Loos 8:28-30
Nqe cim:
“Peb paub hais tias peb cov uas hlub Vajtswv, txawm yog peb tau zoo thiab txomnyem los Vajtswv yuav ua kom tej ntawd muaj nqis rau peb cov uas Vajtswv pom zoo hu los raws li Vajtswv npaj tseg lawm.” (Loos 8:28)
Lus nug rau sawvdaws xav:
– Cov uas tau hu los raws li Vajtswv npaj tseg yog cov zoo licas?
– Vajtswv kev npaj tseg rau tus uas hlub Nws yog dabtsi?
– Zaj kawm hnub no pab peb txojkev ntseeg licas hauv lubneej?
Tus uas tau hu los raws li Vajtswv npaj tseg yog tus uas hlub Vajtswv (nqe 28), tau Vajtswv hu los koom ua Vajtswv tes haujlwm, ua raws Vajtswv homphiaj lossis ua raws li Vajtswv npaj tseg. Tus ntawd yuav xub tseg sijhawm los nrhiav kev sib raug zoo nrog tus Tswv dhau ntawm kev kawm Vajluskub thiab thov Vajtswv; qhia tshwm kev hlub tus Tswv, hlub lwm tus dhau ntawm tej lus hais thiab tes haujlwm (Malakaus 12:30-31). Tus uas tau hu los raws li tus Tswv npaj tseg yuav tiv dhau tej kev tau zoo thiab txomnyem, tau ceem kom zoo thooj Tswv Yexus zuj zus txhua hnub. Tus Tswv yuav tsis tshwj tej kev sim siab hauv peb lubneej tiamsis Nws yeej tswjkav txhua yam. Tus Tswv yuav saib xyuas peb ib yam li Nws saib xyuas Nws lub ntsiab muag thiab cawm peb dim thaum txog sijhawm.
Tus neeg tau tus Tswv hu yog tus uas tus Tswv xaiv cia lawm (nqe 29-30). Vajtswv yog Tus Paub Txhua Yam, Nws ntsia pom peb lubneej ua ntej peb xeeb hauv niam plab. Tus Tswv paub yam zoo thiab yam phem ntawm peb. Nws paub tseeb tej kev txiav txim siab, tej kev yeej swb ntawm txhua tus lubneej. Tus Tswv yeej paub tseeb peb txojkev hlub Nws. Cov neeg uas tus Tswv hu, tau tus Tswv suav hais tias yog cov ncaj ncees, txhais hais tias lawv tau tus Tswv muab lawv tej kev txhaum thaum ub ntxuav huv tibsi lawm, lawv tau hnav tus Tswv lub tsho dawb ncaj ncees, tau rov los nrog Vajtswv sib raug zoo. Qhov kawg, tus uas tau tus Tswv hu kuj tau tus Tswv pub lub tshwjchim uas ci ntsa iab rau lubneej ibvuag nimno thiab lubneej ibtxhis tomntej.
Timthawj Paulus qhia pom Vajtswv kev npaj tseg rau peb cov uas tau hu los raws li Nws pom zoo, ntawd yog cia kom peb “muaj tus yam ntxwv zoo li Nws tus Tub” (nqe 29). Ntawm no yog tej kauj ruam Vaj Ntsujplig pauv hloov peb, txij thaum ntseeg tus Tswv mus txog thaum lubcev tau plhis tshiab ib yam li Timthawj Paulus tej lus qhia hauv tsab ntawv Filipis 3:21, “Nws yuav muab peb lub cev uas txawj mob txawj tuag no hloov dua tshiab kom zoo li nws lub cev uas ci ntsa iab tsis txawj mob tsis txawj tuag. Nws ua tau li ntawd, rau qhov nws muaj hwjchim muab ib puas tsav yam huv tibsi los rau nws kav.” Thaum peb tas siab hlub Vajtswv thiab tau hu los raws li Nws npaj tseg, ces txawm muaj dabtsi tshwmsim tuaj rau peb, tsis hais kev tau zoo thiab txomnyem, los puavleej muaj nqis rau peb thiab pab peb yim hnub yim zoo thooj tus Tswv. Vajtswv muaj kev npaj tseg tshwjxeeb los cob qhia peb kom zoo thooj Nws tib Leej Tub, kom xwv thaum txog hnub kawg peb tau nrog Tswv Yexus uas yog peb tus tij nyob ua ke. Thov tus Tswv pab peb paub hlub tus Tswv thiab cia siab ruaj khov rau Nws tej kev npaj tseg rau peb lubneej.
Thov Vajtswv,
Tus Tswv, nyuam yaus ua Koj tsaug vim Koj tau xaiv nyuam yaus los ua tus menyuam uas Koj hlub. Thov Koj pab nyuam yaus kawm paub thiab ua raws li Koj tej kev npaj tseg rau nyuam yaus hauv ntiajteb no. Nyuam yaus tos ntsoov hnub tau nrog Koj nyob hauv tebchaws ibtxhis. Nyuam yaus tuav Yexus Khetos lub npe thov, Amees.
Peb txiav txim siab ua neej licas thaum zeem paub txoj koob hmoov tus Tswv pub rau peb lubneej?
Nyeem Vajluskub hauv peb lub xyoos: II Kevcai 17
Kênh Youtube BHKTHN:
