Klei Aê Diê Blŭ: Klei Bi Hriêng 13:22-25
Êlan kliăng: “Mnuih jăk brei ngăn dưn kơ phung anak čô ñu, ƀiădah ngăn dŏ mnuih soh pioh kơ phung kpă ênô.” (Klei Bi Hriêng 13:22).
Klei êmuh ksiêm mĭn: Si klei Mtao Y‑Salômôn mtô klei pioh brei ngăn dưn kơ anak? Ya dŏ Khua Yang Yêsu mtô brei tui duah êlâo hĭn? Ya mnơ̆ng yuôm hĭn hŏng drei leh anăn ya ngăn dŏ diih pioh brei kơ anak čô?
Jih jang mnuih hmăng hmưi sơăi čiăng dưi mâo ngăn dưn pioh brei kơ phung anak čô. Mtao Y‑Salômôn mtô anak kơ klei pioh brei ngăn dưn hŏng dua mta klei: ngăn dŏ (êlan 22) leh anăn knhuah kpă (êlan 24). Êlâo hĭn, mnuih čiăng pioh brei ngăn dưn brei ñu mâo hĕ ngăn dŏ leh anăn thâo săng ya dŏ jing yuôm hĭn čiăng pioh brei. “Mnuih jăk” jing mnuih dôk dơ̆ng jăk, kpă ênô, pioh brei ngăn dŏ čiăng đru anak mkŏ mdơ̆ng klei hdĭp trei mđao, klei yuôm hĭn diñu ăt pioh brei ngăn dưn knhuah kpă kơ anak mơh.
Jih jang amĭ ama khăp sơăi yơh kơ anak leh anăn čiăng kơ anak mâo klei tŭ jing hlăm klei hdĭp mda, ƀiădah amâo djŏ ôh jih jang amĭ ama mâo klei thâo săng leh anăn dưi khăp kơ anak djŏ hdră êlan sơăi. Khăp kơ anak jing brei kpĭ mkra, mjuăt mđăo, mtô lač kơ anak, tơdah amâo ngă ôh snăn jing “bi êmut kơ gơ̆ yơh” (êlan 24). Mtô anak brei thâo kriăng mă bruă knuă, khă ƀun ƀin dưn tơdah ăt gĭr ktĭr mă bruă sĭt nik srăng dưi mâo mnơ̆ng ƀơ̆ng huă lu êbeh. Ƀiădah đăm ôh kyua hung đei kơ ngăn dŏ snăn ngă soh hĕ. Hlăk anăn, wăt tơdah anak mâo ngăn dŏ dưn, ƀiădah ngăn dŏ anăn ti knhal tuč ăt rai luč jih mơh, ăt srăng lĕ hlăm kngan phung kpă ênô mơh (êlan 22). Anak brei thâo snei, phung ƀai srăng mâo klei kƀah ƀiădah mnuih kpă ênô srăng mâo mnơ̆ng ƀơ̆ng huă djăp (êlan 25). Ngăn dŏ leh anăn knhuah kpă brei nao mđrĭng mbĭt, snăn kơh klei hdĭp anak srăng mâo klei jăk jĭn.
Lu amĭ ama hruê anei uêñ mĭn đei kơ ngăn dưn mnơ̆ng mnuă dŏ dô pioh brei kơ anak ƀiădah dlăng hdjul kơ ngăn dưn knhuah kpă, klei hdĭp mngăt. Diñu hưn ktưn kơ ngăn drăp, bruă knuă, diñu ksŭng ai duah prăk kăk čiăng mâo ngăn dŏ pioh brei kơ anak hĭn kơ klei mtô lač kơ anak brei thâo duah prăk hŏng klei kpă ênô leh anăn ênhă êlan thâo yua ngăn dưn hŏng klei kpă ênô leh anăn knhuah kpă. Phung đăo brei mâo klei thâo ƀuh kbưi hŏng klei thâo mĭn mơ̆ng Aê Diê. Khua Yang Yêsu čiăng kơ drei thâo săng snei, ngăn dưn knhuah kpă, klei hdĭp kpă ênô jing yuôm hĭn kơ ngăn dŏ: “Ƀiădah brei diih duah êlâo hĭn ƀuôn ala mtao Aê Diê leh anăn klei kpă ênô Ñu, leh anăn Ñu srăng thiăm brei kơ diih jih jang mnơ̆ng anăn” (Y‑Mathiơ 6:33). Ngăn dŏ ti lăn ala knŏng jing bhiâo, amâo mâo ôh pô dưi ba mbĭt tơdah leh ñu djiê. Aê Diê lač hŏng pô knŏng uêñ mĭn kơ ngăn dŏ ƀiădah wơr bĭt hĕ ênoh yuôm klei hdĭp mngăt snei: “Ƀiădah Aê Diê lač kơ ñu, ‘Ơ mnuih mluk! Mlam anei Aê Diê srăng sua mă mngăt ih. Leh anăn mnơ̆ng ih mkra leh, hlei pô srăng dưn lĕ?’ Msĕ snăn mơh pô mkăm pioh lu ngăn drăp kơ ñu pô, leh anăn amâo jing mdrŏng hlăm Aê Diê ôh.” (Y‑Luk 12:20-21). Ngăn dŏ jing yuôm, ƀiădah knhuah kpă jing yuôm hĭn kơ ngăn dŏ; leh anăn ênoh yuôm klei hdĭp mngăt – klei hdĭp hlŏng lar jing yuôm hĭn kơ jih jang.
Si ngă drei uêñ mĭn pioh brei ngăn dŏ klei kpă ênô kơ phung anak čô mơ̆?
Wah lač: Ơ Khua Yang, bi mni lač jăk kơ Ih kyua Klei Blŭ Ih lŏ mñă kơ kâo brei thâo săng ya mta jing ênoh yuôm hĭn čiăng pioh brei kơ phung anak čô. Akâo kơ Ih brei kơ kâo klei thâo mĭn, klei khăp, leh anăn klei gĭr čiăng kơ kâo thâo mtô lač phung anak čô, amâo djŏ knŏng thâo yua bi jăk ngăn dŏ, ƀiădah wăt brei diñu thâo ƀuh ênoh yuôm klei hdĭp kpă ênô leh anăn thâo uêñ mĭn kơ klei hdĭp hlŏng lar.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đaŏ Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Dlăng Klei Aê Diê Blŭ hlăm tlâo thŭn: I Bruă Mtao 8:46-66
Kênh Youtube BHKTHN:
