Hơriso 32:1-5
“Inh tơbral yoch hăm Kră Yang ‘Bok Kei-Dei, Ưh pă đei ôn dôm yoch kơnê̆ inh. Inh khan: “Inh tơbral roi đĭ dôm tơdrong yoch glăi inh kơ Kră Yang. Ih huay pă jô̆ yoch inh.” (Hơriso 32:5)
Nơ̆r jet tơchĕng pơwao:
– Pơtao Đawĭt đei tơdrong yoch pơm pơyô kư̆ kă păng pơlôch bơngai thoi yơ?
– Kơplah Na-than bơngai khan lê̆ adrol tơ’bôh tơdrong yoch, Đawĭt đei mơn thoi yơ?
– Đơ̆ng tơdrong kiơ pơtao đei Kră Yang mơnat ăn păng hiôk ‘lơ̆ng?
– Lu bơ̆n pơhrăm iŏk tơdrong kiơ đơ̆ng kơmĭl pơtao Đawĭt roi tơbral yoch?
II Samuel chăl 11-12 chih roi hơ’mon pơtao Đawĭt đei tơdrong yoch pơm pơyô kư̆ kă hăm Batsê’ba noh akăn Uri, đơ̆ng rŏng kơ noh đei tơdrong yoch dơ̆ng pơlôch pơrăm bơngai lăm hnam dơnŏ kơplah pơtao tơlĕch nơ̆r athei Jôap yŏng linh wơh ‘bok Uri lĕch năm tơ anih tơblah mă hli krê hloh wă kơ linh ayăt pơlôch Uri. Kơplah Nathan bơngai khan lê̆ adrol tơ’bôh yoch, Pơtao Đawĭt băt mơn hloi, ưh kơ kĕ pơjăng, ưh kơ đei wer weh hơngah kơ yoch păng kư̆m ưh kơ iŏk tơdrong gơh pơgơ̆r wă pơrăm Nathan bơngai khan lê̆ adrol na gơh ôn lê̆ tơdrong yoch, mă-lei pơtao iŏk đon ala pơyom drơ̆ng kơ sư yoch bơih, tơbral, roi tơdrong yoch kơ Kră Yang, lu bơ̆n ‘bôh tơdrong ‘nâu đơ̆ng Hơriso 32 păng 51.
Đơ̆ng rŏng kơ pơm yoch, pŭ iŏk đơ̆ng tơdrong yoch noh ưh kơ gơh weh wer, ‘nguaih kơ noh, tơdrong yoch pơtao Đawĭt pơm ăn kơ tơdrong tơ’bưh pơtao hăm Kră Yang ‘Bok Kei-Dei kơtĕch, Pơtao mơn kơ trăp trĭn nhen kơting drang tơ tŏ hang (trong 3-4). Đơ̆ng rŏng kơ noh Pơtao đei chih đêl mơn kơdih akâu: “Inh tơbral yoch hăm Kră Yang ‘Bok Kei-Dei, Ưh pă đei ôn dôm yoch kơnê̆ inh. Inh khan: “Inh tơbral roi đĭ dôm tơdrong yoch glăi inh kơ Kră Yang . Ih huay pă jô̆ yoch inh.” (trong 5). Pơtao pơma đơ̆ng lăm jơhngơ̆m băt tơbral tơpă, thoi noh “Inh tơbral yoch hăm Kră Yang ‘Bok Kei-Dei”. Pơtao mơn ‘bôh rơđah tơdrong jang kơdih akâu kơnê̆ ‘mê̆ ‘mach păng pơtao ưh pă đei ôn kơ Kră Yang kư̆m ưh kơ ôn kơ kon bơngai. ‘Nguaih kơ roi tơdrong hăm Kră Yang Pơtao kư̆m chih lăm Hơriso ưh kơsĭ minh tơdrong pơdah roi tơdrong yoch sư kơdih kơ kon pơlei mă kư̆m đei ăn ‘bai pơhrăm gah roi tobral yoch, đei Kră Yang mơnat ăn păng hiôk ‘lơ̆ng ăn kơ jơhngơr đơ̆ng rŏng dơ̆ng. đei yua, lâm jơhngơ̆m pơtao đei pŭn hiôk yua kơ “Kră Yang huay pă jô̆ yoch inh” Pơtao đei Kră Yang yua lăm tơdrong jang Sư, păng lĕch đơ̆ng yoch glăi, đei Kră Yang mơnat ăn hiôk ‘lơ̆ng kơ Pơtao noh ‘bai pơhrăm ăn kơ lơ bơngai, lăm noh đei lu bơ̆n (tr 1-2).
Dang ei, lu bơ̆n gô drơ̆ng thoi yơ kơplah đei bơngai tơ’bôh tơdrong glăI lu bơ̆n? lơ wơ̆t phŏ yua ưh kơ chu iŏk, mơlâu thoi noh jing hơngah pơjăng khan ưh kơ yoch, chă đon pơma pơkuĕch wă ưh kơ drơ̆ng kơdih yoch, phŏ lăp lu bơ̆n chă trong pơrăm ‘nhŏng oh wă kơ gơh ôn tơdrong yoch. Kră Yang ưh kơ lăp đon dah drơ̆ng plơ̆ thoi noh. Nơ̆r Kră Yang khan: “Bơngai bu ôn tơdrong yoch sư ưh kơ đei pŭn hiôk; Mă-lei đei bu tơbral păng achăng lê̆ sư gô đei mơnat.” (Tơdrong Pơđơ̆k 28: 13). Lu bơ̆n đei iŏk tơdrong mơnat đĕch đơ̆ng Kră Yang kơplah roi tơbral yoch kơ Kră Yang. Lu bơ̆n gơh hiôk ‘lơ̆ng păng gơh tơ’bưh hăm Kră Yang thoi blŭng a kơplah tơbral tơpă.
Kơkuh kơ Kră Yang Tơ’ngla iơ̆m dim ‘bĕnh tơdrong ‘mêm mơnat, yua kơ inh kơdih ngăl pơm yoch hăm Kră Yang păng hăm bơngai nai, apĭnh Yang Bơhngol ‘Lơ̆ng tơ’blŏk bơtho tơ’bôh kơ inh kơplah wă ‘maih pơm yoch wă kơ inh gơh đei mơnat păng hiôk ‘lơ̆ng đơ̆ng Kră Yang ăn. Krao khan yua anăn Kră Yang Yêsu Krist. Amen.
Lu bơ̆n kăl kơ tơbral hloi ưh kơplah băt mơn kơdih pơm yoch hăm Kră Yang?
Đŏk sơ̆p hla bơar nơ̆r ‘Bok Kei-Dei lăm pêng sơnăm: Tơdrong Pơđơ̆k 24
Kênh Youtube BHKTHN:
