Klei Aê Diê Blŭ: II Klei Yăl Dliê 31:1
Êlan kliăng: “…jih jang phung Israel hriê leh kơ ƀuôn Yêrusalem kbiă nao kơ ƀuôn hlăm čar Yuđa, bi mčah hĕ gơ̆ng kŭt rup yang, druôm hĕ phung rup yang Asêra, leh anăn bi klưh hĕ anôk dlông wăt knưl tar ƀar čar Yuđa, čar Benjamin, čar Êphraim, leh anăn čar Manasê tơl diñu bi rai jih dŏ anăn” (II Klei Yăl Dliê 31:1)
Klei êmuh ksiêm mĭn: Ya klei jih jang phung hriê kơ ƀuôn Yêrusalem ngă ruĕ Knăm Ƀơ̆ng Kpŭng Amâo Mâo Kpei? Ti amôk diñu ngă? Ya klei hriăm drei mâo mơ̆ng bruă phung anei ngă?
Knăm Klei Găn leh anăn Knăm Ƀơ̆ng Kpŭng Amâo Mâo Kpei ruê̆ leh, arăng kđăl leh ƀăng bhă Sang kkuh mpŭ, jih jang mnơ̆ng yua kơ klei kưt mmuñ arăng pioh leh hlăm hjiê, ƀiădah jih jang phung kkuh mpŭ kơ Aê Diê hŏng klei hơ̆k mơak ti ƀuôn Yêrusalem amâo mjưh tăp anăn ôh. Diñu amâo brei klei hlơr anăn knŏng jing klei bi kdjưng ai ôh ƀiădah mjing gơ̆ jing bruă mă. Diñu kbiă nao kơ ƀuôn hlăm čar Yuđa bi mčah hĕ gơ̆ng kŭt rup yang, druôm hĕ phung rup yang Asêra, leh anăn bi klưh hĕ anôk dlông wăt knưl tar ƀar čar Yuđa, čar Ƀenjamin, čar Êphraim leh anăn čar Manasê, anăn jing anôk lăn phung găp djuê Isreal ti čar dưr. Diñu bi rai tơl jih dŏ anăn kơh diñu mdei, klei anăn bi êdah kơ klei diñu čiăng snăk bi doh hĕ anôk kkuh mpŭ kơ rup yang hlăm čar diñu. Ruê̆ hruê knăm, ruê̆ klei kkuh mpŭ, klei diñu hlơr amâo ram ôh, ƀiădah klei hlơr anăn ăt dôk nanao hlăm ai tiê diñu, mtrŭt diñu mâo klei jhŏng bi rai jih klei kkuh mpŭ kơ rup yang. Leh klei anăn kơh diñu wĭt kơ ƀuôn diñu pô.
Êlâo kơ ƀơ̆ng Knăm Klei Găn leh anăn Knăm Ƀơ̆ng Kpŭng Amâo Mâo Kpei, diñu mă mđuĕ hĕ jih jang knưl ngă yang kơ rup yang ba hwiê hlăm tlung Sêdrôn (II Klei Yăl Dliê 30:13-14) leh anăn mjing ƀuôn Yêrusalem jing anôk năng mkra Knăm Klei Găn. Ară snei hin, klei hlơr hlăm klei hdĭp myang mtrŭt diñu ktưn ngă klei bi doh tar ƀar mơ̆ng čar Yuđa truh kơ čar Israel. Diñu amâo lŏ čiăng ƀuh sa mta rup yang leh anăn knưl ngă yang ôh, čiăng đăm rup yang lŏ mplư diñu êbat hlăm êlan soh kyuanăn diñu “bi rai jih dŏ anăn”.
Hruê anei, tơdah hriê kkuh mpŭ kơ Khua Yang leh anăn hmư̆ klei mtô Klei Aê Diê Blŭ, amâodah hlăm klei bi kƀĭn bi mđĭ ai, hriăm Klei Aê Diê Blŭ Yan Bhang… leh hmư̆ klei mtô leh anăn klei iêô jak, lu mnuih mâo klei bi kčŭt hlăm ai tiê, hia leh anăn ƀuăn rơ̆ng…Ƀiădah lĕ, tơdah leh wĭt kơ sang, mâo lu mnuih luč jih klei bi kčŭt anăn leh anăn hdĭp amâo mâo mdê ôh hŏng êlâo dih! Tăp năng klei hlơr leh hmư̆ Klei Aê Diê Blŭ knŏng mjưh mă tăp klei bi kdjhưng ai đuč, amâo mjing jing bruă ngă hlăm klei hdĭp pô ôh. Klei hlơr êjai mmông kkuh mpŭ kyua dưi bi tuôm hŏng Khua Yang srăng ba hriê klei bi mlih, srăng čuh ai tiê drei tơl drei bi êmut kơ klei soh, kmhal hĕ leh anăn “bi rai jih” rup yang dưi ƀuh leh anăn amâo dưi ƀuh ôh, lui jih klei amâo bi mơak kơ Khua Yang hlăm klei hdĭp drei. Akâo Khua Yang đru drei đăm brei klei bi hmăi jăk mơ̆ng klei kkuh mpŭ, mơ̆ng klei bi kƀĭn bi mđĭ ai, klei hriăm Klei Aê Diê Blŭ Yan Bhang…jing knŏng klei bi kdjhưng ai bhiâo leh anăn wơr bĭt hĕ ôh, ƀiădah mjing jing bruă ngă sĭt.
Ya rup yang, klei mưng jhat, amâodah klei amâo bi mơak kơ Khua Yang drei ăt dôk djă pioh hlăm klei hdĭp drei?
Wah lač: Ơ Khua Yang, đru kâo mă yua hlăm klei hdĭp kâo grăp hruê jih jang klei kâo hriăm mơ̆ng Klei Ih Blŭ hlăm mmông kkuh mpŭ, klei bi mđĭ ai čiăng kơ kâo mâo klei hlơr bi rai hĕ jih jang rup yang leh anăn klei soh hlăm klei hdĭp kâo. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: Y-Êsai 42
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
