Yelemis 31:15-20
Nqe cim:
“Kuv hnov haivneeg Yixalayees seev hais tias, Tus Tswv, peb zoo ib yam li tus tsiaj uas tsis muaj tswv cob, tiamsis koj cob qhia peb kom mloog koj lus. Thov koj coj peb rov los, peb zoo siab tig rov los cuag tus Tswv uas yog peb tus Vajtswv” (Yelemis 31:18).
Lus nug rau sawvdaws xav:
- Tus cev lus Yelemis muab cov Yixalayees kev ua txhaum piv zoo li cas?
- Saib los ntawm dab tsi cov Yixalayees thiaj tsis ntshai tig rov los cuag tus Tswv?
- Thaum twg peb yuam kev ua txhaum ni yuav tau ua dab tsi kom tig rov los cuag tus Tswv?
Thaum cov Yixalayees seev hais tias lawv raug tus Tswv qhuab ntuas ntau kawg lawm, nimno thov tus Tswv pab kom lawv tau rov los, thiab lawv ntseeg hais tias yuav tau rov los vim tus Tswv yog lawv tus Vajtswv (nqe 18). Vajtswv haiv neeg raug Vajtswv rau txim tau muab piv ib yam li tus nyuj uas cob tsis tau seej. Tiamsis haiv neeg Yixalayees tig los tas siab lees kev txhaum rau Vajtswv thiab paub hais tias lawv tau ua txhaum tawm tsam Vajtswv lawm. Tiamsis nim no lawv tig rov los lees kev txhaum rau tus Tswv uas yog tus hlub lawv kawg nkaus, tus uas zam txim pub rau lawv thiab tus uas yuav hloov lawv lub neej dua tshiab.
Ib tug nyuj uas zoo rau tus tswv siv yog tus nyuj ntawd cob seej lawm, mloog tus tswv lus thiab ua tau haujlwm muaj nqis rau tus tswv. Tiamsis tes haujlwm cob kom seej yuav ua rau tus nyuj tsis swm thiab tsis xav kwv tus quab los muaj. Ib yam li tus nyuj uas raug cob, cov Yixalayees xav hais tias, lawv raug txaj muag thiab raug poob ntsejmuag thaum tus Tswv cob kom lawv txawj mloog lus. Cov Yixalayees tsis ntshai thov kom tau rov los, vim Vajtswv yog lawv lub chaw vam siab, yog tus uas hlub lawv kawg nkaus, txawm yog lawv tau ua txhaum tawm tsam tus Tswv lawm los, tus Tswv tseem nco ntsoov txog Nws haiv neeg (nqe 20).
Tus Tswv yuav so Nws haiv neeg hauv lub nroog Lamas tej kua muag, pub rau lawv muaj kev cia siab thaum kawg. Cov Yixalayees thov kom tau tus Tswv rov hloov lawv dua tshiab, tus Tswv txaus siab ua li ntawd. Tus Tswv pom lawv lub siab tas siab lees kev txhaum thiab tus Tswv kev hlub uas loj kawg nkaus tseem muaj nplua mias pub rau lawv, lawv thiaj tau rov los cuag tus Tswv. Hauv lub neej, muaj tej zaum tau ua txhaum tawm tsam tus Tswv, peb kheev xav nkaum lossis xav qaij khiav deb tus Tswv, qaij deb cov ntseeg thiab Vajtswv lub pawg ntseeg. Thaum muaj li ntawd, peb yuav tsum nco txog Vajtswv txoj kev hlub uas muaj loj kawg nkaus, tseem hlub tshua txog peb, txawm hais tias peb yuav ua txhaum loj npaum twg. Qho ntawd yog txoj kev vam siab uas Vajtswv haiv neeg tau muaj rau ntawm Vajtswv. Cia li kawm cov Yixalayees tus qauv uas tig rov los cuag tus Tswv, los thov kom tau rov los koom nrog tus Tswv, thiab koom nrog lub pawg ntseeg uas yog tus Tswv lub cev.
Thaum yuam kev ua txhaum, peb puas thov Vajtswv pab kom tau rov los nyob hauv Nws txoj kev hlub?
Thov Vajtswv,
Vajtswv tus uas muaj kev hlub! Nyuam yaus ua koj tsaug vim nyob hauv Koj nyuam yaus muaj chaw vam siab. Thov pab nyuam yaus nco ntsoov tig rov los cuag Koj thaum uas nyuam yaus mus yuam kev kawm, kom nyuam yaus tau Koj hlub tsis tseg. Amees.
Nyeem Vajluskub hauv peb lub xyoo: II.Xwmtxheej Vajntxwv 29:12-36
Phab Xa Suab Lus nrog rau Phab Cob Qhia Tus Ntseeg koom tes txhim muaj.
Txhua yam kev pab tswvyim txhim kho, thov nej sau ntawv xa rau lub chaw: kawmvajluskubtxhuahnub@gmail.com
Tshooj Youtube BHKTHN: https://www.youtube.com/c/bhkthn
