Pơsĭt Ăn Tơdrong ‘Nao ‘Lơ̆ng ‘Lơ̆ng Rŏ Tơpă – 25/10/2025

I Timôthê 1:12-17

 “Mă-lei ‘Bok Kei-Dei oei mơnat kơ inh na pơklaih inh yua kơ Kră Yang Yêsu Krist wă tơbăt kơ kon bơngai Sư mơnat tơpă kơ inh mă pơm yoch lơ hloh kơ đĭ đăng bơngai nai. Na lu bơngai nai gô ‘bôh tơdrong Sư mơnat kơ inh, sư băt ‘Bok Kei-Dei mơnat tơpă kơ đĭ đăng bơngai, na lu sư gô lui kơ Kră Yang Yêsu Krist hăm arih ling lang.” (I Timôthê 1:16)

Nơ̆r jet tơchĕng pơwao:

–               ‘Bok Pôl bơnê kơ Kră Yang gah lu tơdrong kiơ?

–               Lăm nơ̆r bơnê, sư pơma kiơ gah Kră Yang păng gah sư kơdih?

–               Bơ̆n klah asong tơdrong kiơ wă pơsĭt Tơdrong ‘Nao ‘Lơ̆ng ‘lơ̆ng rŏ tơpă?

Đơ̆ng rŏng kơ roi tơdrong Timôthê pơjăng lăm tơdrong jang lu bơngai lui tơ pơlei Êphêsô, wă noh jơ̆ hăm tơdrong lu bơngai bơtho “tơdrong lui nai”, hăm lu bơngai pơm “tôm tơdrong kơnê̆ hŭt lê̆ tơdrong ‘lơ̆ng tơpăt” ‘Bok Pôl đei pơma nơ̆r bơnê. Đơ̆ng noh, Sư ăn kơ bơ̆n ‘bôh bơngai mă đei “Tơdrong ‘Nao ‘Lơ̆ng ‘Bok Kei-Dei ‘lơ̆ng rŏ hiôk hian ling lang bơtho” gô thoi yơ (I Timôthê 1:3-11).

‘Bok Pôl tơlĕch ăn ‘bar tơdrong mă Sư bơnê kơ Kră Yang: Yua kơ “Sư khan inh trŏ bơngai gơh jang tơdrong Sư; păng yua kơ Sư “rơih iŏk inh jang kơ Sư” (trong 12). Đơ̆ng rŏng kơ noh, đơ̆ng trong 13-16, Sư roi tơdrong arih sư tơplơ̆ băl adrol păng đơ̆ng rŏng kơ sư lui kơ Kră Yang: Adrol sơ̆, sư “pơma kơnê̆ kơ Kră Yang, pơjăm Kră Yang, pơm kơnê̆ kơ lu bơngai lui kơ Kră Yang” dang ei, sư đei ‘Bok Kei-Dei mơnat pơklaih sư. Đơ̆ng noh, bơ̆n ‘bôh ‘bar tơdrong sư bơnê kơ Kră Yang mă adrol noh rai jing pha hloh, noh jơ̆ sư bơngai mă pơm yoch lơ hloh kơ đĭ đăng bơngai nai ưh kơ sĭ Kră Yang pơklaih sư đĕch mălei Kră Yang kư̆m yua sư mơ̆n wă kơ lu “bơngai nai gô ‘bôh tơdrong Kră Yang mơnat kơ sư. Sư băt ‘Bok Kei-Dei mơnat tơpă kơ đĭ đăng bơngai, na lu sư gô lui kơ Kră Yang Yêsu Krist hăm arih ling lang (trong 16).

Đei pêng tơdrong bơ̆n pơhrăm iŏk đơ̆ng nơ̆r ‘bok Pôl bơnê kơ Kră Yang. Mă mônh, sư ưh kơ khan: “Inh bơnê kơ Kră Yang yua kơ inh jơ̆ bơngai kơjăp bơngai ‘lơ̆ng” dah mă “inh jơ̆ đĭch đam Kră Yang” Mălei, sư bơne kơ Kră Yang yua kơ “Kră Yang khan sư trŏ bơngai gơh jang tơdrong Kră Yang” Yua kơ Kră Yang mơnat kơ sư” (trong 13, 16), păng yua kơ “Kră Yang Yêsu Krist… yua inh pơm tơ’bôh ăn…” (trong 16) Dah wă khan  sư băt kơ tơdrong  mă sư đei noh, tơdrong jang mă sư đei iŏk, păng tơdrong kơjăp ‘lơ̆ng tă đơ̆ng Kră Yang mơnat ăn ngăl. Đŏk nơ̆r bơnê noh bơ̆n ‘bôh tôm tơdrong ưang kơ Kră Yang ngăl ưh kơ trŏ kơ sư ôh. Mă ‘bar, ‘bok Pôl lăng tơdrong sư đei mơn gah tơdrong arih sư tơplih noh jơ̆ pơsĭt ăn Tơdrong ‘Nao ‘Lơ̆ng rŏ tơpă. Mă pêng, sư ưh kơ minh tơdrong khan kơ Timôthê gah tơdrong khan “’nĕ” păng “ưh” dah tơdrong jang đĕch ôh. Mălei sư kư̆m klaih asong hăm lu bơngai jang hơdai nơ̆r kơdranh gah Tơdrong ‘Nao ‘Lơ̆ng pơm kơ tơdrong arih sư tơplih păng tơdrong jang sư.

Chăl arih kiơ̆ Kră Yang lăm rim nu lu bơngai lui athei pơsĭt ăn Tơdrong ‘Nao ‘Lơ̆ng ‘Bok Kei-Dei ‘lơ̆ng rŏ tơplih tơdrong arih bơ̆n. Hăm đĭ jơhngơ̆m bơnê kơ Kră Yang, rim ‘nu lu bơ̆n kăl athei klah asong tơdrong âu hăm lu ‘nhŏng oh bơngai lui bơ̆n, lu bơngai jang hơdai. Dôm nơ̆r bơnê păng bơ̆n băt bơnê kơ Kră Yang gô tơgŭm dih băl hơri bơnê ưang tơdrong ‘lơ̆ng rŏ Kră Yang ling lang.

Ơ Kră Yang, apinh Ih tơgŭm inh băt mơn tơpă tơdrong Kră Yang dŏng pơklaih wă kơ tơdrong noh oei hơnơ̆ng jơ̆ tơdrong inh bơnê păng bơ̆jang. Apinh Ih ăn kơ inh kư̆m klah asong tơdrong Ih mơnat ăn wă tơiung dih băl bơne ưang kơ Kră Yang. Krao khan yua anăn Kră Yang Yêsu Krist, Amen.

Hăm đei layơ nơ̆r bơnê bơ̆n jơ̆ nơ̆r bơnê akâu kơdih mălei yua hăm nơ̆r “Bơnê kơ Kră Yang” ưh?

 Đŏk Sơ̆p Hla bơar ‘Bok Kei-Dei lăm pêng sơnăm: Jêrêmi 13

Kênh Youtube BHKTHN:

https://www.youtube.com/c/bhkthn