Klei Aê Diê Blŭ: Êphêsô 6:14-20
Êlan kliăng: “Hŏng Yang Mngăt Jăk wah lač jêñ jêñ leh anăn kwưh. Răng kơ klei anăn nanao hŏng klei gĭr, êjai wah lač brei kơ jih jang phung doh jăk.” (Êphêsô 6:18)
Klei êmuh ksiêm mĭn: Ya anôk bruă Yang Mngăt Jăk mâo hlăm klei wah lač? Ya pă mta klei yuôm brei mâo hlăm klei wah lač? Ya mta klei čiăng kơ drei bi mđĭ hĭn?
Klei wah lač amâo yap mbĭt hlăm kdrăp mnơ̆ng bi blah mơ̆ng Aê Diê ôh (êlan 14-17) ƀiădah jing klei čoh čuăn yuôm hlăm kdrăn blah myang. Kdrăp mnơ̆ng klei bi blah mơ̆ng Aê Diê amâo djŏ jing sa mnơ̆ng êran mơ̆ng klei mkra mjing hŏng kngan mnuih ôh, ƀiădah jing klei bi êdah klei jao jih drei pô kơ Ñu, leh anăn klei wah lač yơh jing klei bi êdah klă mngač hĭn. Wah lač ăt jing atur kơ mnơ̆ng bi blah myang ngă bruă, kyua tơdah klei hdĭp amâo jao jih kơ Khua Yang hlăm klei wah lač, snăn amâo mâo klei ktang dưi bi blah hŏng klei myang klei mmăt ôh. Corrie Ten Boom, sa čô đăo kơ Krist ti Hà Lan adôk hdĭp mơ̆ng anôk phung kahan Đức krư̆ kđăl, lač snei: “Tơdah sa čô đăo kơ Krist amâo bi mguôp ôh hŏng phung đăo kơ Krist mkăn, yang jhat tlao ƀuñ. Tơdah mnuih anăn mdei dlăng Klei Aê Diê Blŭ, yang jhat tlao hơ̆k. Tơdah mnuih anăn mdei wah lač, yang jhat ur driâo hơ̆k hdơ̆k”.
Wah lač jing klei bi mguôp hŏng Aê Diê, kyuanăn brei mâo klei atăt gai mơ̆ng Yang Mngăt Jăk kyuadah Ñu jing Pô thâo klei Aê Diê čiăng leh anăn đru drei wah lač tui si klei Aê Diê čiăng (Rôm 8:27). Klei wah lač brei mâo pă mta klei yuôm msĕ snei. Tal sa, “jêñ jêñ”. Mblang jing “ngă nanao” amâodah “grăp mnĭt mmông”. Lu mnuih knŏng wah lač tơdah tuôm hŏng klei dleh truh, ƀiădah wah lač amâo djŏ knŏng jing klei pioh mgaih mkra klei dleh truh ôh, ƀiădah wăt jing klei bi mguôp hŏng Aê Diê, leh anăn brei drei wah lač nanao, kyuadah klei bi blah hŏng klei myang klei mmăt amâo tuôm jih ruê̆ ôh.
Tal dua, ngă hŏng “djăp mta klei wah lač leh anăn kwưh akâo”. Mâo đa đa mnuih yap klei wah lač hŏng klei kwưh akâo jing sa, ƀiădah klei wah lač mâo mbĭt wăt klei mmuñ bi mni leh anăn kkuh mpŭ kơ Aê Diê (Y-Mathiơ 6:9-10), hưn êdah ai tiê drei pô ti anăp Aê Diê (II Y-Samuel 7:27), leh anăn wăt mbĭt hŏng klei dôk kriêp ñăt kăp mđing hmư̆ asăp Khua Yang blŭ msĕ mơh (Y-Êsai 50:4).
Tal tlâo, “răng kơ klei anăn nanao hŏng klei gĭr”. Dôk răng jing sa mta klei yuôm hlăm klei wah lač. Khua Yang Yêsu mñă kơ phung khua ƀĭng kna brei dôk răng čiăng đăm lĕ ôh hlăm klei mplư (Y-Markôs 14:34-38). Brei drei dôk răng kyuadah pô roh drei amâo tuôm dôk mdei ôh (I Y-Pêtrôs 5:8), leh anăn kyuadah drei khăng pĭt wơr êjai mmông čiăng brei drei wah lač. Hŏng klei dôk răng yơh đru drei dôk gĭr hlăm klei wah lač.
Tal pă, “wah lač brei kơ jih jang phung doh jăk”. Phung ayŏng amai adei sa klei đăo dôk hlăm sa kdrăn bi blah myang mbĭt hŏng drei, leh anăn grăp čô čiăng sơăi mâo klei wah lač brei kơ hdơ̆ng drei. Khua bĭng kna Y-Pôl pô ăt čiăng kơ Phung Sang Aê Diê wah lač brei kơ ñu msĕ mơh (êlan 19-20) kyuadah ñu thâo ñu amâo mâo djăp klei ktang dưi bi blah hŏng klei myang klei mmăt ôh tơdah kƀah klei wah lač brei mơ̆ng phung đăo.
Si ngă drei dôk gĭr, dôk răng leh anăn wah lač brei kơ hdơ̆ng drei mơ̆?
Wah lač: Ơ Khua Yang, bi mni kơ Khua Yang kyuadah kâo thâo mâo phung ayŏng amai adei hlăm Phung Sang Aê Diê dôk wah lač brei kơ kâo nanao. Brei kâo ăt hdơr mơh kơ ayŏng amai adei kâo leh anăn dôk gĭr wah lač kơ digơ̆. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y-Êsai 34
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
