Klei Aê Diê Blŭ: Yêrêmi 31:15-20
Êlan kliăng: “Kâo hmư̆ leh phung Êphraim krao,‘Ih mkra kâo leh msĕ si sa drei êđai êmô ka arăng mjuăt, leh anăn kâo tŭ leh klei anăn; atăt bĕ kâo wĭt čiăng kơ kâo dưi lŏ mâo klei jăk jĭn, kyuadah Ih jing Yêhôwa Aê Diê kâo!”(Y‑Yêrêmi 31:18).
Klei êmuh ksiêm mĭn: Hŏng ya klei Khua pô hưn êlâo Y‑Yêrêmi bi hmô klei Êphraim ngă soh? Mơ̆ng ya klei phung ƀuôn sang Aê Diê jhŏng akâo dưi lŏ wĭt hŏng Khua Yang? Ya klei drei ngă čiăng lŏ wĭt kơ Khua Yang hlăm grăp bliư̆ drei ngă soh?
Êphraim ur krao kơ klei hdĭp djuê ana pô diñu tŭ klei Aê Diê bi kmhal, leh anăn ară anei akâo kơ Aê Diê pap brei kơ diñu dưi lŏ wĭt, snăn diñu đaŏ sĭt srăng dưi lŏ wĭt kyua Ñu jing Aê Diê kơ diñu (êlan 18). Phung ƀuôn sang Aê Diê bi hmô klei Aê Diê ƀuah mkra klei diñu ngă soh msĕ si sa (drei) êđai êmô arăng ka hriăm mjuăt. Êphraim bi êdah ai tiê kmhal klei soh leh anăn thâo kyua dôk êdu awăt, anăn diñu bi kdơ̆ng leh anăn bi ênguôt Aê Diê, ƀiădah ară anei diñu thâo kral leh Ñu jing Aê Diê kơ pô, jing Aê Diê bŏ hŏng klei pap kơ djuê ana diñu, leh anăn knŏng Ñu jing pô mâo klei dưi pap brei leh anăn bi mrâo kơ djuê ana diñu.
Sa drei êđai êmô ka arăng mjuăt čiăng kơ pô ba yua snăn klei tal êlâo jing ñu hriăm gui knông, leh mưng, ñu srăng gưt asăp leh anăn tŭ dưn kơ khua. Wăt tơdah hdră anei brei mâo klei hriăm mjuăt suăi êmăn kyua knông srăng ngă kơ êđai êmô dleh dlan leh anăn amâo čiăng gui ôh. Msĕ si êđai êmô, Êphraim ƀuh diñu ba klei hêñ mơ̆ng phung mda asei leh anăn lač mông diñu tŭ klei bi kmhal jing klei ƀuah mkra čiăng thâo gưt asăp hĭn. Diñu jhŏng akâo lŏ wĭt kyua Yêhôwa ăt jing phŭn čang hmăng kơ phung ƀuôn sang Ñu, Ñu jing Aê Diê kơ digơ̆ leh anăn klei Aê Diê pap ăt adôk nanao, wăt tơdah hlăk êjai bi kdơ̆ng diñu bi ênguôt Aê Diê, ƀiădah Aê Diê ăt hdơr nanao kơ phung ƀuôn sang Ñu (êlan 20).
Yêhôwa sŭt êa ală kơ phung ƀuôn sang Ñu ti ƀuôn Rama, brei kơ diñu klei čang hmang hlăm ênuk knhal tuč. Êphraim akâo klei bi mrâo mơ̆ng Yêhôwa leh anăn Ñu mơak wĭt lač. Aê Diê ƀuh ai tiê kmhal hlăm diñu leh anăn klei Aê Diê pap ăt êbeh dlai čiăng brei kơ diñu klei găl dưi lŏ wĭt hŏng Aê Diê hŏng ƀuôn ƀuôn prŏng diñu. Hlăm klei hdĭp, lu blư̆ ngă soh, drei čiăng đuê̆ dăp kbưi hŏng Aê Diê leh anăn ñĕ kơ ayŏng adei hlăm Sang Aê Diê. Hlăk mmông anăn, brei drei hdơr kơ klei Yêhôwa pap, wăt tơdah si drei jing Ñu ăt khăp ăt hdơr kơ drei lu snăk. Anei jing klei đaŏ knang mơ̆ng phung ƀuôn sang Aê Diê, brei drei hriăm tui si klei bi hmô Êphraim êran nao kơ Aê Diê čiăng akâo dưi lŏ wĭt hŏng Ñu, leh anăn hŏng asei mlei myang mơ̆ng Aê Diê jing Sang Aê Diê.
Sĭt ngă soh drei akâo kơ Aê Diê dưi lŏ wĭt hlăm klei khăp Aê Diê mơ̆?
Wah lač: Ơ Aê Diê bŏ hŏng klei pap! Kâo bi mni lač jăk kơ Ih kyua hlăm Ih kâo mâo klei đaŏ knang, akâo kơ Khua Yang brei kâo thâo wĭt kơ Ih sĭt ngă soh čiăng kâo dưi dôk nanao hlăm klei pap Aê Diê.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Dlăng Klei Aê Diê Blŭ hlăm tlâo thŭn: II Klei Yăl Dliê 29:12-36
Kênh Youtube BHKTHN:
