II Xwmtxheej 34:22-33
Nqe cim:
“Tiamsis tus uas ua tib zoo saib tseeb tseeb txoj kevcai uas zoo kawg nkaus uas pab tau neeg dim los nyob ywjpheej. Tus uas khaws tej lus ntawd cia rau hauv nruab siab thiab xyaum ua raws li tej lus ntawd, thiab tsis yog mloog tas xwb tsis nco qab lawm, Vajtswv yuav foom koob hmoov rau nws.” (Yakaunpaus 1:25)
Lus nug xav:
– Tus pojniam cev Vajtswv lus Hulidas tau hais dabtsi?
– Vajntxwv Yauxiyas tau txais Vajtswv txojkev hlub li cas?
– Vajntxwv hu sawvdaws los sib sau ua ke los coglus txog yam dabtsi?
– Peb nyeem, kawm, thiab ua raws Vajtswv Txojlus li cas?
Pab neeg uas Vajntxwv Yauxiyas xa mus ntsib tus pojniam cev Vajtswv lus Hulidas yog mus nrhiav kom totaub heev ntxiv txog Vajtswv Txojlus. Hulidas hais rau lawv hais tias, “tus TSWV hais li no” ob zaug, qhov no qhia tseeb hais tias cov lus ntawd yog Vajtswv tej lus tiag tiag. Tus Tswv qhia hais tias lawv yuav raug tej lus foom phem uas sau cia hauv phau ntawv uas vajntxwv twb tau hnov nyeem lawm, rau qhov lawv tau tso tus Tswv tseg thiab mus tua tsiaj fij rau lwm haivneeg tej vajtswv, yog li ntawd tus Tswv txojkev chim thiaj los raug rau lawv lub tebchaws. Lawv tau ua txhaum Vajtswv Txoj Kevcai, yog li ntawd lawv yuav raug tej lus foom phem (II Kevcai 28:15-68). Qhov kev txiav txim ntawd yuav tsis muaj leejtwg thim tau. Tiamsis Hulidas hais ib lo lus muaj kev cia siab rau Vajntxwv Yauxiyas, vim tus Tswv pom tias vajntxwv muaj lub siab ncaj ncees, mos muag, txo hwjchim, lees txim, thiab tu siab rau nws tej kev txhaum. Vajntxwv tau ua tej yam tsimnyog thaum hnov Vajtswv Txojlus. Yog li ntawd, qhov kev rau txim uas Vajtswv npaj rau cov Yudas uas yog raug coj mus ua cev qhev hauv tebchaws Npanpiloos, yuav tsis tshwm sim mus txog thaum Vajntxwv Yauxiyas tuag.
Tom qab uas hnov cov lus ntawd lawm, Vajntxwv Yauxiyas txiav txim siab rov txhim kho kev coglus nrog Vajtswv. Nws hu tagnrho cov pejxeem sib sau tuaj ua ke thiab mus rau hauv tus Tswv lub Tuamtsev, Vajntxwv tus kheej nyeem tagnrho phau ntawv coglus uas nrhiav tau hauv lub Tuamtsev rau sawvdaws mloog. Vajntxwv coglus tias nws yuav hwm tus Tswv, ua raws li tus Tswv tej kevcai thiab tej lus samhwm kom kawg siab kawg ntsws, thiab ua kom tau raws li tej lus cog tseg uas sau rau hauv phau ntawv ntawd. Vajntxwv kuj kom cov neeg uas nyob hauv Yeluxalees thiab cov Npeeyamees coglus hais tias yuav ua raws li tej lus cog tseg ntawd, thiab nws kuj kom sawvdaws yuav tsum pehawm tus Tswv uas yog lawv cov yawgkoob tus Vajtswv mus tas nws simneej.
Kev rov coglus nrog tus Tswv no muaj ob sab: nyob hauv siab thiab nyob hauv kev ua haujlwm tshwm. Qhov ib, los ntawm tag nrho lub siab thiab lub ntsws, Vajntxwv tau coglus ua raws li tus Tswv tej kevcai thiab tej lus samhwm kom kawg siab kawg ntsws. Qhov ob, Vajntxwv coglus yuav ua tiav tej cogtseg lus hauv phau ntawv coglus ntawd los ntawm tes haujlwm mloog lus. Thaum Vajntxwv tseem muaj sia nyob, nws kom cov pejxeem sawvdaws ua raws nraim li txoj kev coglus ntawd (nqe 32-33).
Vajntxwv Yauxiyas tsis yog tsuas lees txim thiab tu siab rau nws tej kev txhaum thaum hnov Vajtswv Txojlus nyeem rau nws mloog xwb, tiamsis nws tseem xav kom totaub ntxiv txog Vajtswv tej lus ntawd. Tsis tas li ntawd xwb, Vajntxwv tseem txiav txim siab coglus tias nws yuav ua raws nraim li tej lus uas nws tau hnov nyeem lawm. Vim qhov kev coglus ntawm Vajntxwv thiab cov pejxeem ntawd, ib tiam neeg thiaj dim ntawm Vajtswv txojkev rau txim. Lub txim raug coj mus ua cev qhev thiaj raug ncua tsis tshwmsim mus txog thaum lawv rov ua txhaum rau tus Tswv tom qab uas Vajntxwv Yauxiyas tuag lawm.
Niaj hnub nimno, peb twb muaj Vajtswv Txojlus nyob hauv peb txhais tes lawm, peb cia li siv tag nrho peb lub siab los nyeem thiab kawm Vajtswv Txojlus kom ncaj ncees thiab coj raws nraim li Nws tej lus qhia. Yog peb tseem tshuav qhov tsis tau ua raws li Nws tej lus, cia peb rov coglus dua tshiab nrog Vajtswv, tas siab tas ntsws coj thiab ua raws li Nws Txojlus qhia.
Thov Vajtswv,
Tus Tswv, thov pub nyuam yaus muaj lub siab nyeem, kawm thiab ua raws li Koj Txojlus qhia uas tsis yog tsuas mloog xwb, kom nyuam yaus tau txoj koob hmoov thaum mloog Koj lus. Nyuam yaus tuav Yexus Khetos lub npe thov. Amees.
Puas muaj yam twg uas peb tseem tsis tau mloog tus Tswv lus?
Vajluskub hauv peb lub xyoos: Tes Haujlwm 14
Kênh Youtube BHKTHN:
