Klei Aê Diê Blŭ: Klei Bi Hriêng 11:10-11
Êlan kliăng: “Tơdah phung kpă ênô mâo klei jăk jĭn, jih ƀuôn dôk hơ̆k mơak,
leh anăn tơdah phung ƀai rai luč, arăng driâo hơ̆k.” (Klei Bi Hriêng 11:10).
Klei êmuh ksiêm mĭn: Ya klei bi djŏ guôp mâo ti krah phung kpă ênô leh anăn klei jăk jĭn tuh kơ jih ƀuôn? Ya hdră êlan mă mơ̆ng klei anăn čiăng mkŏ mdơ̆ng sa phung ƀuôn sang suaih ktang? Si kdrêč drei dôk bi mguôp kơ ƀuôn sang anôk drei hdĭp?
Mâo dua phŭn knhal brei kơ ƀuôn mâo klei hơ̆k mơak: Tal sa, “klei jăk jĭn”, čiăng lač klei mdrŏng sah đĭ kyar, tŭ jing phung kpă ênô, leh anăn tal dua jing “klei rai luč” “phung ƀai” (êlan 10). Ya ngă jih ƀuôn driâo hơ̆k kyua dua mta phŭn knhal anei? Kyuadah phung kpă ênô brei ƀuôn “mâo klei đĭ kyar”, bi phung ƀai ngă bi “mdlưh ƀuôn” (êlan 11). “Mdlưh” jing rup ƀuôn prŏng hŏng mnư̆ kpal, kđông mgang, sang pưk, leh anăn wăt Sang Yang arăng ksŭng ngă bi mdlưh rai. Brei drei mđing kơ klei bi klăk ti krah “đĭ kyar” hŏng “mdlưh” hlăm dua êlan bi tlă mbĭt, brei ƀuh boh blŭ “đĭ kyar” mblang jing rŭ mdơ̆ng, ngă bi kjăp ktang leh anăn đĭ hriê kơ tŭ jing. Blŭ mdê hĭn, phung kpă ênô amâo mâo knŏng ba klei tŭ jăk kơ ñu pô ƀiădah wăt kơ pô mkăn, kơ ƀuôn sang mơh.
Phŭn knhal kơ klei bi djŏ guôp ti krah sa čô mnuih hdĭp kpă ênô leh anăn klei đĭ kyar suaih ktang kơ sa phung ƀuôn sang kyuadah Klei Aê Diê Blŭ brei thâo “phung kpă ênuah” jing pô ti krah čiăng kơ Aê Diê brei klei jăk jĭn kơ phung ƀuôn sang (Klei Mphŭn Dơ̆ng 39:5). Hdră êlan anei amâo knŏng djŏ hŏng ƀuôn sang ti êngao ôh ƀiădah ăt djŏ snăk hŏng Phung Sang Aê Diê mơh – Phung Sang Aê Diê mâo klei jăk jĭn tơdah mâo “phung kpă ênuah”, ƀiădah ăt mâo lu lĭn Phung Sang Aê Diê “mdlưh hŏng klei phung ƀai blŭ”.
Kdlưn hĭn, “phung kpă ênuah” srăng mâo klei atăt gai djŏ kơ phung ƀuôn sang – “Tơdah amâo mâo klei atăt gai ôh phung ƀuôn sang srăng lĕ; ƀiădah mâo klei hơĭt tơdah mâo lu mnuih đru kčĕ” (Klei Bi Hriêng 11:14). Hlăm klei čih phŭn, “klei atăt gai” ăt mblang jing “pô mgăt kŭmpăn”. Snăn phung ƀuôn sang čiăng mâo lu mnuih thâo mĭn kăp atăt gai leh anăn ktrâo êlan. Mta phŭn yuôm hlei jing pô “kčĕ” ? Tơdah anăn jing “phung kpă ênô” leh anăn “phung kpă ênuah” (êlan 10-11), čiăng lač phung huĭ mpŭ kơ Aê Diê, mâo “klei thâo mĭn” mơ̆ng Khua Yang jing klei jăk jĭn êdi, ƀiădah tơdah anăn jing “phung ƀai”, jing phung amâo huĭ mpŭ kơ Aê Diê snăn, ktang lu “phung đru kčĕ ƀai”, ktang hĭn mơh phung ƀuôn sang srăng “lĕ”. Kyuanăn, čiăng kơ phung ƀuôn sang mâo klei suaih ktang, brei djăp mta bruă mkŏ mdơ̆ng ti dlông klei kpă ênô jing Klei Aê Diê Blŭ, leh anăn knang kơ phung kpă ênô. Brei phung ƀuôn sang bi mtrŭt ai kơ klei djŏ guôp hŏng klei jăk kpă Klei Aê Diê Blŭ leh anăn kơ phung hdĭp bi mơak kơ Aê Diê.
Akâo Aê Diê brei drei yua klei hdĭp huĭ mpŭ kơ Aê Diê mbĭt hŏng knhuah hdĭp kpă ênô leh anăn kpă ênuah čiăng mâo kdrêč mguôp đru găp djuê, Phung Sang Aê Diê, sang hră mơar, anôk mă bruă, alŭ anôk dôk hdĭp dưi jing suaih ktang hĭn. Đăm ôh knŏng jing mnuih amâo uêñ mĭn wăt hlăm sang pô, Sang Aê Diê, amâodah ti anôk mă bruă.
Si ngă drei huĭ mpŭ kơ Aê Diê leh anăn hdĭp kpă ênô ti krah ƀuôn sang Aê Diê mdưm drei mơ̆?
Wah lač: Ơ Khua Yang, akâo Ih đru kâo hdĭp jing hra kơ lăn leh anăn klei mngač kơ lăn ala čiăng kơ hŏng klei hdĭp leh anăn klei kâo mă bruă, ti anôk kâo truh mâo Khua Yang bi mlih dưi jing kpă ênô, êđăp ênang, leh anăn hơ̆k mơak.
Dlăng Klei Aê Diê Blŭ hlăm tlâo thŭn: Klei Mmuñ Hđăp 1:1-6; 2:1-12; 3:1-8
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
