Klei Aê Diê Blŭ: Klei Mtô Mñă Klei Bhiăn 12:28-32
Êlan kliăng: “Răng bĕ đăm djŏ kđông tui ngă msĕ si diñu ôh leh diñu rai ti anăp ih, leh anăn đăm êmuh duah kơ yang diñu ôh, ‘Si phung găp djuê anei mă bruă kơ yang diñu? — čiăng kơ kâo dưi ngă msĕ mơh.” (Klei Mtô Mñă Klei Bhiăn 12:30).
Klei êmuh ksiêm mĭn: Ya klei Y‑Môis iêô mthưr phung ƀuôn sang Israel brei hlue ngă Klei Aê Diê Blŭ mtô? Si klei ñu hưn kơ phung ƀuôn sang Aê Diê brei răng kơ pô hŏng phung ƀuôn sang Kanaan? Ya hdră kñăm klei hưn brei răng anei? Ya ngă brei hdĭp hlăm ai tiê thâo răng hlăm grăp hruê?
Čiăng mjưh ruê̆ klei mblang kơ klei kkuh mpŭ, Y‑Môis iêô mthưr phung ƀuôn sang Israel brei gưt Klei Aê Diê Blŭ sĭt nao dôk hlăm krĭng Kanaan čiăng kơ anak čô diñu dưi dưn klei jăk mơak Aê Diê brei lă lar. Klei yuôm bhăn hĭn hlăm kdrêč knhal tuč anei jing, Y‑Môis sa blư̆ dơ̆ng mñă klei bhiăn kăm jih hnơ̆ng bruă phung ƀuôn sang Aê Diê amâo dưi kkuh mpŭ kơ Aê Diê hlue si hdră phung ƀuôn sang Kanaan ôh. Wăt tơdah arăng suôt đuĕ leh phung ƀuôn sang Kanaan ƀiădah dŭm hdră kkuh kơ rup yang năng ai ăt adôk mơh. Klei mplư hlăm bruă kkuh kơ rup yang leh anăn kkuh mpŭ kơ Aê Diê hlue si klei mtŭk mtŭl mơ̆ng phung ƀuôn sang amâo đaŏ ăt lŏ mâo mơh. Anei jing dŭm bruă kjham snăk, kyua anăn brei phung ƀuôn sang Aê Diê hdĭp hlăm klei thâo răng jih hnơ̆ng čiăng đăm lĕ ôh hlăm klei mplư kkuh kơ rup yang anăn lăm lui hĕ klei bhiăn Aê Diê. Tơdah phung ƀuôn sang Aê Diê lui Klei Aê Diê Blŭ tui hlue klei mplư kkuh kơ rup yang snăn klei bi mguôp yuôm bhăn diñu hŏng Aê Diê srăng mjưh ruê̆. Klei năng ênguôt hlăm hƀuê ênuk phung ƀuôn sang Israel jing hlăm dŭm thŭn êdei anăn, jih Mtao leh anăn phung ƀuôn sang Aê Diê lăm lui klei bhiăn Aê Diê, leh anăn myơr anak čô diñu msĕ si phung amâo đaŏ (II Bruă Mtao 17:16-17). Klei anăn brei ƀuh klei Y‑Môis mñă wĭt mñă nao kơ phung ƀuôn sang Aê Diê brei thâo răng kơ pô, brei hdĭp hlăm ai tiê thâo răng, amâo djŏ jing êbeh ôh.
Drei ăt khăng mâo klei amâo răng leh anăn dlăng hơaĭ mang dŭm klei mplư ti ală mta pô grăp hruê. Drei bi mĭn klei hdĭp mngăt pô djăp klei ktang anăn srăng amâo mâo lĕ ôh hlăm ya klei mplư. Drei ktưn hưn pô djăp klei thâo săng Klei Aê Diê Blŭ čiăng dưi hgao djăp klei mplư. Kyua klei mĭn leh anăn knuih amâo răng anăn lu mnuih hlăm phung drei lĕ hlăm dŭm klei mplư kơ prăk mah, klei êkei mniê… amâo thâo êlâo ôh. “Snăn hlei pô mĭn ñu dôk dơ̆ng, brei ñu răng huĭdah ñu srăng lĕ buh” (I Kôrantô 10:12). Tơdah klei mplư amâo mâo klei dưi bi tluh leh anăn bŏ hŏng klei ktang snăn lu anak čô Aê Diê amâo srăng lĕ ôh, wăt phung drei dlăng jing ênuah ênô, toh hroh hlăm klei dluh rai klei hdĭp mngăt pô. Kyua anăn, brei drei thâo răng kriê pô, hdĭp hlăm ai tiê thâo răng, grăp hruê brei ksiêm dlăng pô hdĭp tui si klei bhiăn Aê Diê mơ̆.
Drei tuôm kƀah klei răng hlăm klei hdĭp mngăt leh anăn lĕ hlăm ya klei mplư leh mơ̆?
Wah lač: Ơ Khua Yang, akâo kơ Ih đru kâo thâo hdĭp hlăm ai tiê thâo răng, čiăng kơ kâo amâo lĕ ôh hlăm klei mplư. Akâo kơ Klei Aê Diê Blŭ răng kriê kâo hlăm djăp êlan êbat tui si klei Khua Yang čiăng.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Dlăng Klei Aê Diê Blŭ hlăm tlâo thŭn: Y‑Nêhêmi 7:61-8:12
Kênh Youtube BHKTHN:
