II Xwmtxheej Vajntxwv 31:1
Nqe cim:
“…cov Yixalayees mus thoob plaws txhua lub nroog hauv lub tebchaws Yudas thiab tsoo tej ncej zeb, ntov tus mlom pojniam Aselas, rhuav tej thaj thiab tej chaw teev dab povtseg. Lawv ua li ntawd mus thoob plaws hauv lub tebchaws Yudas, thiab thoob plaws hauv xeem Npeenyamees, xeem Efalayees thiab xeem Manaxes cheebtsam av, ces lawv mam li rov los tsev.” (II Xwmtxheej Vajntxwv 31:1)
Lus nug rau sawvdaws xav:
– Cov neeg uas mus hauv lub nroog Yeluxalees ua dabtsi tom qab uas ua Kevcai noj Ncuav tsis xyaw Keeb?
– Lawv ua rau cov chaw twg?
– Peb kawm tau dabtsi ntawm tej haujlwm uas cov neeg no ua?
Ua Kevcai Hla Dhau thiab Kevcai noj Ncuav tsis xyaw Keeb xaus, kaw lub qhov rooj Tuamtsev, muab tej cuabyeej ntaus suab khaws cia tas, tiamsis cov neeg uas kub siab lug pehawm Vajtswv hauv lub nroog Yeluxalees tsis xaus qhov ntawd. Lawv tsis yog kub hauv lub siab xwb lawv txawm cia li ua tawm haujlwm. Lawv tawm mus hauv tej nrog uas nyob hauv lub tebchaws Yudas tsoo tej ncej zeb, ntov tus mlom pojniam Aselas, rhuav tej thaj thiab tej chaw teev dab povtseg, lawv ua thoob plaws hauv lub tebchaws Yudas, thiab thoob plaws hauv xeem Npeenyamees, xeem Efalayees thiab xeem Manaxes cheebtsam av uas nyob yav qaumteb tebchaws Yixalayees. Lawv tsuas yog nres thaum twb “rhuav txhua yam tas”, qhov no qhia paub lawv xav muab tej mlom rhuav tawm hauv lub tebchaws mus. Lawv txojkev kub siab tsis yog tas tom qab uas xaus kevcai, tas kev pehawm, tiamsis tseem kub siab lug coj lawv mus ua tes haujlwm rhuav kev pemlom kom tas. Tom qab ntawd lawv mam li rov los hauv lawv lub nroog.
Ua ntej thaum ua Kevcai Hla Dhau thiab Kevcai noj Ncuav tsis xyaw Keeb lawv twb rhuav tej chaw pemlom hauv nroog Yeluxalees puas tsuaj tas, muab coj mus pov rau hauv lub Hav Kidoos (II Xwmtxheej Vajntxwv 30:13-14) thiab ua rau lub nroog Yeluxalees dhau los ua lub nroog tsimnyog ua Kevcai Hla Dhau. Nimno, txojkev kub siab sab ntsujplig kuj ua rau lawv muaj lub siab tshem tej kev phem tawm hauv lub tebchaws Yudas mus txog tebchaws Yixalayees. Lawv txiav txim siab tsis pub kom pom tej duab, chaw pemlom nyob qhov twg, komxwv lawv tsis raug ntxias rov mus ua kev txhaum, yog li lawv thiaj “rhuav txhua yam tas”.
Nimno, thaum tuaj pehawm thiab mloog Vajtswv Txojlus qhia, lossis tom qab xaus ib lub rooj txhawb siab, caij kawm Vajluskub ntuj so… los ntawm Vajtswv Txojlus thiab tej lus nqua hu, muaj ntau leej kuj lub siab lug, quaj tu siab, coglus tig rov los… Tiamsis thaum rov los tsev lawm, coob leej tso tseg txojkev kub siab no, lawv rov mus ua neej zoo li qub tsis hloov li. Ntau zaus tsuas yog kub siab thaum hnov Vajtswv Txojlus qhia xwb, qhov ntawd tsis tshwm kev ua haujlwm. Txojkev kub siab lug thaum pehawm nws yog tau ntsib tus Tswv tas muaj kev hloov pauv,qhov ntawd yuav tau muaj rawv nyob hauv peb lub siab txog qib uas ntxub kev txhaum, rhuav tshem “txhua yam tas” uas yog tej mlom peb qhov muag pom thiab tsis pom uas tsis haum Vajtswv siab mus. Thov Vajtswv pab rau peb, tsis yog pheej muab tej qhov zoo ntawm rooj kev pehawm, txhawb siab, caij ntuj so los ua kev kub siab ib ntus ploj mus tiamsis qhov ntawd yuav tsum tawm haujlwm.
Thov Vajtswv,
Vajtswv, thov pub rau nyuam yaus siv tau tej uas kawm tau ntawm koj Txojlus hauv tej rooj pehawm, txhawb siab… rau hauv lub neej txhua hnub, kom nyuam yaus kub siab lug rhuav txhua yam kev pemlom thiab kev txhaum tawm hauv lub neej mus. Nyuam yaus tuav Tswv Yexus Khetos lub npe thov, Amees.
Peb tseem tseg tej mlom, tej kev ua tsis zoo lossis tsis haum Vajtswv siab twg hauv peb lub neej?
Nyeem Vajluskub hauv peb lub xyoo: Yaxayas 42
Kênh Youtube BHKTHN:
