Sang Čhiăm – 30/9/2021

1469

 

Klei Aê Diê Blŭ: Klei Kbiă 26:1-37

Êlan kliăng: “Snăn Ơ phung ayŏng adei, kyuadah drei mâo klei jhŏng mŭt hlăm adŭ doh jăk hĭn kyua êrah Yêsu, hŏng êlan mrâo leh anăn hdĭp Ñu pŏk leh kơ drei găn čhiăm păng, čiăng lač hŏng êlan asei mlei Ñu pô” (Hêbrơ 10:19-20).

Klei êmuh ksiêm mĭn: Si ngă klei čih lač ƀhĭ klĭ kơ sang čhiăm? Ya klei drei bi mĭn kơ klei Aê Diê pô hrih jih jang mnơ̆ng dôk hlăm Sang Čhiăm? Ya klei hriăm anei brei drei ƀuh klei Aê Diê pap brei kơ phung đaŏ kơ Ñu?

Sang Čhiăm mâo pă tal guôm hgăm mnơ̆ng doh jăk kơ adiê hjan mđiă leh anăn gang arăng tlĕ dlăng Hip Klei Bi Mguôp. Tal sa, blah mñam hŏng čhiăm kpal ngă hŏng kbuă điêt aruăt leh anăn čhiăm ñuôm êa piơk, êa hrah jŭ, leh anăn hrah huč mâo mñam rup čêrubim ti čhiăm anăn hŏng klei mbruă snăk; arăng mtuôp mơ̆ng pluh blah điêt, grăp blah čhiăm anăn srăng mâo dua pluh sa păn heh, găn grăp blah čhiăm anăn srăng mâo pă heh. Tal dua, čhiăm kpal hŏng mlâo bê; arăng bi mtuôp mơ̆ng pluh sa blah hŏng mlâo bê dlông mâo tlâo pluh heh, găn grăp blah čhiăm pă heh. Tal tlâo, blah guôm ti dlông hŏng klĭt biăp knô mkra leh tĭng gŭ, leh anăn tal pă hŏng klĭt jăk siam tĭng dlông.

Mtih sang čhiăm mâo pă pluh pŏk mdhă, hŏng kyâo akasi luôm hŏng mah, grăp pŏk dlông pluh heh leh anăn găn ñu sa heh mkrah. Jar mâo pluh sa giê kal hŏng kyâo akasi luôm hŏng mah. Sa blah čhiăm bi mbha adŭ doh jăk hŏng adŭ doh jăk hĭn, čhiăm păng anei piơk, hrah jŭ hŏng hrah huč, leh anăn kbuă điêt aruăt mñam rup čêrubim hŏng klei mbruă snăk hŏng mrai piơk, hrah jŭ hŏng hrah huč. Knhal tuč jing sa blah čhiăm phiang kơ anôk mŭt hlăm Sang Čhiăm hŏng kbuă điêt aruăt, dưi đêč hŏng klei mbruă hŏng mrai piơk, hrah jŭ, hrah huč.

Mơ̆ng boh prŏng dŭm blah čhiăm leh anăn hdră mkra mjing Aê Diê ktrâo leh, Sang Čhiăm jing sa boh rup mta dhar mâo dua boh adŭ, ƀăng nao mŭt phă Ngŏ. Hlăm lam jing anôk doh jăk hĭn msĕ si rup mđơr mdơ̆ng găn, grăp mtih hlăm brô 4 met mkrah, dưm Hip Klei Bi Mguôp, Adŭ nah êngao jing anôk doh jăk prŏng hĭn dua bliư̆ anôk doh jăk hĭn; arăng dưm jơ̆ng diăn mah nah Dhŭng, nah Dưr jing jhưng kpŭng myơr kơ Aê Diê leh anăn nah Yŭ jing knưl čuh mnơ̆ng ƀâo mngưi (êlan 35; 30:1-6).

Sang Čhiăm msĕ si sa boh čhiăm arăng bi mtuôp, jih jang mnơ̆ng doh jăk hlăm Sang čhiăm arăng ngă hŏng klei mbruă hŏng mnơ̆ng yuôm bhăn leh anăn hŏng hdră ênưih mbĕ đuĕ. Aê Diê kơ jih jang mnơ̆ng dôk ti krah phung ƀuôn sang Ñu hlăm Sang Čhiăm! Khădah snăn, Sang Čhiăm ăt jing klei hgăm hŏng phung ƀuôn sang Aê Diê ruah, knŏng phung khua ngă yang ngă bruă răng mgang leh anăn tuh êa pui hlăm pui kđen kơh dưi mŭt hlăm anôk doh jăk, leh anăn knŏng phung khua ngă yang kơh dưi mŭt hlăm anôk doh jăk myơr mnơ̆ng ngă yang djiê hrô klei soh kơ phung ƀuôn sang grăp thŭn sa bliư̆. Ƀiădah leh Khua Yang Yêsu djiê ti kyâo bi kal, blah čhiăm păng anôk doh jăk hŏng anôk doh jăk hĭn kơhiêk mơ̆ng dlông, klei bi kbưi plah wah Aê Diê hŏng anak mnuih dưi lăm lui leh anăn grăp čô phung đaŏ kơ Krist jing sa Sang yang kơ Aê Diê dôk. Kyua anăn, “brei drei nao giăm Aê Diê hŏng ai tiê sĭt suôr, hŏng klei thâo sĭt mơ̆ng klei đăo, ai tiê drei bi doh leh mơ̆ng ai tiê kpă jing jhat leh, leh anăn asei mlei drei rao leh hŏng êa doh” (Hêbrơ 10:22).

Drei hdơr nanao mơ̆ asei mlei pô jing sang yang kơ Aê Diê dôk?

Wah lač: Ơ Khua Yang, kâo bi mni lač jăk kơ Ih kyua klei Khua Yang Yêsu djiê anăn kâo dưi mŭt hlăm anôk doh jăk leh anăn Ih brei kâo jing sang yang kơ Ih dôk! Akâo kơ Ih đru kâo hdĭp năng hŏng klei pap Aê Diê brei leh kơ kâo.

Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đaŏ Sang Aê Diê kluôm

Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com

Dlăng Klei Aê Diê Blŭ hlăm tlâo thŭn: I Y‑Samuel 20:1-34

Kênh Youtube BHKTHN:

https://www.youtube.com/c/bhkthn

Bài trướcBài 4: Chúa Là Tường Lửa Của Dân Thánh
Bài tiếp theoKiểu Đền Tạm – 30/9/2021