơdah hmư̆ klei Aê Diê blŭ diñu kmhal kơ klei soh diñu leh anăn mâo klei pap brei. Bi Khua Yang Yêsu, jing Pô prŏng hĭn kơ Y‑Yôna, leh anăn phung Yuđa mâo klei bhiăn, thâo kral leh Aê Diê ƀiădah diñu hngah hĕ kơ klei Khua Yang Yêsu mtô, phat kđi leh anăn kčŭt mčeh kơ Gơ̆.
Msĕ mơh, Khua Yang Yêsu yua klei yăl dliê kơ mtao mniê Sêƀa hriê kơ ƀuôn Yêrusalem tơdah hmư̆ hing klei yăl dliê kơ klei mtao Y‑Salômôn thâo mĭn leh anăn kơ Anăn Yêhôwa (I Bruă Mtao 10:1‑9). Sêƀa kbưi hŏng Israel giăm 2.000 kilômet tĭng Ngŏ Dhŭng, dơ̆ng mơ̆ng anôk kbưi anăn, mtao mniê ăt tui duah čiăng hmư̆ mơh klei mtao Y‑Salômôn thâo mĭn. Bi phung khua čih hră leh snăn phung Pharisi dôk giăm snăk hŏng Khua Yang Yêsu, amâo djŏ diñu knŏng hmư̆ mă kơ klei Aê Diê jing prŏng ôh, ƀiădah wăt diñu thâo mơh êlan čiăng dưi mŭt hlăm ƀuôn ala mtao Aê Diê, wăt snăn dưn mơh, diñu ăt bi kdơ̆ng leh anăn hngah kơ klei Yêsu bi mtlaih, Pô prŏng hĭn kơ mtao Y‑Salômôn.
Trăn Klei Aê Diê Blŭ anei brei kơ drei mông găl pioh ksiêm dlăng kơ drei pô. Êjai grăp čô phung đăo ênưih sơăi dưi dưn sa pŏk hdruôm hră Klei Aê Diê Blŭ, ƀiădah si ngă drei dlăng leh anăn tui hlue ngă leh mơ̆ jih klei čih hlăm anăn? Grăp hruê drei êpa mhao čiăng thâo săng lu hĭn mơ̆ kơ Pô Bi Mtlaih drei? Phung mnuih ƀuôn sang ƀuôn Niniwơ kmhal klei soh tơdah hmư̆ klei Aê Diê mtă brei răng, bi drei lu blư̆ amâo mđing mĭn ôh kơ klei jing klei hdĭp myang drei, leh anăn ƀai hĭn amâo čiăng hmư̆ Klei Khua Yang blŭ ktrâo jih klei soh drei dôk ngă. Mtao mniê Sêƀa êpa mhao čiăng thâo klei thâo mĭn leh snăn klei prŏng Aê Diê. Bi drei dôk hriăm čiăng thâo lu hĭn kơ Aê Diê grăp hruê, dôk êpa mhao čiăng grăp hruê ƀrư̆ thâo săng êlam hĭn kơ Ñu mơ̆? Đăm lui truh ti hruê phat kđi, drei dôk hĕ ti anôk phung tŭ klei arăng phat kđi ôh. Aê Diê brei kơ drei mâo lu klei găl hĭn kơ phung ƀuôn sang ƀuôn Niniwơ leh anăn mtao mniê Sêƀa, đăm brei drei tŭ klei phat kđi leh anăn tŭ klei bi kmhal ôh ti hruê Aê Diê phat kđi.
Mâo mơ̆ klei amâodah klei soh Klei Aê Diê Blŭ dôk ƀuah drei? Drei srăng tŭ klei phat kđi hĕ amâodah mă tŭ klei mưn ti hruê Aê Diê phat kđi?
Wah lač: Ơ Khua Yang, bi mtlaih bĕ kâo mơ̆ng ai tiê khăng, đru kâo thâo kral klei mtă mơ̆ng Klei Ih Blŭ brei răng kơ klei awăt kâo čiăng kâo kmhal bi djăl leh anăn amâo tŭ klei bi kmhal ôh ti hruê Ih phat kđi lăn ala anei.
Dlăng Klei Aê Diê Blŭ hlăm tlâo thŭn: Y‑Ôsê 13:1‑14:9
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
