Klei Aê Diê Blŭ: Rôm 8:28-30
Êlan kliăng: “Snăn, drei thâo Aê Diê mjing jih jang klei jing jăk kơ phung khăp kơ Aê Diê, čiăng lač phung Aê Diê iêô leh tui si klei Ñu čuăn” (Rôm 8:28)
Klei êmuh ksiêm mĭn: Si ngă phung Aê Diê iêô leh tui si klei Ñu čuăn jing? Ya jing hdră yuôm bhăn hĭn Aê Diê pioh kơ phung khăp kơ Ñu? Ya klei hriăm hruê anei đru kơ klei đăo drei hlăm klei hdĭp?
Phung Aê Diê iêo tui si klei Ñu čuăn leh jing phung khăp kơ Aê Diê (êlan 28), Aê Diê iêô brei mă bruă mbĭt hŏng Ñu, čiăng bi leh klei Ñu kñăm čiăng amâodah hdră Ñu mkra leh. Phung anăn srăng dưm êlâo hĭn jing klei bi mguôp hŏng Aê Diê hŏng klei hriăm Klei Aê Diê Blŭ leh anăn wah lač, bi êdah klei khăp kơ Aê Diê hŏng klei blŭ leh anăn bruă ngă (Y-Markôs 12:30-31). Phung Aê Diê iêo tui si klei Ñu čuăn leh srăng găn klei hơ̆k mơak wăt klei knap mñai, tŭ klei bi hriăm mjuăt čiăng dưi đĭ hriê kơ prŏng jing msĕ si Khua Yang Yêsu hĭn grăp hruê. Aê Diê amâo phưi lui drei tlaih mơ̆ng klei dlăng ôh hlăm klei hdĭp grăp hruê, ƀiădah Ñu kiă kriê hlăm jih jang klei. Aê Diê kiă kriê drei msĕ si asăr ală Ñu pô leh anăn bi mtlaih drei djŏ mmông.
Phung Aê Diê iêô jing phung Aê Diê kral leh mơ̆ng êlâo (êlan 29-30). Aê Diê jing Pô thâo jih jang klei, Ñu ƀuh jih klei hdĭp drei êlâo kơ amĭ dơ̆ng tian kơ drei. Aê Diê thâo jih klei drei dưi ngă leh anăn klei awăt grăp čô drei. Ñu thâo klă jih jang klei čuăn ngă, klei dưi amâodah hơăi hlăm klei hdĭp grăp čô mnuih. Aê Diê thâo klă mơh klei drei khăp kơ Ñu. Aê Diê yap kpă phung Ñu iêo leh, čiăng lač Aê Diê lăm jih klei soh digơ̆ hlăm hruê leh êgao, dưi hơô ao jhung kô̆ kpă ênô Khua Yang Yêsu, lŏ mâo klei êđăp ênang hŏng Aê Diê. Ti knhal tuč, phung Aê Diê iêô leh ăt Aê Diê bi guh kơang leh mơh kơ digơ̆ hlăm klei hdĭp êjai bhiâo anei, boh nik nak hlăm klei hdĭp hlŏng lar ênuk êdei.
Khua ƀĭng kna Y-Pôl brei ƀuh hdră yuôm bhăn hĭn Aê Diê pioh leh kơ drei, phung Ñu iêô tui si Ñu čuăn leh jing, “jing msĕ si rup Anak Ñu” (êlan 29). Anei jing hdră Yang Mngăt Jăk bi mlih mrâo klei hdĭp drei mơ̆ng hruê drei đăo kơ Khua Yang tơl truh kơ hruê asei mlei drei mâo klei bi mlih msĕ si Khua ƀĭng kna Y-Pôl mtô leh hlăm hră Philip 3:21 snei, “Ñu srăng bi mlih asei mlei awăt drei brei jing msĕ si asei mlei guh kơang Ñu, hŏng klei myang Ñu dưi brei jih jang mnơ̆ng gưt kơ Ñu.” Tơdah drei ăt khăp kơ Aê Diê hŏng jih ai tiê leh anăn mâo klei iêo tui si klei Ñu čuăn leh snăn yơh jih jang klei truh kơ drei, thâodah klei jăk amâodah klei knap mñai, jih jang ba klei tŭ dưn sơăi leh anăn đru drei jing msĕ si Khua Yang Yêsu hĭn. Aê Diê mâo hdră yuôm bhăn čiăng bi hriăm mjuăt drei jing msĕ si Anak Ñu Pô Mâo Knŏng Sa Čô, čiăng hlăm hruê knhal tuč drei dưi dôk mbĭt hŏng Khua Yang Yêsu, jing Ayŏng Khua kơ lu phung ayŏng adei. Akâo Khua Yang đru drei khăp kơ Ñu nanao leh anăn đăo kjăp kơ hdră Ñu hlăm klei hdĭp drei.
Si ngă drei srăng čuăn hdĭp tơdah thâo kral klei Aê Diê pap kơ klei hdĭp drei?
Wah lač: Ơ Khua Yang, kâo lač jăk kơ Ih kyuadah Ih ruah leh kâo brei jing anak Ih khăp êdimi. Akâo Khua Yang đru kâo hriăm leh anăn gưt kơ hdră Ih bi mlih klei hdĭp kâo ti lăn ala anei. Kâo dôk čang guôn hruê dưi dôk mbĭt hŏng Ih hlăm anôk jăk mơak nanao hlŏng lar. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: Klei Mtô Mñă Klei Bhiăn 17
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
