Mathais 9:27-31
Nqe cim:
“…Yexus nug nkawd hais tias, “Neb puas ntseeg hais tias kuv kho tau neb?”
Nkawd teb hais tias, “Tus Tswv, wb ntseeg” (Mathais 9:28b).
Lus nug rau sawvdaws xav:
- Thaum Yexus tawm hauv tus nom saib lub tsev sablaj mus, leejtwg raws Yexus qab?
- Nkawd ntshaw thiab thov Yexus txog yam dab tsi?
- Vim li cas tos mus lawm hauv tsev Yexus mam teb nkawd tej lus thov?
- Ob tus neeg digmuag muaj kev ntseeg li cas? Thiab muaj qab hau dab tsi?
- Peb kawm tau yam dab tsi hauv zaj xwm no?
Thaum tawm hauv tus nom lub tsev mus, muaj ob tus neeg digmuag lawv Yexus qab thiab hu nrov nrov thov Yexus pab nkawd. Lo lus “hu nrov nrov” yog “tsa suab hu” “qw kom hnov”. Ob tus txivneej digmuag tsis pom tus Tswv, tiamsis nkawd xav kom tus Tswv pom nkawd, yog li ntawd nkawd thiaj tsa suab hlo hu nrov nrov kom Yexus hnov nkawd hu thiab pab nkawd. Txawm ob tus digmuag ntsia tsis pom tus Tswv, tiamsis qhov uas nkawd hu tus Tswv pab ntawd yog lub tswvyim zoo thiab ib tes haujlwm yog. “Nkawd hu Yexus nrov nrov hais tias, “Daviv tus Tub, thov koj hlub wb!” Qhov ntawd qhia tau hais tias, nkawd lees paub Tswv Yexus yog tus Mexiyas, thiab paub hais tias nkawd tsis tsimnyog tau txais tus Tswv hlub, tiamsis cia siab hais tias nkawd yuav tau tus Tswv hlub.
Tswv Yexus tsis teb ib lo li thiab cia nkawd lawv Yexus qab qw thov pab li ntawd yog xav sim nkawd kev ntseeg saib zoo li cas. Thaum mus txog hauv tsev uas yog qhov chaw ntsiag to tsuas muaj Tswv Yexus thiab Nws cov thwjtim lawm xwb, los nkawd kuj tas siab nrog Yexus mus hauv tsev. Nyob ntawm qhov chaw ntsiag to, Tswv Yexus tau nug nkawd ib lo lus tshwjxeeb hais tias: “Neb puas ntseeg hais tias kuv kho tau neb?” Tswv Yexus xav kom nkawd zeem meej yam uas nkawd ntshaw thiab tas siab ntseeg txog tus Tswv kev pab. Ob tug digmuag qhia meej nkawd kev ntseeg rau tus Tswv hais tias: “Tus Tswv, wb ntseeg.”
Tswv Yexus cev tes mus kov nkawd ob lub qhov muag thiab hais tias: “Cia li muaj raws li neb ntseeg!”. Los ntawm nkawd kev ntseeg thiab tus Tswv lub fwjchim, nkawd qhov muag rov pom kev. Tsis yog nkawd pom kev ntawm sab nqaij tawv xwb, tiamsis nkawd kuj tau tus Tswv qhib nkawd sab ntsujplig pom qhov tseeb lawm thiab. Txawm hais tias Tswv Yexus txwv tsis pub nkawd mus qhia zaj ntawd rau leejtwg, tiamsis vim kev zoo siab loj heev uas zais tsis tau, nkawd thiaj muab zaj txujci ntawd qhia rau txhua tus hnov mus thoob plaws cheebtsam ntawd.
Tswv Yexus tau pub yam uas ob tug neeg digmuag ntshaw rau nkawd tau puv ntoob. Muaj tej zaug peb tsis zoo siab rau tej yam uas tus Tswv muab pub rau peb, vim xav hais tias tus Tswv tsis pub yam peb ntshaw rau peb. Nco ntsoov hais tias, tus Tswv uas hlub peb, Nws tsuas pub yam uas peb “cheemtsum” rau peb xwb, tsis yog Nws yuav pub txhua yam peb “ntshaw” rau peb. Thiab yuav tsum nco ntsoov hais tias, cawm dim ntawm kev txhaum thiab qhib sab ntsujplig kom pom qhov tseeb yog yam muaj nqis tshaj plaws uas tau tus Tswv pub rau peb. Cia li rau siab qhia txog tus Tswv lub npe kom lwm tus tau kho lawv sab ntsujplig ib yam li peb tau lawm.
Peb puas nco Vajtswv txiajntsig uas Nws twb kho peb sab ntsujplig lawm thiab puas kub siab xav qhia tus Tswv lub npe rau txhua tus?
Thov Vajtswv,
Tus Tswv, nyuam yaus ua koj tsaug, tsis yog koj kho ces nyuam yaus tseem digmuag sab ntsujplig. Thov pab kom nyuam yaus paub nco ntsoov Koj txiajntsig, ua neej ruaj khov hauv kev ntseeg kom Koj tau ntsejmuag thiab qhia txog Koj lub npe rau lwm tus. Amees.
Nyeem Vajluskub hauv peb lub xyoo: II.Xwmtxheej Vajntxwv 25:17-26:10
Phab Xa Suab Lus nrog rau Phab Cob Qhia Tus Ntseeg koom tes txhim muaj.
Txhua yam kev pab tswvyim txhim kho, thov nej sau ntawv xa rau lub chaw: kawmvajluskubtxhuahnub@gmail.com
Tshooj Youtube BHKTHN: https://www.youtube.com/c/bhkthn
