Klei Aê Diê Blŭ: Y-Markôs 1:29-31
Êlan kliăng: “Yêsu nao mă kngan gơ̆, rŭ brei gơ̆ kgŭ, gơ̆ hlao êngoh mtam, leh anăn gơ̆ đru bruă diñu” (Y-Markôs 1:31).
Klei êmuh ksiêm mĭn: Mơ̆ng anôk Khua Yang Yêsu kbiă leh anăn ti anôk Ñu truh? Ya klei Khua Yang bi tuôm leh anăn ya klei Ñu ngă leh? Ya klei hriăm drei mă tŭ mơ̆ng bruă klei khăp Khua Yang Yêsu ngă?
Hlăm klei yăl dliê đŭt anei, Y-Markôs lŏ răk wĭt hlăk Khua Yang Yêsu leh anăn phung ƀĭng kna “kbiă mơ̆ng sang bi kƀĭn” (êlan 29). Hdră bruă ti sang bi kƀĭn ruê̆ jih hlăk yang hruê dơ̆ng, leh anăn êlâo kơnăn hlăm Y-Markôs 1:21-28 hưn, Khua Yang Yêsu mbĭt hŏng phung ƀĭng kna amâo djŏ knŏng nao čuă sang bi kƀĭn msĕ si yang đar ôh, ƀiădah mâo sa klei bi blah ktang tĭt hŏng klei myang klei mmăt čiăng suôt yang jhat. Hlăk leh jih jang mnuih đuê̆ wĭt mdê mdê, sĭt yơh klei Khua Yang leh anăn phung ƀĭng kna bi mĭn êlâo hĭn, jing duah mnĭt mmông čiăng mdei ƀiă, ti sang ung mô̆ Y-Pêtrôs dôk hdĭp mbĭt hŏng kmha mniê ñu, leh anăn gŏ sang Y-Andrê. Ƀiădah lĕ, hrô kơ klei mâo đih mdei, snăn mâo hĕ sa klei truh mkăn dôk guôn drông Khua Yang Yêsu ti sang anăn. Phung hlăm sang mblang kơ klei êkŭt hĕ kmha mniê Y-Pêtrôs hlăk mmông jum drông Khua Yang, kyuadah gơ̆ “êngoh” leh anăn “dôk đih êngoh” ti jhưng (êlan 30). Jing sa čô aê êa drao, Y-Luk hưn mdah klei ruă anăn klă hĭn hlăm Y-Luk 4:38 tơdah ñu yua boh blŭ “mâo klei êngoh ktang” čiăng lač kơ klei êngoh hlơr ktang tĭt, dưi lač “hlơr msĕ si pui”. Hlăk ênuk anăn, klei kgŭ dơ̆ng jum drông tue, boh nik nak sa čô tue yuôm bhăn, jing bruă čuăn amâo dưi kƀah ôh, ƀiădah tinei klă sĭt klei êngoh gơ̆ ktang êdi yơh tơl kmha mniê Y-Pêtrôs amâo dưi kgŭ ôh mơ̆ng jhưng đih gơ̆ čiăng nao drông tue.
Tơdah thâo klei truh kơ asei mlei kmha mniê Y-Pêtrôs, Khua Yang Yêsu “nao mă kngan gơ̆, rŭ brei gơ̆ kgŭ” (êlan 31). Klei Aê Diê Blŭ tuôm čih pioh đơ bruă myang bi hlao mnuih ruă, amâodah iêu mnuih djiê kbiă lŏ hdĭp, Khua Yang Yêsu knŏng pia blŭ sa boh, ƀiădah tinei klei Khua Yang Yêsu čiăng, amâo djŏ knŏng bi hlao gơ̆ ôh, ƀiădah wăt čiăng bi êdah klei Ñu mđing uêñ sŭk suôr kơ kmha mniê ƀĭng kna Ñu, čiăng mblang Ñu bi êdah klei mđing uêñ sŭk suôr wăt kơ asei pô ƀĭng kna anăn mơh.
Drei lu bliư̆ wơr bĭt leh bi êdah klei mđing uêñ sŭk suôr ngă bruă jăk kơ phung ayŏng amai adei mă bruă kơ Aê Diê mbĭt hŏng drei. Kyuadah lu bliư̆ drei knŏng bi tuôm ƀô̆ mta hlăm klei kƀĭn trông čhai bruă knuă ƀiădah hlŏng amâo thâo ôh si klei hdĭp mda ayŏng amai adei, si klei truh kơ gŏ sang digơ̆, kơ prăk kăk ngăn drăp digơ̆ dôk găn. Lu bliư̆ drei knŏng kñăm kơ bruă hưn Klei Mrâo Mrang Jăk kơ phung ka đăo, ƀiădah amâo mâo ngă ôh bruă jăk čiăng đru bi hlao klei êka phung ayŏng amai adei drei hlăm klei đăo, kơ klei mă bruă kơ Aê Diê amâodah kơ gŏ sang gơ̆. Brei hdơr snei, drei amâo djŏ knŏng jing mnuih mă bruă wêñ wêñ ôh, ƀiădah kdlưn hĭn jing phung ayŏng amai adei sa găp djuê hlăm klei hdĭp myang.
Si ngă drei mâo klei mđing uêñ bi êdah bruă ngă jăk kơ phung ayŏng amai adei drei hlăm Khua Yang leh mơ̆ ka?
Ơ Khua Yang, akâo kơ Ih brei kâo mâo ai tiê thâo khăp, bi êdah hŏng klei thâo mđing uêñ, hŏng bruă ngă jăk sĭt êmĭt, čiăng bi đru rŭ phung ayŏng amai adei dôk mă bruă kơ Aê Diê mbĭt hŏng kâo.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đaŏ Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Dlăng Klei Aê Diê Blŭ hlăm tlâo thŭn: Klei Mtô Mñă Klei Bhiăn 17:8-18:22
Kênh Youtube BHKTHN:
