Kalatias 5:2-12
Nqe cim:
“Nej cov uas xyaum ua raws li Vajtswv txoj kevcai, kom Vajtswv suav hais tias nej yog cov uas ncaj ncees, nej twb ncaim Yexus Khetos mus lawm, nej yuav tsis tau Vajtswv txoj koob hmoov.” (Kalatias 5:4)
Lus nug rau sawvdaws xav:
- Cov ntseeg hauv Kalatias mus ua kevcai txiav, qhov ntawd txhais licas?
- Hauv nqe 6, Timthawj Paulus rov hais dua txog qhov tseemceeb ntawm kev cawmdim yog dabtsi?
- Peb yuav tsum ua neej licas thaum tau txais txojkev cawmdim los ntawm kev ntseeg?
Hauv ntu Vajlugkub no, Timthawj Paulus xav xaus cov ntsiab lus tseem ceeb uas nws tau sau qhia rau cov ntseeg hauv Kalatias ua ntej yuav hla mus rau lwm yam. Qhov xubthawj, hauv nqe 2-4, nws rov hais txog qhov teebmeem ntawm Pawg Ntseeg Kalatias, tias yog lawv mloog cov uas tab tom ntxias lawv thiab ua kevcai txiav, ces qhov ntawd txhais hais tias lawv twb ncaim Yexus Khetos mus lawm thiab lawv yuav tsis tau Vajtswv txoj koob hmoov. Kevcai txiav, nyob hauv lub tsamthawj no, ces yog tsis lees yuav tej uas Tus Cawmseej tau ua rau lawv lawm (nqe 2). Cov neeg Kalatias xav hais tias yog lawv ntxiv kevcai txiav rau lawv txojkev ntseeg ces lawv txojkev cawmdim yim ruaj khov. Tiamsis, hauv txojkev cawmdim, ntxiv tej haujlwm zoo ces yog tsis txais yuav Vajtswv txoj koob hmoov uas twb ua tiav lawm.
Qhov tim ob, hauv nqe 5-6, Timthawj Paulus rov hais kom cov neeg Kalatias nco tias lawv tau Vajtswv suav hais tias ncaj ncees yog los ntawm “kev ntseeg” thiab “Vaj Ntsujplig”. Nws rov hais meej txog qhov tseemceeb ntawm txojkev cawmdim yog txojkev ntseeg uas qhia tshwm dhau ntawm kev hlub (nqe 6).
Puas muaj kev tsis sib haum thaum Timthawj Paulus hais tias “qhov uas ua kevcai txiav thiab tsis ua yeej tsis tseem ceeb dabtsi” (nqe 6 – HMOWSV), txhais tau tias ua kevcai txiav kuj tau, tsis ua kuj tsis ua cas; tiamsis nyob hauv nqe 2, nws ho hais tias: “Yog nej kam ua kevcai txiav lawm, ces kuj ib yam li nej suav hais tias Yexus Khetos pab tsis tau nej?. Qhov tseeb, tsis muaj kev tsis sib haum nyob qhov no. Vim nyob hauv nqe 6, nws tabtom hais txog txojcai dav dav, uas yog kevcai txiav tsis tseemceeb rau tus ntseeg lawm; tiamsis nyob hauv nqe 2, hais txog cov neeg Kalatias saib qhov uas ua kevcai txiav tseemceeb kawg li, yog li thaum ua kevcai txiav nrog rau txojkev ntseeg zoo li ntawd, ces yog lawv saib tej uas Tswv Yexus ua tsis txaus pab kom lawv tau txojkev cawmdim.
Qhov tim peb, nyob hauv nqe 7-12, Timthawj Paulus hais ntau zaug meej meej tias cov lus qhia uas ntxias lawv ntawd tsis yog los ntawm Vajtswv los, thiab tus uas qhia li ntawd yuav raug Vajtswv rau txim hnyav kawg li. Phau ntawv Kalatias tsis qhia meej tias cov neeg ntawd yog cov nyob hauv Pawg Ntseeg lossis nyob sab nraud tuaj. Peb tsuas paub hais tias lawv twb nyob hauv Pawg Ntseeg Kalatias, lawv twb “qhia” (Kalatias 1:8-9), twb “ntxias” (Kalatias 3:1), twb “txwv”, twb “ua ntxhov” rau Pawg Ntseeg Kalatias lawm (Kalatias 5:7-12).
Peb txhua tus twb txais Tswv Yexus txoj koob hmoov cawmdim los ntawm txojkev ntseeg lawm, peb yuav tsum “ua neej nyob” ntxiv hauv txojkev ntseeg ntawd. Yog ib tug coj thiab qhia Vajtswv Txojlus, peb yuav tsum qhia rau tus Tswv cov menyuam txog Txoj Moo Zoo ntawm kev ntseeg uas qhia tshwm dhau ntawm kev hlub, tsis yog qhia ib txojmoo zoo uas tsis yog los ntawm Vajtswv los. Yuav tsum ceevfaj, vim “tus uas tuaj ua rau nej ntxhov ntawd, txawm yog nws yog leejtwg los Vajtswv yeej yuav rau txim rau nws” (nqe 10)!
Thov Vajtswv,
Tus Tswv, thov cia nyuam yaus nyob ruaj hauv Koj thiab Koj Txojlus, kom nyuam yaus sawv ruaj hauv txojkev ntseeg uas tau txais ntawm Tswv Yexus, tsis yuamkev raws tej kev cai uas tsis yog los ntawm Koj los. Nyuam yaus tuav Tswv Yexus Khetos lub npe thov, Amees.
Koj puas ntseeg ruaj khov tias kev cawmdim yog los ntawm txojkev ntseeg xwb, los tseem cia siab rau tej haujlwm zoo ntxiv?
Nyeem Vajluskub hauv peb lub xyoos: Yaxayas 54
Kênh Youtube BHKTHN:
