Pajlug 11:10-11
Nqe cim
“Tej neeg hauv lub nroog zoo siab thaum cov neeg ncaj ncees tau koob hmoov, thiab lawv qw zoo siab thaum cov neeg ua phem tuag.” (Pajlug 11:10).
Lus nug rau sawvdaws xav:
- Muaj yam dabtsi sibcog ntawm tus neeg ncajncees thiab tej koobhmoov nchuav pub rau zej zos sawvdaws?
- Dhau qhov ntawd muab tawm tau txojcai licas los txhim kho lub zej zos kom zoo?
- Peb ua tau yam dabtsi pab peb zej peb zos?
Muaj ob lub vimchij ua rau lub nroog muaj kev zoo siab: Tim ib, thaum cov neeg ncajncees “tau koobhmoov”, lossis tau kev vammeej, thiab tim ob, yog thaum “cov neeg ua phem tuag” (nqe 10). Ua cas lub nroog ho zoo siab vim ob lub vimchij no? Vim cov neeg ncajncees ua rau lub nroog “muaj kev vammeej”, tiamsis cov neeg phem ua rau lub nroog “raug kev puastsuaj” (nqe 11). “Puastsuaj” yog daim duab ntsistxog ib lub nroog uas muaj ntsa yeej, vajtse, thiab Tuamtsev raug luag tuaj txeeb thiab ua rau puastsuaj. Peb tig mus saib qhov sib txawv ntawm “vammeej” thiab “puastsuaj” nyob hauv ob lo lus sib tim, qhia pom hais tias “vammeej” ntawm no muaj lub ntsiab hais tias tau txhim kho, tau ua rau muaj zog thiab huamvam. Muab hais ua lwm seem lus, mas tus neeg ncajncees tsis yog tsuas ua rau nws tus kheej tau yam zoo xwb, tseem ua rau zej zos tau thiab.
Qhov uas ua rau muaj kev sib txuas ntawm tus neeg ncajncees thiab lub zej zos vammeej twb yog vim Vajluskub qhia hais tias “cov neeg ncajncees” yog cov nyob nruab nrab ua rau Vajtswv foomhmoov rau zej zos (Chivkeeb 39:5). Txojcai no tsis yog tsuas hais raug rau lubneej sab nraud xwb, tseem hais raug rau tus Tswv Pawg Ntseeg thiab – Pawg Ntseeg tau koobhmoov thaum muaj “cov neeg ncajncees”, tiamsis kuj muaj ntau Pawg Ntseeg muaj “cov neeg siab phem … ua rau … raug kev puastsuaj”.
Tsis tas li ntawd xwb, “cov neeg ncajncees” yuav taw qhia zej zos ua yam uas yog – “Yog tsis muaj tus coj, lub tebchaws yuav poob mus, tiamsis yog muaj coob tus tuavxam yuav ua rau muaj kev tswjhwm ruaj khov” (Pajlug 11:14). Nyob hauv paus lus, “tus coj” muaj lub ntsiab hais tias “tus tsav nkoj”. Yog li ntawd zej zos cheemtsum tus neeg muaj tswvyim los coj thiab taw qhia. Qhov tseemceeb leejtwg yog “tus tuavxam”? Yog hais tias tus ntawd yog “cov neeg ncajncees” (nqe 10-11), lossis paub hwm tus Tswv, muaj “kev txawjntse” ntawm tus Tswv ces yuav tau koobhmoov, tiamsis yog tus ntawd yog “cov neeg ua phem”, lossis tsis hwm tus Tswv ces yim muaj coob “cov tuavxam phem”, ces zej zos yuav “poob mus” lossis raug puastsuaj. Yog li ntawd, xav kom zej zos tau zoo, txhua tes haujlwm yuav tsum ua los ntawm kev ncajncees uas yog Vajtswv Txojlus, thiab ua dhau ntawm cov neeg ncajncees. Zej zos yuav tsum txhawb tej yam zoo phim Vajluskub thiab txhawb cov neeg uas ua haum tus Tswv siab.
Thov tus Tswv pab peb siv lubneej hwm tus Tswv thiab lubneej ncajncees thiab ua zoo los txhim kho lub cuabyig, Pawg Ntseeg, chaw kawm ntawv, chaw ua haujlwm, chaw nyob kom yim hnub yim zoo. Tsis txhob ua tus neeg tsis quavntsej yus cuabyig, Pawg Ntseeg, lossis cov uas nyob ntawm yus chaw ua haujlwm.
Peb puas hwm tus Tswv thiab ua lubneej ncajncees hauv lub zej lub zos uas tus Tswv cia rau peb nyob?
Thov Vajtswv
Tus Tswv, thov pab nyuam yaus ua tau lubneej ua ntsev las thiab ua teeb ci rau neeg ntiajteb, kom dhau nyuam yaus lubneej thiab kev ua haujlwm ua rau txhua qhov chaw uas nyuam yaus mus txog tau Koj hloov ua chaw ncajncees, thajyeeb, thiab muaj kev zoo siab. Amees.
Nyeem Vajluskub peb lub xyoos: Ntawv Nkauj 1:1-3:8
Tshooj Youtube BHKTHN: https://www.youtube.com/c/bhkthn
