Klei Aê Diê Blŭ: Galati 5:2-12
Êlan kliăng: “Tơdah diih čiăng mâo klei yap kpă hŏng klei bhiăn, diih bi ktlah leh mơ̆ng Krist yơh, diih luč leh klei pap” (Galati 5:4)
Klei êmuh ksiêm mĭn: Ya klei mblang mđrĭng hŏng bruă phung đăo Galati tŭ thiăm klei khăt klĭt? Hlăm êlan 6, Khua ƀĭng kna Y-Pôl lŏ bi klă ya klei yuôm bhăn hlăm klei bi mtlaih? Si brei drei hdĭp tơdah mâo leh klei pap klei bi mtlaih kyua klei đăo?
Hlăm trăn Klei Aê Diê Blŭ anei, Khua ƀĭng kna Y-Pôl čiăng lŏ blŭ kñăm jih jang klei phŭn ñu čih leh kơ phung đăo Galati êlâo kơ mŭt hlăm kdrêč mkăn. Tal sa, êlan 2-4, ñu mñă wĭt kơ boh klei phung Galati, tơdah diñu hmư̆ hlue si klei phung dôk bi rŭng diñu ngă klei khăt klĭt, snăn klei anăn mđrĭng hŏng bruă diñu lui Krist leh anăn luč klei pap. Khăt klĭt, hlăm boh klei anei, jing lăm lui hĕ jih bruă Krist ngă leh kơ diñu (êlan 2). Phung Galati bi mĭn thiăm klei khăt klĭt hlăm klei đăo srăng ngă kơ klei dưi yap jing kpă ênô kơ pô dưi rơ̆ng thiăm. Khădah snăn, hlăm klei bi mtlaih, thiăm klei kpă ênô jing hngah tŭ mă klei pap kluôm ênŭm.
Tal dua, êlan 5-6, Khua ƀĭng kna Y-Pôl mñă wĭt kơ phung Galati hdơr diñu dưi yap kpă ênô jing “kyua klei đăo” leh anăn “kyua Yang Mngăt Jăk”. Ñu lŏ bi mklă klei yuôm bhăn hlăm klei bi mtlaih jing klei đăo bi êdah hŏng klei khăp (êlan 6).
Mâo klei ka djŏ mơ̆ tơdah Khua ƀĭng kna Y-Pôl lač “Kyuadah hlăm Krist Yêsu klei khăt klĭt amâodah klei amâo khăt klĭt amâo mâo ênoh yuôm ôh” (êlan 6), jing khăt klĭt dưi mơh, amâo khăt ăt kăn dihnei mơh, ƀiădah hlăm êlan 2, ñu lŏ lač “tơdah diih tŭ klei khăt klĭt, Krist amâo srăng lŏ jing yuôm kơ diih ôh”? Boh sĭt, amâo mâo ôh klei ka djŏ tinei. Hlăm êlan 6, ñu dôk lač hlue si klei bhiăn mbĭt, khăt klĭt amâo lŏ yuôm bhăn ôh hŏng phung đăo, ƀiădah hlăm êlan 2, hlăm boh klei phung Galati dlăng klei khăt klĭt jing yuôm bhăn snăk, kyua anăn tơdah tŭ klei khăt klĭt hŏng klei đăo snăn, diñu ƀuh bruă Khua Yang Yêsu ngă amâo djăp ôh kơ klei bi mtlaih.
Tal tlâo, êlan 7-12, Khua ƀĭng kna Y-Pôl lu blư̆ bi mklă klei mtô mrâo lač amâo hriê mơ̆ng Khua Yang ôh, pô mtô snăn năng tŭ klei bi kmhal kjham snăk. Hră Galati amâo lač klă ôh phung mtô snăn jing mơ̆ng hlăm Phung Sang Aê Diê amâodah mơ̆ng anôk mkăn truh. Drei knŏng thâo diñu mâo leh ƀô̆ mta ti Sang Aê Diê Galati, “mtô” leh (Galati 1:8-9), “mƀlum” leh ” (Galati 3:1), “ghă”, “mtrŭt”, “bi rŭng”, “ba klei bi rŭng” kơ phung đăo Galati (Galati 5:7-12).
Grăp čô drei mă leh klei pap klei bi mtlaih mơ̆ng Khua Yang Yêsu kyua klei đăo, brei drei ăt dôk “hdĭp” hŏng klei đăo nanao. Jing mnuih bi ktrâo atăt leh anăn bi hriăm Klei Aê Diê Blŭ, brei drei ba kơ phung ƀuôn sang Aê Diê Klei Mrâo Mrang Jăk mơ̆ng klei đăo bi êdah hlăm klei khăp, amâo djŏ ba hriê sa klei mrâo mrang jăk amâo hriê mơ̆ng Aê Diê ôh. Brei drei thâo răng kyua “hlei pô dôk bi rŭng klei mĭn diih srăng tŭ klei bi kmhal” (êlan 10)!
Drei dôk đăo klă sĭt klei bi mtlaih kyua klei đăo amâodah lŏ knang kơ bruă jăk mkăn?
Wah lač: Ơ Khua Yang, akâo kơ Ih đru kâo sĭt suôr hŏng Ih leh anăn Klei Aê Diê Blŭ čiăng kơ kâo dôk kjăp hlăm klei đăo tŭ mă leh mơ̆ng Krist, amâo mgei ôh kyua klei bhiăn amâo hriê mơ̆ng Khua Yang. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y-Êsai 54
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
