Efexus 6:14-20
Nqe cim:
“Ib puas tsav yam uas nej ua no, nej yuav tsum thov Vajtswv pab. Nej yuav tsum thov Vajtswv txhua lub sijhawm raws li Vajtswv tus Ntsujplig coj nej. Vim li ntawd nej yuav tsum ceevfaj thiab ua siab ntev thov Vajtswv tsis txhob nkees. Thiab niaj hnub thov Vajtswv pab cov ntseeg sawvdaws” (Efexus 6:18)
Lus nug rau sawvdaws xav:
– Vaj Ntsujplig muaj feem xyuam twg hauv kev thov Vajtswv?
– Tej lus thov Vajtswv cheemtsum muaj plaub yam tseemceeb twg?
– Peb pom yus cheemsum loj hlob rau yam twg?
Kev thov Vajtswv tsis sau nrog hauv Vajtswv cov cuabyeej (nqe 14-17) tiamsis yog yam uas yuavtsum muaj hauv pluav rog sab ntsujplig. Kawm muaj Vajtswv tej cuabyeej tsis yog ua haujlwm zoo li kevcai, tiamsis yog qhia tshwm hais tias peb vamkhom Vajtswv thiab kev thov Vajtswv yog qhov uas qhia tshwm meej tshaj li ntawd. Thov Vajtswv yog lub plag siv cov cuabyeej sab ntsujplig, vim yog lub neej tsis vamkhom Vajtswv hauv kev thov Vajtswv ces yeej tsis muaj zog tawmtsam lub hwjchim tsaus ntuj. Pog Corrie Ten Boom, yog ib tug ntseeg Netherlands (Hà Lan) ciaj sia dim hauv lub teb chaws Yelemees lub chaw kaw neeg los, nws hais tias: “Thaum ib tug ntseeg tsis muaj kev sib txuas nrog lwm tus ntseeg, dab ntxwgnyoog luag ntxhi. Thaum tus ntseeg ntawd tsis nyeem Vajluskub lawm, dab ntxwgnyoog luag nrov. Thaum tus ntseeg ntawd tsis thov Vajtswv lawm, dab ntxwgnyoog xyiv fab zoo siab kawg”.
Thov Vajtswv yog sib txuas lus nrog Vajtswv, vim li ntawd yuavtsum tau Vaj Ntsujplig coj kev, vim Vaj Ntsujplig paub Vajtswv lub siab nyiam thiab pab peb thov raws li Vajtswv siab nyiam (Loos 8:27). Tej lus thov Vajtswv yuavtsum muaj plaub yam tseemceeb no. Tim ib, “siv zog” (HMOWSV) kuj muaj lub ntsiab tias “tsis tu ncuas” lossis “txhua lub sijhawm”. Ntau tus tsuas thov Vajtswv thaum ntsib teebmeem xwb, thov Vajtswv tsis yog tsuas yog haukev daws teebmeem tiamsis yog sib txuas nrog Vajtswv thiab peb yuavtsum thov Vajtswv tsis tu ncua vim pluav rog nrog lub hwjchim tsaus ntuj tsis muaj hnub xaus.
Tim 2, xyaum “txhua yam kev thov Vajtswv thiab taij thov”. Ib txhia thooj yim hais tias thov Vajtswv ces yog kev taij thov lossis thov, tiamsis thov Vajtswv kuj muaj kev hu nkauj thiab pehawm Vajtswv (Mathais 6:9-10), qhia yus lub siab tabmeeg Vajtswv (2 Xamuyees 7:27), thiab nyob ntsiag to mloog Vajtswv lub suab (Yaxayas 50:4).
Tim 3, “tsim xeev ua siab ntev txaus nkaus”. Tsim xeev yog yam uas tseemceeb hauv kev thov Vajtswv. Tswv Yexus ceebtoom nws cov thwjtim yuavtsum ceevfaj tsim xeev kom tsis poob rau txoj kev dag ntxias (Malakaus 14:34-38). Peb yuavtsum tsim xeev zoo vim peb tus yeebncuab tsis muaj sijhawm so li (1 Petus 5:8), thiab vim peb pheej pw tsaus zog hauv lub sijahwm cheemtsum thov Vajtswv. Tsuas yog kev tsim xeev ceevfaj thiaj ua tau rau peb tsis qaug zog thiab ua taus siab ntev rau hauv kev thov Vajtswv.
Tim 4, “niaj hnub thov Vajtswv pab cov ntseeg sawvdaws”. Cov kwvtij ntseeg txhua tus puavleej tabtom koom nyob ua ke hauv pluav rog sab ntsujplig nrog peb, thiab txhua tus puavleej cheemtsum ib leeg thov Vajtswv rau ib leeg. Paulus los yeej cheemtsum pawg ntseeg thov Vajtswv pab nws (nqe 19-20) vim nws paub hais tias nws tsis muaj txaus zog tawmtsam yeej lub hwjchim tsaus ntuj yog tsis muaj cov ntseeg thov Vajtswv pab nws.
Thov Vajtswv,
Vajtswv, nyuam yaus ua Koj tsaug, vim nyuam yaus paub hais tias muaj cov kwvtij hauv pawg ntseeg pheej thov Vajtswv pab nyuam yaus. Thov pab nyuam yaus kuj nco txog cov kwvtij ntseeg thiab ua siab ntev thov Vajtswv pab rau lawv thiab. Nyuam yaus tuav Yexus Khetos lub npe thov, Amees.
Peb puas ua siab ntev, ceevfaj thiab ib leeg thov Vajtswv rau ib leeg?
Nyeem Vajluskub hauv peb lub xyoos: Yaxayas 34
Kênh Youtube BHKTHN:
