Klei Aê Diê Blŭ: I Y-Timôthê 1:12-17
Êlan kliăng: “Ƀiădah kâo mă tŭ leh klei pap kyua klei anăn, čiăng kơ Yêsu Krist bi êdah hlăm kâo, pô soh hĭn, jih klei Ñu gĭr klă, čiăng kâo jing klei bi hmô kơ phung srăng đăo kơ Ñu čiăng mâo klei hdĭp hlŏng lar.” (I Y-Timôthê 1:16)
Klei êmuh ksiêm mĭn: Ya klei Khua ƀĭng kna Y-Pôl bi mni kơ Khua Yang? Hlăm klei bi mni, ya klei ñu lač kơ Khua Yang leh anăn kơ pô? Ya klei drei kah mbha čiăng bi mklă kơ Klei Mrâo Mrang Jăk guh kơang?
Leh lač kơ bruă Khua Pô Mtô Y-Timôthê tuôm hŏng klei dleh dlan hlăm klei mă bruă ti Sang Aê Diê Êphêsô, jing bruă kơ phung mtô “klei đăo mkăn”, hŏng phung ngă “jih jang klei mdê hŏng klei mrâo mrang jăk”, Khua ƀĭng kna Y-Pôl lač leh klei bi mni. Mơ̆ng anăn, ñu brei drei ƀuh mnuih mâo “klei đăo Klei Mrâo Mrang Jăk guh kơang Aê Diê jăk mơak mtô bi hriăm” si srăng jing (I Y-Timôthê 1:3-11).
Khua ƀĭng kna Y-Pôl hưn dua mta phŭn ñu bi mni kơ Aê Diê: Kyua “kâo jing sĭt suôr”, leh anăn kyua Ñu “pioh brei kâo mă bruă kơ Ñu” (êlan 12). Leh anăn, mơ̆ng êlan 13-16, ñu lač kơ klei mdê êlâo leh anăn êdei kơ đăo kơ Aê Diê: Hruê êlâo, ñu “blŭ mgao, ngă jhat, leh anăn dlao wač kơ Aê Diê”, hruê anei, ñu mâo klei pap Aê Diê bi tui. Mơ̆ng anăn brei ƀuh dua mta phŭn tal êlâo ñu bi mni kơ Aê Diê jing yuôm bhăn hĭn, anăn jing mnuih soh jhat mrô sa anăn amâo djŏ knŏng mâo Aê Diê bi mtlaih ôh ƀiădah Aê Diê lŏ yua čiăng “jing klei bi hmô kơ phung srăng đăo kơ Ñu čiăng mâo klei hdĭp hlŏng lar” (êlan 16).
Mâo tlâo klei hriăm mơ̆ng klei Khua ƀĭng kna Y-Pôl bi mni. Tal sa, ñu amâo lač ôh: “Kâo bi mni kơ Aê Diê kyua kâo jing pô sĭt suôr” amâodah “kâo jing dĭng buăl Aê Diê”. Hrô kơ anăn, ñu bi mni kơ Aê Diê kyua “Ñu yap kâo jing sĭt suôr”, kyua Ñu “pioh brei kâo mă bruă kơ Ñu” (êlan 12), kyua “kâo mă tŭ leh klei pap” (êlan 13, 16), leh anăn kyua “Yêsu Krist … čiăng kâo jing klei bi hmô …”(êlan 16). Lŏ mblang jing, ñu thâo săng bruă klam pô mâo, bruă pô dưi ngă leh anăn jih klei sĭt suôr pô mâo kyua knang kơ klei pap Khua Yang. Dlăng klei bi mni anăn drei ƀuh Aê Diê dưi mpŭ mni amâo djŏ ñu ôh. Tal dua, Khua ƀĭng kna Y-Pôl dlăng klei thâo kơ klei bi mlih ñu pô jing klei bi mklă jăk siam kơ Klei Mrâo Mrang Jăk guh kơang. Tal tlâo, ñu amâo djŏ knŏng lač hŏng Y-Timôthê kơ klei “đăm ngă” leh anăn “amâo mâo” kơ bruă, ƀiădah ñu lŏ kah mbha hŏng phung mă bruă mbĭt kơ Klei Mrâo Mrang Jăk hmăi kơ klei hdĭp leh anăn bruă ñu ngă.
Klei hdĭp tui hlue Aê Diê mơ̆ng grăp čô đăo brei jing sa klei bi mklă jăk siam kơ Klei Mrâo Mrang Jăk guh kơang. Hŏng jih ai tiê hdơr knga kơ Khua Yang, grăp čô drei brei bi kah mbha klei anei hŏng phung ayŏng amai adei pô hŏng sa klei đăo, hŏng phung mă bruă mbĭt. Klei drei bi mni leh anăn hdơr knga kơ Aê Diê srăng đru bi mđĭ ai bi mni kơ klei guh kơang Aê Diê hlŏng lar.
Mâo mơ̆ klei bi mni drei jing čŏng bi mni kơ pô dưi mdăp hlăm klei blŭ “Bi mni kơ Aê Diê”?
Wah lač: Ơ Khua Yang, akâo kơ Ih đru kâo thâo săng êlam klei Ih bi tui čiăng mă klei pap anăn jing nanao mta phŭn kơ kâo bi mni leh anăn mă bruă. Akâo kơ Ih đru kâo ăt kah mbha kơ klei pap Ih čiăng bi mđĭ ai hdơ̆ng pô bi mni kơ Ih. Kâo wah lač hlăm Anăn Khua Yang Yêsu Krist , Amen.
Dlăng Klei Aê Diê Blŭ hlăm tlâo thŭn: Y-Yêrêmi 13
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
