Klei Aê Diê Blŭ: Y‑Mathiơ 9:27-31
Êlan kliăng: “…Yêsu lač kơ digơ̆, “Diih đăo mơ̆ kâo dưi ngă klei anei?” Digơ̆ lač kơ Ñu, “Sĭt nik, khua ah.” (Y‑Mathiơ 9:28b).
Klei êmuh ksiêm mĭn: Hlei phung tui hlue Khua Yang Yêsu leh ñu kbiă mơ̆ng sang pô kiă anôk bi kƀĭn? Ya klei diñu čang hmăng leh anăn akâo kơ Khua Yang? Ya ngă Khua Yang guôn nao mŭt hlăm sang kơh wĭt lač kơ pô bum ală? Si klei đaŏ dua čô bum ală anei? Ya klei tŭ diñu mâo? Ya klei hriăm drei mâo mơ̆ng klei yăl dliê anei?
Leh kbiă mơ̆ng sang pô kiă anôk bi kƀĭn, mâo dua čô bum ală tui hluê Khua Yang čiăng ur kraih hŏng Ñu. Boh blŭ “ur kraih” jing ur bi ktang, “ur hŏng jih ai tiê”, dua čô bum ală amâo ƀuh ôh Khua Yang ƀiădah diñu čiăng Khua Yang ƀuh pô anăn gĭr jih ai tiê ur ktang, diñu đaŏ Khua Yang Yêsu jing klei čang hmăng sa anăn dưi đru diñu. Wăt tơdah ală amâo dưi ƀuh ôh ƀiădah hdră dua čô anei ur kraih brei ƀuh diñu thâo săng djŏ leh anăn klei ngă djŏ. Diñu ur kraih: “Ơ Anak Y‑Đawit,” brei ƀuh diñu yap Khua Yang jing Yang Mêsi (Y‑Yêrêmi 3:5). Diñu ur kraih “pap mñai kơ hmei đa!” brei ƀuh diñu thâo pô amâo năng ôh, wăt tơdah snăn dưn digơ̆ ăt čang hmăng Khua Yang srăng bi êdah klei Ñu pap hlăm klei hdĭp pô.
Khua Yang Yêsu amâo wĭt lač ôh leh anăn brei dua čô bum ală tui tluôn Ñu mŭt hlăm lam sang, bi êdah klei diñu gĭr truh knhal tuč. Hlăk anôk hjăn anăn Khua Yang êmuh diñu sa klei êmuh hjăn kơ diñu dua: “Diih đăo mơ̆ kâo dưi ngă klei anei?” Khua Yang čiăng diñu klă sĭt bi mklă klei pô čang hmăng leh anăn dưm klei pô đaŏ kluôm dhuôm kơ Khua Yang. Dua čô bum ală anei bi êdah klei đaŏ ktang phĭt hlăm Khua Yang, “Digơ̆ lač kơ Ñu, “Sĭt nik, khua ah.”
Khua Yang Yêsu ruêh ală dua čô bum ală leh anăn lač“Brei klei anăn truh tui si klei diih đăo” (êlan 29). Kyua klei đaŏ diñu leh anăn klei myang Aê Diê, ală diñu mngač. Klei anei brei ƀuh amâo djŏ knŏng ală hlăm kđeh diñu dưi ƀuh mngač ôh ƀiădah diñu ăt mâo klei bi mrâo kơ mngăt ai tiê kyua klei đaŏ pô. Wăt tơdah Khua Yang Yêsu ghă diñu amâo dưi lač hŏng pô mkăn ôh kơ klei bi hlao anei, ƀiădah hŏng klei hơ̆k mơak êbeh dlai diñu amâo dưi dôk ñăt kriêp ôh, kbiă mơ̆ng sang diñu hưn leh klei hing ang Anăn Khua Yang hlăm tar krĭng anăn.
Khua Yang Yêsu brei leh kơ dua čô bum ală êbeh hĭn kơ klei digơ̆ čang hmăng. Tăp năng drei amâo mơak ôh kơ klei Aê Diê brei kơ pô kyua bi mĭn Ñu amâo ngă ôh ya klei drei čiăng. Brei drei hdơr Pô khăp kơ drei leh anăn thâo mĭn brei nanao kơ drei ya klei drei “čiăng” amâo djŏ ya klei drei tluh ôh. Leh anăn ăt brei drei hdơr klei bi mtlaih mơ̆ng klei soh leh anăn klei bi mlih hlăm mngăt ai tiê jing mnơ̆ng yuôm bhăn Aê Diê brei leh kơ drei. Brei drei hơ̆k mơak hưn Anăn Khua Yang čiăng lu mnuih ăt dưi bi hlao hlăm mngăt ai tiê msĕ si drei.
Drei hdơr knga kơ Aê Diê bi hlao leh mngăt ai tiê pô leh anăn hur har hiu hưn Anăn Khua Yang kơ grăp čô mnuih mơ̆?
Wah lač: Ơ Khua Yang, kâo bi mni lač jăk kơ Ih, tơdah Ih amâo bi hlao snăn kâo ăt dôk hlăm klei mmăt hlăm mngăt ai tiê. Akâo kơ Ih đru kâo hdơr knga nanao kơ Khua Yang, kjăp hlăm klei đaŏ čiăng klei hdĭp kâo bi guh kơang Anăn Ih, hưn Anăn Ih kơ lu mnuih thâo.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Dlăng Klei Aê Diê Blŭ hlăm tlâo thŭn: II Klei Yăl Dliê 25:17 – 26:10
Kênh Youtube BHKTHN:
