Klei Aê Diê Blŭ: Klei Bi Hriêng 14:8-15.
Êlan Kliăng: “Mŭt bĕ ti ƀăng jang kniă; kyuadah ƀăng jang ƀai leh anăn êlan prŏng atăt ba kơ klei rai luč, leh anăn phung mŭt tinăn jing lu. Bi ƀăng jang điêt leh anăn êlan kniă atăt ba kơ klei hdĭp, leh anăn jing ƀiă phung thâo bĭt ƀăng jang leh anăn êlan anăn.” (Y‑Mathiơ 7:13-14).
Klei êmuh ksiêm mĭn: Si mblang “Mnuih thâo răng” hlăm êlan 8 leh anăn 15? Ya ngă mnuih thâo mĭn brei thâo răng ksiêm kơ êlan êbat pô? Ya mta phŭn khăng kơ ngă kơ drei ruah soh êlan êbat? Ya klei đru diih thâo răng ksiêm hĭn hlăm êlan êbat pô?
Hlăm trăn Klei Aê Diê Blŭ Klei Bi Hrêng 14:8-15, Mtao Y‑Salômôn bi hriăm čiăng mâo êla hdĭp thâo mĭn, phung anak brei thâo răng ksiêm kơ êlan pô êbat. Boh blŭ “mnuih thâo răng” hlăm êlan 8 leh anăn êla 15 jing mnuih thâo ksiêm răn. Răng hlăm êlan pô êbat jing “klei ksiêm êlan ñu” (êlan 8) leh anăn “thâo răng ksiêm kơ êlan ñu êbat” (êlan 15). Mtao Y‑Salômôn mtă kơ anak ñu brei thâo răng kyua “Mâo êlan mnuih yap msĕ si kpă, ƀiădah ti knhal tuč ñu atăt kơ klei djiê” (êlan 12). Mnuih amâo thâo răng êbat nao hlăm êlan klei soh srăng tŭ mă klei rŭng răng. Mklăk wĭt, mnuih thâo mĭn thâo ksiêm răng nanao hlăm grăp knhuang êbat, grăp bruă mă čiăng thâo pô êbat djŏ êlan kpă ênô mơ̆ng Aê Diê leh mơ̆ amâodah ka.
Hruê anei, hdĭp hlăm wưng kdrăp hiu hưn mrâo mrang đĭ kyar, lu jơr jing sa hlăm lu mta phŭn ngă kơ drei ruah soh êlan. Hlăm klei mrâo leh anăn hla pŏk web ala ƀuôn mâo lu đei klei soh tăp năng kyua dlăng leh anăn hmư̆ lu blư̆ drei čhuai jing djŏ. Amâodah sĭt ƀuh ênoh tŭ ư lu anăn drei ăt bi mĭn klei anăn djŏ, jing klei dưi mguôp mbĭt, tŭ ư. Lu mnuih kyua kƀah klei thâo răng anăn dŭm klei mĭn soh čhuai atăt ba kơ klei soh. Amâo djŏ ôh jih jang klei hưn hlăm internet, klei mrâo jing djŏ sơaĭ, ăt kăn djŏ klei mblang, klei mĭn mâo lu mnuih mđing jing djŏ rei. Khua Yang Yêsu bi hriăm phung drei brei thâo răng ksiêm sĭt ruah êlan klei hdĭp “Mŭt bĕ ti ƀăng jang kniă; kyuadah ƀăng jang ƀai leh anăn êlan prŏng atăt ba kơ klei rai luč, leh anăn phung mŭt tinăn jing lu. Bi ƀăng jang điêt leh anăn êlan kniă atăt ba kơ klei hdĭp, leh anăn jing ƀiă phung thâo bĭt ƀăng jang leh anăn êlan anăn.” (Y‑Mathiơ 7:13-14).
Ya klei brei drei thâo săng čiăng jing mnuih thâo răng hĭn hlăm ktuê êlan tui hluê Khua Yang?
Wah lač: Ơ Khua Yang, kâo bi mni lač jăk kơ Ih kyua Klei Aê Diê Blŭ bi hriăm leh kâo brei thâo răng hlăm ktuê êlan Ñu. Akâo kơ Ih đru kâo amâo ngă soh ôh hlăm klei mplư soh čhuai. Akâo kơ Ih đru kâo thâo bi hriăm anak hdĭp thâo răng hluê si klei Khua Yang mtô bi hriăm.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đaŏ Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Dlăng Klei Aê Diê Blŭ hlăm tlâo thŭn: II Bruă Mtao 17:7-33
Kênh Youtube BHKTHN:
