Klei Aê Diê Blŭ: Klei Bi Hriêng 14:16-18
Êlan kliăng: “Mnuih thâo mĭn thâo răng leh anăn weh đuĕ mơ̆ng klei soh, ƀiădah mnuih mluk ngă mgao amâo thâo răng ôh.” (Klei Bi Hriêng 14:16).
Klei êmuh ksiêm mĭn: Si klei mdê hlăm klei hdĭp mnuih thâo mĭn hŏng mnuih mluk? Ya ngă brei thâo răng ai tiê klei mĭn pô? Ya klei blŭ, bruă ngă, amâodah ya knuih drei akâo kơ Khua Yang đru drei bi mlih?
Hlăm klei bi blŭ hrăm, mâo lu mnuih čiăng bi êdah pô amâodah čiăng hưn pô ktang, amâo êdu hĭn kơ hlei pô ôh, anăn khăng lač: “Kâo ka tuôm thâo huĭ kơ hlei pô ôh”, amâodah “ Klei kâo blŭ ka tuôm soh ôh”, amâodah “Kâo amâo čiăng kơ hlei pô ôh”, amâodah “Klei kâo lač jing djŏ hĭn”… Sĭt nik, dŭm klei blŭ msĕ snăn knŏng bi êdah klei mluk, kƀah klei ksiêm mĭn bi nikmơ̆ng pô blŭ. Knŏng hlăm dŭm êlan Klei Aê Diê Blŭ hlăm Klei Bi Hriêng, Mtao Y‑Salômôn ktrâo lač kơ klei hdĭp mdê plah wah mnuih thâo mĭn hŏng mnuih mluk. Mnuih thâo mĭn “thâo răng leh anăn weh đuĕ mơ̆ng klei soh” (êlan 16) leh anăn klei pah mni kơ diñu jing “mâo đuôn mtao klei thâo săng” (êlan 18), lač kơ klei guh kơang leh anăn klei dưi mnuih thâo mĭn. Mklăk wĭt, mnuih mluk snăn mgao, djăl ngêñ, ngă bruă kƀah klei bi mĭn, bi mĭn kơ klei soh, ƀiădah bruă diñu ngă knŏng jing klei mluk, kyua hdĭp snăn ênưih ngă soh hŏng Khua Yang leh anăn hŏng pô mkăn.
Pô mâo bruă knuă prŏng, arăng mpŭ lu hĭn snăn brei thâo răng hĭn hlăm klei hdĭp, thâo răng leh anăn weh đuê̆ kơ klei soh. Mnuih blŭ mgao, arăng amâo mpŭ ôh, mklă wĭt arăng srăng tlao mưč. Ti êngao năng ai mâo lu mnuih huĭ kyua pô anăn ngă khua prŏng ƀiădah hlăm ai tiê arăng bi êmut, dlăng hơaĭ mang. Ƀiădah mnuih thâo mĭn snăn thâo “huĭ mpŭ kơ Yêhôwa” (Klei Bi Hriêng 1:7) leh anăn weh đuĕ mơ̆ng klei soh.
Klei Aê Diê Blŭ: “Kyuadah jih jang mnuih soh leh sơăi” (Rôm 3:23). Phung đưm ăt thâo klă “amâo mâo ôh pô kluôm ênŭm”, klei anei brei ƀuh anak mnuih soh jhat amâo kluôm ênŭm ôh, klei knhâo anak mnuih dleh snăk thâo kral klei bi kdriêl klei mngač hŏng mmăt, plah wah klei soh leh anăn klei doh jăk, klei ƀai leh anăn klei jăk. Snăn, čiăng dưi ñĕ kơ klei soh, anak mnuih brei thâo răng kơ soh, leh anăn klei yuôm bhăn hĭn jing huĭ mpŭ kơ Aê Diê. Khua ƀĭng kna Y -Pêtrôs mtô: “Kyuadah Hlei pô khăp kơ klei hdĭpleh anăn čiăng ƀuh hruê jăk mơak, brei ñu mkhư̆ êlah ñu đăm blŭ klei jhat ôh, leh anăn đăm brei kƀông ñu blŭ klei mplư ôh. Brei ñu weh đuĕ mơ̆ng klei jhat leh anăn ngă klei jăk” (I Y‑Pêtrôs 3:10-11a). Sĭt huĭ mpŭ kơ Aê Diê, drei srăng weh đuĕ kơ klei soh leh anăn thâo răng hĭn klei pô blŭ tlao nao hriê. Khua ƀĭng kna Y‑Pôl ăt mñă kơ grăp čô drei: “Snăn grăp čô drei srăng hưn bruă ñu ngă ti anăp Aê Diê” (Rôm 14:12). Hlăm hruê Khua Yang lŏ hruê, djăp klei drei blŭ, grăp bruă drei ngă brei hưn mdah ti anăp Aê Diê. Akâo kơ Khua Yang đru grăp čô drei thâo săng klei anăn čiăng thâo răng leh anăn weh đuĕ kơ klei soh.
Drei klă sĭt thâo răng leh anăn weh đuĕ kơ klei soh leh mơ̆? Ya klei mĭn, klei blŭ dôk mâo hlăm drei amâo bi mơak kơ Aê Diê?
Wah lač: Ơ Khua Yang, kâo bi mni lač jăk kơ Ih kyua Klei Aê Diê Blŭ bi hriăm brei kâo thâo răng ai tiê klei mĭn kâo. Akâo kơ Yang Mngăt Jăk ƀuah ăl ya klei soh hlăm ai tiê kâo, brei kâo thâo răng, weh đuĕ kơ klei soh, čiăng klei hdĭp kâo bi guh kơang Anăn Aê Diê.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Dlăng Klei Aê Diê Blŭ hlăm tlâo thŭn: I Klei Yăl Dliê 17
Kênh Youtube BHKTHN:
